Nopajan ta stojolal Dios

«Jnaʼoj lec scotol ti cʼu xʼelan chichʼic vocole»

Éxodo 3:1-10

LI Vivliae xi chal ta sventa li Jeovae: «Jaʼ Chʼul Dios, Jaʼ Chʼul Dios, Jaʼ Chʼul Dios li Mucʼul Dios[e]» (Isaías 6:3). Taje chakʼ ta ilel ti lek sak xchiʼuk chʼabal xchopolil ta mas li Jeova Diose. ¿Mi jaʼ van skʼan xal ti tsots yoʼonton xchiʼuk muʼyuk xkʼuxul yoʼonton li Diose? O ta skoj ti jpas mulilutike, ¿mi xuʼ van oyutik ta yoʼonton jun Dios ti chʼul xchiʼuk chʼabal xchopolile? Li loʼil ta Éxodo 3:1-10, ti chal ti la xchiʼin sbaik ta loʼil Dios xchiʼuk Moisese, te ta jtabetik jun stakʼobil ti tspat tajek koʼontontike.

Jun velta kʼalal yakal chchabi xchij li Moisese, oy kʼusi toj labal laj yil: oy jpets chʼix ti tsanem skʼakʼale «pero muʼyuc chcʼacʼ» (versikulo 2). Bat skʼel ta nopol, yuʼun tskʼan tsnaʼ li kʼusi yakal chkʼot ta pasele. «Mu me xanopaj tal liʼi —xi Jeova ta stojolal jun anjel li te ta oʼlol kʼokʼe—. Loqʼueso axonob, yuʼun jaʼ chʼul banamil ti bu vaʼalote.» (Versikulo 5.) ¿Mi la avakʼ venta ti pas ta chʼul li balumile? ¿Kʼu yuʼun? Yuʼun xkoʼolaj te oy li Diose.

¿Kʼu yuʼun yakal chchiʼin ta loʼil Moisés li Diose? Xi laj yalbe srasonal li Jeovae: «Quiloj scotol cʼu xʼelan xcʼuxul svocolic li jteclum cuʼun te ta Egiptoe. Caʼyoj ti xvocoletic ta jtojol ta scoj li bochʼotic tsujvanic ta abtele, xchiʼuc jnaʼoj lec scotol ti cʼu xʼelan chichʼic vocole» (versikulo 7). Jech kʼuchaʼal chkiltike, li Diose muʼyuk la smak sat ta sventa li svokoltak yajtuneltake xchiʼuk muʼyuk bu la smak xchikin sventa mu xaʼibe li s-orasionike, yuʼun kʼuxubaj tajek ta yoʼonton. Yuʼun xi laj yal xtoke: «Jnaʼoj lec scotol ti cʼu xʼelan chichʼic vocole». Jlik livro ti chalbe yaʼyejal kʼusitike, xi chal ta sventa li jpʼel kʼop «jnaʼoj lec» ti xie: «Li jpʼel kʼop liʼe jaʼ skʼan xal ti kʼuxutik ta yoʼontone xchiʼuk ti oy slekil yoʼontone», xi. Li kʼusi albat yuʼun Jeova li Moisese, ta melel chakʼ ta ilel ti oy tajek ta yoʼonton tskʼan tskolta li steklumale.

Jech, li Diose maʼuk noʼox kʼuxubaj ta yoʼonton xchiʼuk ti abol sba laj yil li steklumale, moʼoj, yuʼun lokʼ ta yoʼonton la skolta. Jaʼ yuʼun, la snop tspoj lokʼel ta skʼob j-egiptoetik xchiʼuk ta xikʼ batel «ta yan banamil ti [...] bu chlocʼ ep yaʼlel xchuʼ vacax, xchiʼuc pom[e]» (versikulo 8). Jech oxal, xi laj yalbe Moisés li Jeovae: «Chbat aloqʼues tal ta Egipto li jteclum cuʼune», xut (versikulo 10). Ta sjunul yoʼonton la spas yabtel li Moisese, vaʼun li ta sjabilal 1513 kʼalal maʼuk toʼox jkʼakʼaliltike, la sbeiltas lokʼel li j-israeletike.

Li Jeovae muʼyuk jelem tal. Li tukʼil yajtuneltak avi kʼakʼale xuʼ spat lek yoʼontonik ti yiloj Dios li svokolike xchiʼuk ti ta x-aʼibat s-orasionik kʼalal tskʼanik koltaele. Ta melel, xojtikinbe lek li svokolike. Jech kʼuchaʼal ta voʼnee, chlokʼ ta yoʼonton tskoltaan, maʼuk noʼox te skʼelojbe li svokolike. ¿Kʼu yuʼun? «Yuʼun oy ta yoʼnton tscʼan ta [skolta]» li yajtuneltake (1 Pedro 5:7).

Tspat tajek koʼontontik jkotoltik ti kʼuxutik ta yoʼonton li Jeova Diose. Akʼo mi jpas mulilutik, tskoltautik sventa mas lek sakukutik xchiʼuk ti chʼabal jchopoliltike—xchiʼuk ta xchabiutik (1 Pedro 1:15, 16, Ch). Jaʼ jech chvinaj ta stojolal jun ants yajtsʼaklom Cristo, ti ep laj yakʼ yip ta stsalel li chibajele xchiʼuk li tsatsal at-oʼontonale. Xi chal kʼu to yepal patbat yoʼonton kʼalal la snopilan ta sventa li loʼil ti chalbe skʼoplal li jpets chʼix ti tsanem skʼakʼale. Xi laj yale: «Mi pas ta chʼul yuʼun li balumil taje, xuʼ van jech tspas ta jtojolal ek. Ep la skoltaun snopilanel taje».

¿Mi cha kʼan chavojtikin lek li Jeova Dios ti chʼul tajeke xchiʼuk mi cha kʼan cha kʼot ta yamigo? Taje spas avuʼun, yuʼun li Diose «snaʼoj ti cʼu xʼelan pasbilutique; snaʼ ti lum achʼelutic noʼoxe» (Salmo 103:14).