Li skarta jun krixchano ta Irlandae Chakʼ ta yoʼonton saʼel jun krixchano

TOJ butʼul tajek li osiltike. Tikʼilun batel ta jkaro xchiʼuk ta skoj ti tsots kʼinobale mu xkil lek li osiltike. Li xanav batel vaxaklajuneb kilometro li ta jkaroe, li kʼot ta jun vits, tee lek xvinaj batel ta nom jun bikʼit lum ta smaleb Kʼakʼal Irlanda, li lum taje jaʼ sbi Westport. Jaʼ to un, kʼalaluk jam sat li kʼakʼale lek xa xvinaj ta kʼelel li bikʼtal lumetik kakalik ta nabe. Li ta bikʼtal lumetik taje jutuk mu skotoluk chʼabal jnaklometik. Pe manchuk mi jech, li krixchanoetike chkuch jelavel ta varko xvakaxik sventa te chbat yakʼik veʼuk.

Ta tsʼakale la jkʼel batel tiʼ nab li ta stukʼil smaleb Kʼakʼale. Vaʼun laj kil yan vitsetik ti lek tsoj xchiʼuk kʼonkʼontik xa xvinaj yutsile. Ti vaʼ yelan yutsile jaʼ ta skoj ti chakʼ xojobal mal kʼakʼal li ta jaytos tsʼiʼleletik chchʼi tee. Li ta mas nome, xvinaj Croagh Patrick jun vits ti Reek sbi yuʼunik li jnaklometike. Lik jtsʼot echʼel yan velta li jkaroe, li jelav ta Westport lum, li kayeetik tee bikʼitik tajek xchiʼuk xvoletik tajek te li krixchanoetike, vaʼun la joyobta li vits Reek sbie sventa chi kʼot ti bu mu epuk yajrextikotak Jeova chkʼotike.

Li buchʼu chbat jsaʼe mu snaʼ mi chbat jvulaʼan. Ta jun karta laj yal ti tsjel sna xchiʼuk ti tskʼan vulaʼanel yuʼun jun yajrextiko Jeova sventa mu xikta xchanel li Vivliae. Mu jnaʼ jayib sjabilal, mi oy yajnil, kʼusi tskʼan tsloʼilta... Laj noʼox jnop mi kichʼoj batel jVivlia xchiʼuk yan vunetik li ta jmochilae. La jnop kʼusi van xuʼ jloʼiltabe sventa mas xkʼot ta yoʼonton li aʼyej sventa Ajvalilal yuʼun Diose.

Kʼalal kom xaʼox kuʼun li Reeke ikʼot ta jsat yan alakʼ sba osiltik xtok. Ep tajek latsbil ton la jta —ti mas laj yichʼik pasel kʼalal jaʼo tal Mukʼta Viʼnal ta siglo 19— ti chtun sventa smojonal yosilalike, ta buyuk noʼox xvinaj xchiʼuk chkʼot kʼalal to ta tiʼ nab. Li ta jole te kʼunkʼun xvilet jkot mut. Li ta nome xvinaj bikʼtal teʼetik xchiʼuk chʼixtik ti xchukoj sba skʼobtak, yanaltak xchiʼuk tsʼiʼleletik ti vokol xa tstsʼik yuʼunik yilel li tsatsal ikʼe.

Li ta bikʼit jteklum liʼe —ti chʼabal snumeroal li naetike xchiʼuk ti chʼabal sbi li kayeetike— jnaʼoj ti mu toj kʼunuk ta tael li krixchano ti yakal ta jsaʼe. Kʼajomal noʼox kichʼojbe li sbi snae xchiʼuk li townland bu nakale. a Jech un chaʼa, li buchʼu baʼyel skʼan jtae jaʼ li buchʼu noʼox xojtikin bu nakal skotol li krixchanoetike, jaʼ xkaltik li jpuk kartae. Laj yichʼ oʼlol ora kuʼun saʼel li s-ofisinail koreoe, ti jaʼ noʼox jun  uni bikʼit na ti pakʼal yiloj sbaik ta yan nae. Pe kʼux ta alel, li ta stiʼe oy jlik vun ti «Makal» xie. Pe muʼyuk li chibaj, la jakʼ ta jun tienda xchiʼuk laj yalbikun kʼusitik xuʼ jpas.

Li xanav to batel ta jkaro vaxakib kilometro xtok, vaʼun la jta li senyail laj yalbikune: jun kurva tstikʼ sba batel ta batsʼikʼob xchiʼuk ti chukul tajeke, li ta be taje te chlokʼ batel xtok jun jichʼil be ti tstikʼ sba batel ta tsʼetkʼobe. La jtij jpʼej na ti nopol te oye, lokʼ talel jun uni meʼel ants. Jun yoʼonton tskʼan tskoltaun, lik sloʼiltabun ti te ichʼie. Kʼux ta alel, yuʼun muʼyuk x-al yuʼun bu nakal li vinik ta jsaʼe. Manchuk mi jech, laj yakʼ xi och ta sna sventa tsaʼ batel ta telefono.

