Chanubtaseletik Yuʼun Jesús

Li orasionetik ti lek chaʼi Diose

Li Jesuse nopem onoʼox xaʼi spasel orasion ta stuk xchiʼuk laj yalbe akʼo jech spasik li yajchankʼoptake. Xi chal li Vivliae: «Ta yan cʼacʼal ibat scʼopan Dios stuc li Jesuse: Cʼalal ilaj yoʼnton ta scʼopanel Diose, jech iʼalbat yuʼun jun yajchancʼop: “Cajval, chanubtasuncutic ta scʼopanel Dios [...]”. Itacʼov li Jesuse: “Cʼalal chacʼopanic Diose, jech xavalic: «Jtotic Dios, ichʼbiluc ta mucʼ li abie»”» (Lucas 5:16; 11:1, 2). Jaʼ jech laj yakʼ ta ilel ti jaʼ noʼox skʼan jkʼoponbetik li sTote, li Jeovae. Yuʼun jaʼ Jpasvanej kuʼuntik xchiʼuk jaʼ chaʼibutik li jkʼoptike (Salmo 65:2).

¿Mi lek van chaʼi skotol orasionetik li Diose?

Li Diose muʼyuk lek chaʼi mi jaʼ noʼox chkalilan ta j-orasiontik li kʼusi jkomesoj ta joltike. Yuʼun xi laj yal li Jesuse: «Cʼalal chacʼopanic Diose, mu me teuc noʼox liquel-liquel avuʼun cʼusi chavalic» (Mateo 6:7). Ta melel, skʼan xlokʼ ta koʼontontik li kʼusi chkalbetik li jTotik ta vinajele. Jun veltae, li Jesuse laj yal ti muʼyuk  lek chil Dios li s-orasion jun krixchano ti jtoyba, ti jpʼel xal tspas li kʼusi nopem xaʼi tspas li srelijione, laj yal ti jaʼ la lek chilbe s-orasion li jpas mulil krixchano ti sutesoj yoʼontone (Lucas 18:10-14). Jaʼ yuʼun, mi ta jkʼan chaʼi j-orasiontik li Diose, skʼan bikʼit chkakʼ jbatik xchiʼuk kakʼtik persa spasel li kʼusi tskʼanbutike. Li Jesuse xi onoʼox laj yale: «Jaʼ noʼox ta jpas jech chac cʼu chaʼal xchanubtasojun li Jtot ti la stacun tale», xchiʼuk laj yal kʼu yuʼun: «Yuʼun jaʼ ta jpasbe scotol cʼacʼal li cʼusi lec chile», xi (Juan 8:28, 29). Jun veltae xi laj yalbe ta orasion li Diose: «Mu me xcʼot ta pasel cʼusi tscʼan coʼnton jtuc. Jaʼ acʼo cʼotuc ta pasel li cʼusi tscʼan avoʼntone» (Lucas 22:42).

 ¿Kʼusitik xuʼ xkaltik li ta j-orasiontike?

Li Jesuse xi laj yal ta skoj ti chopol kʼoptabil li sbi Diose: «Li voʼoxuque jaʼ jech xacʼopanic Dios chac liʼi: “Jtotic Dios, te oyot ta vinajel, ichʼbiluc ta mucʼ abi. Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele”», xi (Mateo 6:9, 10). Jech xtok, skʼan jkʼantik akʼo taluk li Ajvalilal yuʼun Diose. ¿Kʼu yuʼun? Yuʼun li ajvalil taje jaʼ tstunes Dios sventa xkʼot ta pasel kʼusi tskʼan yoʼonton li ta Balumile xchiʼuk li ta vinajele. Ta yan xtoke, li Jesuse laj yal ti xuʼ jkʼan «jveʼel[tik] ta jujun cʼacʼal[e]», taje jaʼ skʼoplal li jveʼeltike, kabteltike, jnatike, jkʼuʼ jpokʼtike o ti lekukutik noʼox oyutike. Jech xtok, laj yal ti tsots skʼoplal skʼan jkʼanbetik perton Dios ta skoj li jmultike (Lucas 11:3, 4).

¿Mi lek van ti jpastik orasion ta stojolal yantike?

Lek, yuʼun li Vivliae chal ti jech la spas li Jesuse. Jun veltae, «iʼicʼbat tal ololetic ta stojol li Jesuse, yuʼun acʼo yacʼ scʼob ta sbaic xchiʼuc acʼo scʼopanbe Dios ta stojolic» (Mateo 19:13). Xi laj yalbe xtok li jtakbol Pedroe: «Laj xa jcʼopanbot Dios ta atojol, yuʼun jech mu me xchʼay o li xchʼunojel avoʼntone» (Lucas 22:32). LiJesuse chanubtasvan ti skʼan jpastik orasion ta stojolal yantike, xchiʼuk ta stojolal li buchʼutik tsnutsutik o chchopol kʼopoj ta jtojolaltike (Mateo 5:44; Lucas 6:28).

¿Kʼu yuʼun mu stakʼ xkiktatik spasel li orasione?

Li Jesuse la xchʼak skʼakʼal ta spasel orasion xchiʼuk laj yalbe yajtsʼaklomtak «ti tsots scʼoplal li scʼopanel Diose, ti tscʼan mu xʼechʼ yoʼntonique» (Lucas 18:1). Li Jeovae tskʼan akʼo jpat koʼontontik ta stojolal xchiʼuk ti mu xkikta jbatik skʼanbel li kʼusitik mu xi jvay-o yuʼune. «Cʼanic, chaʼacʼbatic», xi li Jesuse. Taje maʼuk skʼan xal ti mu skʼan xaʼibe s-orasion li buchʼutik skʼanojik xchiʼuk yichʼojik ta mukʼ kʼuchaʼal jun Totil ta vinajel li Jeovae. Moʼoj, yuʼun xi rasonaj li Jesuse: «Voʼoxuc ti chopoloxuc onoʼoxe, xanaʼic cʼusi lec chavacʼbeic li anichʼnabique. ¡Buuc xa li Atotic te oy ta vinajele Chʼul Espíritu chacʼbe li bochʼotic ta scʼanique!» (Lucas 11:5-13).

Mi cha kʼanbe to mas yaʼyejale, kʼelo li livro ¿Kʼusi chchanubtasvan ta melel li Vivliae? ta kapitulo 17 a

[Ts’ib ta yok vun]