¿Mi anaʼoj xa?

¿Mi oy srasonal yuʼun ti la xiʼta li mukʼta ajvalil César li Poncio Pilatoe?

Li jnitvanej judioetike tskʼanik akʼo yakʼ ye li ajvalil Poncio Pilato sventa xichʼ milel li Jesuse. Sventa tsujike, xi laj yalbeike: «Me chacolta batel li vinic leʼe, mu coʼoluc avoʼnton achiʼuc li mucʼta ajvalil Cesare», xiik (Juan 19:12). ¿Buchʼu jaʼ skʼoplal li César taje? Jaʼ skʼoplal Tiberio, li ajvalil ta Romae. Pe ¿mi oy junuk srasonal ti la xiʼta Tiberio li Poncio Pilatoe?

Jkʼelbetik kʼu toʼox yelan stalelal li Tiberio Cesare. Kʼalal laj yichʼ chapanel li Jesuse, li Tiberioe oy xa onoʼox jayibuk jabil ti «jaʼ xa onoʼox jun vinik ti jaʼ noʼox tsaʼ li kʼusi oy ta yoʼontone xchiʼuk ti mu xa sventauk mi toj chopol kʼusi tspas sventa stae», xi chal li The New Encyclopædia Britannica. Jech noxtok, ta skoj ti ta xchʼun li kʼusi chil o chaʼie tsots laj yakʼanbe svokol xchiʼuk la smil li buchʼutik oy xa kʼusi chopol chnopbat skʼoplal chaʼie. Xi to chal li vun taje: «Mi melel li kʼusi chalik li j-al-loʼiletik ta voʼnee, li Tiberioe lek xaʼi jaʼ xchʼay-o yoʼonton li kʼusitik toj echʼ xa noʼox chopolik xchiʼuk kʼexlalik sbae. Xuʼ xkaltik xtok ti jaʼ bankilal jmilvanej ti buchʼuuk noʼox smile xchiʼuk ti buyuk noʼoxe».

Mu labaluk ta aʼyel un chaʼa, ti jaʼ xiʼo Pilato ti kʼu yelan ojtikinbil stalelal li ajvalile, jech-o xal laj yakʼ ye xichʼ milel Jesús kʼalal laj yichʼ sujel yuʼun li judioetike (Juan 19:13-16).

¿Kʼu yuʼun la spokbe yok yajtakboltak li Jesuse?

Li ta voʼneal Israele, epal krixchanoetik chʼabal onoʼox xonobik kʼalal chanavike. Akʼo mi jech, oy buchʼutik tstunesik kʼuchaʼal varachil ti timajtik jaypʼejuk yakʼil ti syakoj sba ta akanil xchiʼuk ta snukʼ okile. Ta skoj ti oy tajek pukuk xchiʼuk achʼel li ta bebetik xchiʼuk ta osiltike, solel ta x-ikʼub li yokike.

Jaʼ yuʼun nopem xaʼiik ta slokʼ xonobik kʼalal ch-ochik ta nae. Jech noxtok, li yajval nae —o jaʼ li smosoe— jaʼ skʼelobil ti lek yoʼonton kʼalal tspokbe yok li yajvulaʼaltake. Li Vivliae oy jayib velta ta xalbe skʼoplal li kʼusi nopem xaʼiik taje. Jech kʼuchaʼal kʼalal la xchʼam yajvulaʼaltak ta skarpana li Abrahame, xi laj yale: «Ta xquichʼ tal jlecʼuc voʼ ta jpocboxuc avacanic. Tsʼacal xuʼ chacuxic to jliqueluc ta yolon teʼ. [...] Chbat quichʼboxuc tal jutuc aveʼelic yuʼun jech mu xaʼalubic ta be ti bu chabatique» (Génesis 18:4, 5; 24:32; 1 Samuel 25:41; Lucas 7:37, 38, 44).

Taje ta xakʼ jnaʼtik ti kʼu yuʼun Jesús la spokbe yok yajtakboltak li ta slajeb kʼin Koltael la spasike. Chʼabal te yajval li na taje, mi jaʼuk li smosoe, xchiʼuk muʼyuk lokʼ ta yoʼontonik tspasik jech li yajtsʼaklomtak Jesuse. Jaʼ yuʼun kʼalal la stsak li pokob-kʼobal ti oy yaʼlele xchiʼuk li pokʼ sventa tspokbe xchiʼuk tstakijesbe yok li yajtakboltake, li Jesuse laj yakʼ ta chanel kʼuxi akʼo skʼan sbaik xchiʼuk kʼuxi bikʼit skʼan xakʼ sbaik (Juan 13:5-17).