Kʼalal yakal chi loʼilajkutike, laj kakʼ venta ti tskʼan tsnaʼ tajek buchʼuune xchiʼuk ti kʼu yuʼun ta jsaʼ li vinik taje. Ta xokon li stiʼ snae oy jun bikʼit slokʼol Virgen xchiʼuk jun smukʼta lokʼol Cristo pakʼal ta skʼal sna, jech xtok oy jun rosario ta sba smexa te ta skosina. Sventa mu teuk-o xnopnun ti kʼu yuʼun ta jsaʼ li vinik taje, li antse laj kalbe ti kichʼojbe batel jun aʼyej ti tsots skʼoplal ti la stak talel yamigotake.

Kʼalal yakal toʼox ta xkʼopoj ta telefonoe, vul li smalale xchiʼuk lik yalbun sloʼilal li jteklume. Li antse muʼyuk la sta ta saʼel ta telefonoe li vinike, jech oxal laj yal ti akʼo to jmalae, yuʼun ta xkʼopoj yan velta. Pe muʼyuk buchʼu xojtikin yileluk li vinike xchiʼuk li nae. La jkʼel li jreloje, vaʼun laj kʼakʼ venta ti toj bat xa kʼakʼale. La jnop ti jaʼ lek mas to tsʼakal chtal jsaʼ xtoke. Kolaval xkutik komel li vinik xchiʼuk yajnile, li muy li ta jkaroe xchiʼuk li sut batel ta jna.

Kʼalal echʼ jun xemanae bat jsaʼ xtok, li avie la jta li jpuk kartae. Laj yalbun kʼuxi xuʼ jta, la jchʼun batel, voʼlajuneb minuto la jtsʼot batel li jkaroe, li kʼot ta jun tijera, vaʼun jaʼ la jtam batel li be ta tsʼetkʼobe. Xi yal xi muy li ta jichʼil bee, pe muʼyuk la jta li voʼneal bakʼo pasbil ta tone, ti jaʼ xaʼox xchibal senyail laj yakʼbikune. Jaʼ noʼox la jta li slajebal senyaile. Kʼalal li kʼot ta sba vitse, jaʼ te la jta li na ti toj jal xaʼox la jsaʼe xchiʼuk ti toj vokol la jtae.

Baʼyel la jnop jlikeluk kʼuxi ta jlikes li jloʼile, tsʼakal to la jtij li nae. Lokʼ tal jun mol, laj yalbun ti maʼuk te nakal li vinik ta jsaʼe, la xbech kʼobta yan na ti te oy ta spat jvokʼ teʼetike. Labal tajek kaʼi, bat jtij li na taje. Kʼalal yakal ta jmala chtal sjamik li nae, la jkʼupin skʼelel alakʼ sba osil ta océano Atlántico ti ta jayibuk xa noʼox metro oye. Tsatsajem xaʼox li ikʼe, jaʼ yuʼun li yok nabe tsots tsmaj li tiʼ nabe. Mi junuk krixchano te, mi jaʼuk li ta na bu yakal ta jmalae.

Ta yoxibal to velta la sjambun tiʼna jun kerem. Li kereme xi laj yalbune: «Li na cha saʼe jaʼ liʼe, pe li vinike bat xa saʼ yan sna, pe mu jnaʼ bu to bat», xi yutun. Laj yalbun xtok ti muʼyuk bu xchiʼinoj-o ta loʼil junuk velta li yajrextikotak Jeovae. Jun veltae laj la ta elekʼ, vaʼun te la lik sjakʼbe sba tal kʼu yuʼun chakʼ oyuk vokolal li Diose. Ta sjunul yoʼonton la xchʼam li achʼ revista ¡Despertad! xchiʼuk Li Jkʼel osil ta toyole ti jaʼ chalbe smelolal ta sventa taje.

Li Vivliae chal ti yajtsʼaklomtak Cristoe akʼo lek yakʼ ta yoʼontonik saʼel li krixchanoetik ti tskʼan chnopajik ta stojolal Diose. Chkal voʼone mu jecheʼuk noʼox la jchʼay jkʼakʼal manchuk mi muʼyuk la jta li vinike. Li ta Irlandae oy to krixchanoetik ti tskʼan chchanik ta sventa li Ajvalilal yuʼun Dios kʼuchaʼal li kerem taje. Jaʼ yuʼun lek jpatoj koʼonton ti chakʼbutik sbendision Jeova ti chkakʼbetik yipal ta stsʼunel ta yoʼonton krixchanoetik li sKʼop Diose.

[Tsʼib ta yok vun]