Li Josiase jaʼ la snop la spas li kʼusi leke
Chanubtaso Avalab Anichʼnabik
Li Josiase jaʼ la snop la spas li kʼusi leke
¿MI VOKOL chavaʼi spasel li kʼusi leke? a... Mi jeche, mu atukuk. Epal krixchanoetik jech chaʼiik, manchuk mi yijik xa. Pe ¿kʼu yuʼun toj tsots ta pasel? Jkʼelbetik skʼoplal li Josiase. ¿Mi xa naʼ buchʼu?...
Li Josiase jaʼ xnichʼon jun chopol ajvalil ta Judá ti jaʼ sbi Amone, li Josiase jaʼo ivokʼ kʼalal vaklajuneb jabil yichʼoj li stote. Li smukʼtot ti Manasés sbie, ep jabil chopol ajvalilaj kʼalal skʼan toʼox xichʼ ikʼel batel ta chukel yuʼun j-asiriaetik li ta namal Babiloniae. Te la skʼanbe perton Jeova, vaʼun akʼe ta perton.
Kʼalal lokʼ li Manasese, lik chaʼajvalilajuk li ta Jerusalene. Ta anil noʼox lik yikta komel li chopol kʼusitik tspase xchiʼuk la skolta li krixchanoetik sventa chtunik ta stojolal li Jeovae. ¿Mi xnop van avuʼun kʼu to yelan laj yaʼi sba kʼalal laj yil ti muʼyuk bu chchanbat yuʼun Amón li kʼusitik lek tspase? Kʼalal taje jaʼo ivokʼ li Josiase. Li Vivliae muʼyuk bu chal kʼu to yepal laj yamigoin sbaik xchiʼuk li Manasese, pe ¿mi mu van lajuk xchanubtas xa naʼ ti toj tsots skʼoplal ti xtun ta stojolal Jeovae?...
Li Josiase vakib toʼox jabil yichʼoj kʼalal cham li Manasese, vaʼun jaʼ och ta ajvalil li Amone. Muʼyuk bu jal x-ajvalilaj, yuʼun laj yichʼ milel yuʼun yajtuneltak kʼalal chib jabil toʼox ajvalilajeme. Ta skoj taje, li Josiase och ta ajvalil te ta Judá kʼalal vaxakib toʼox jabil yichʼoje (2 Crónicas, kapitulo 33). ¿Kʼusi van la spas xa naʼ li Josiase? ¿Mi jaʼ van la xchan li kʼusi la spas stote, o mi jaʼ la xchanbe li kʼusi la spas smukʼtot ti la sutes yoʼontone?...
Manchuk mi bikʼit toʼox li Josiase, snopoj xa onoʼox lek ti chtun ta stojolal Jeovae. Jaʼ yuʼun maʼuk laj yaʼibe sloʼil li yamigotak stote, jaʼ laj yaʼibe smantal li buchʼutik skʼanoj Jeovae. Akʼo mi vaxakib jabil yichʼoj toʼox, snaʼoj ti jaʼ lek ti chaʼibe li buchʼutik skʼanoj Diose (2 Crónicas 34:1, 2). ¿Mi cha kʼan chavojtikin junantik yajtojobtasvanej li Josiase?...
Jun li yajtojobtasvaneje, jaʼ li j-alkʼop Sofoniase. Li Sofoniase jaʼ van yutsʼ yalal sbaik xchiʼuk li Josiase, yaʼeluke li j-alkʼope jaʼ snitilul li ajvalil Ezequiase, stot li Manasese. Kʼalal oy xaʼox jayibuk jabil ch-ajvalilaj li Josiase, li Sofoniase jaʼo la stsʼiba li livro ta Vivlia ti yichʼoj sbie. Li ta livro taje jaʼ te laj yal kʼusi tstaik li buchʼutik tspasik li kʼusi chopole, xchiʼuk lek xvinaj ti laj yakʼ ta mukʼ Josías li kʼusitik laj yale.
Jun ti buchʼu lek kʼusi la xchanbe xtok li Josiase, jaʼ li Jeremiase. Yikʼaluk van oy avaʼioj ta sventa li j-alkʼop taje, yuʼun la stsʼiba jun livro ta Vivlia ek ti yichʼoj sbie. Kerem toʼox xchaʼvoʼalik xchiʼuk nopol bu ichʼiik. Toj ep skʼanoj sbaik, jech oxal kʼalal cham ta letovajel li Josiase, li Jeremiase la spasbe jun kʼejoj ti bu chakʼ ta ilel ti chat tajek yoʼontone (2 Crónicas 35:25). ¡Mu ta naʼeteluk ti la spatbe sba yoʼontonik ta jujuntal sventa tukʼ-o chtunik ta stojolal li Jeovae!
Pe ¿kʼusi xuʼ xa chanbe li Josiase?... Mi muʼyuk yakal chtun ta stojolal Jeova li atot eke, ¿buchʼu van xuʼ xa yalbot ta sventa li Diose? Xuʼ van jaʼ xa sloʼiltabot li ameʼe, junuk amukʼtot o yaya o junuk avutsʼ-avalal. O xuʼ van xa yakʼbot permiso ameʼ sventa xa chan Vivlia xchiʼuk junuk yajtunel Jeova.
Kʼuk yelan li akuxlejale, jaʼ chanbo li Josiase. Jech kʼuchaʼal laj xa kiltike, manchuk mi bikʼit toʼox, lek xaʼox xaʼibe smelolal ti jaʼ noʼox xuʼ saʼ yamigotak li ta yajtuneltak Jeovae. ¡Melel onoʼox ti voʼot eke jaʼ cha nop cha pas li kʼusi leke!
[Tsʼib ta yok vun]
a Mi yakal cha kʼel xchiʼuk jun olol li loʼil liʼe, pajan jlikeluk li bu oy oxib puntoetike xchiʼuk tijbo yoʼonton akʼo yal ta skʼop stuk li sloʼile.
Sjakʼobiltak:
❍ ¿Buchʼu jaʼ stot xchiʼuk smukʼtot li Josiase? ¿Mi lek van yoʼontonik o mi moʼoj?
❍ ¿Kʼusi la sjel ta xkuxlejal li smukʼtot Josiase?
❍ ¿Kʼusi sbi li chib j-alkʼop ti lek kʼusitik la xchanbe li Josiase? ¿Kʼu yuʼun tsots skʼoplal xa naʼ ti oyuk kamigotaktik kʼuchaʼal taje?
[Lokʼol ta pajina 25]
Sventa lek kʼusitik tspas li Josiase, ¿kʼuyelan ikoltavanik li Sofonías xchiʼuk Jeremiase?