2 Ojtikino lek li Diose

«Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote.» (Juan 17:3)

¿KʼU YUʼUN XUʼ VOKOL TA PASEL? Yuʼun li jeltos kʼuyelan xchʼunojik ta sventa Diose tsvalopatin sba. Epal krixchanoetike chalik ti muʼyuk li Diose. Yantike chalik ti jaʼ noʼox jaʼ la jun mukʼta tsatsal juʼelal ti muʼyuk kuxule. Xchiʼuk oy buchʼutik chalik ti jaʼ jun pʼijil kuxlejale, pe mu smojin skʼopik buchʼu jaʼ xchiʼuk kʼuyelan.

¿KʼUXI XUʼ XKOJTIKINTIK LEK LI DIOSE? Li jtakbol Pabloe xi laj yale: «Ta xvinaj ti oy jun Dios ta sventa ti yabtel spasojane. Cʼalal lic meltsajuc talel ti banomile, xvinaj lec ta qʼuelel oy ti Diose, ti sbatel osil muʼyuc stsutseb ti oy smucʼul stsatsale» (Romanos 1:20, Ch). Jaʼ yuʼun, jtos ti kʼuyelan xuʼ xkojtikintik lek li Diose jaʼ kʼalal ta jkʼeltik li kʼusitik spasojane. Kʼalaluk ta jkʼeltik li kʼusitik oy liʼ ta Balumile ep ta jchantik ta sventa li spʼijil xchiʼuk sjuʼel li Jpasvaneje (Salmo 104:24; Isaías 40:26).

Pe, mi ta jkʼan chkojtikintik mas li Diose oy to kʼusi skʼan jpastik: skʼan jam  jVivliatik xchiʼuk jkʼel jtuktik. Mu xkakʼtik ti jaʼ kʼusuk xa noʼox jchʼuntik yuʼun li yantike. Skʼan jchanbetik skʼoplal jtuktik. Jaʼ jech chalbutik li sKʼop Diose: «Mu me xachanbeic stalel li cristianoetic liʼ ta banamile. Jaʼ tscʼan chjel batel atalelic li voʼoxuque, jech ch-achʼub batel li cʼusi chanopique, jech chlic avotquinic batel cʼusi tscʼan li Diose, jaʼ li cʼusitic lec chile, li cʼusitic tuqʼue» (Romanos 12:2). Jaʼ yuʼun chaʼa, tsots me skʼoplal ti jchan jtuktik li kʼusi chal Vivlia ta sventa Diose. Jkʼeltik junantik skʼelobil.

Li Diose oy sbi. Kʼalal laj yichʼ tsʼibael li sKʼop Diose oy toʼox jaymiluk ta velta te tsʼibabil li sbi Diose, xchiʼuk li avie oy yan Vivliaetik ti jutuk mu skotoluk velta jech chiktaik eke, jech kʼuchaʼal li Reina-Valerae. Yantik xtoke, kʼuchaʼal li Torres Amat sbie ta stunesik ta junantik tekstoetik, jech kʼuchaʼal li ta Salmo 82:19 (83:18 ta yan Vivliaetike, yan xtoke ta Éxodo 3:14, ta tsʼib ta yok vun), xi chale: «Akʼo snaʼik ti xa ta-o ti jaʼ abi Kajvaltik, o Jeovae, xchiʼuk ti voʼot noʼox atuk ti Toj Toyol Oyot ta sba spʼejel li balumile».

Li Jeova Diose chkʼot ta yoʼonton xchiʼuk xuʼ chopol o lek chaʼi sba ta skoj li kʼusitik ta jpastike. Jaʼ jech chakʼ ta ilel li kʼusi la spas j-israeletike, ti ep ta velta muʼyuk la xchʼunbeik smantal Jeova akʼo mi pojatik lokʼel ta mosoil li ta Egiptoe. ¿Mi chopol van laj yaʼi Jeova li kʼusi la spasike? Chopol, yuʼun li Vivliae chal ti «laj soquesbeic yoʼnton [...] li Chʼul Dios yuʼun Israele» xchiʼuk «laj yacʼbeic yat yoʼnton» (Salmo 78:40, 41).

Oyutik ta yoʼonton ta jujuntal li Jeovae. Taje jech laj yakʼ ta aʼyel Jesús kʼalal xi laj yalbe li yajtsʼaklomtake: «Xanaʼic ti jun centavo noʼox stojol ta chaʼcot li bicʼtal mutetique. Pero me jcotuc mu xbaj yalel ta banamil me mu jechuc tscʼan li Jtotique. Li voʼoxuque cʼalal ta stsotsil ajolic lec atbil. Jaʼ yuʼun mu me xaxiʼic. Yuʼun voʼoxuc echʼem tsots acʼoplalic jech chac cʼu chaʼal li bicʼtal mutetique» (Mateo 10:29-31).

Li Diose mu spʼaj ta skoj noʼox ti jelel stsʼunbalik o stalel xkuxlejalik li krixchanoetike. Koʼol chilutik jkotoltik li stuke, yuʼun jech kʼuchaʼal laj yalbe li buchʼutik likemik ta Atenas li Pabloe, «li Diose jchop noʼox stsʼunubal la spas li jaychop cristianoetique, yuʼun jech acʼo naquiicuc ta scotol banamil». Jech noxtok, ta skoj ti «mu nomuc oy ta jtojoltic jujunuti[ke]», jkotoltik xuʼ xi jnopajutik ta stojolal (Hechos 17:26, 27). Li jtakbol Pedroe xi jamal laj yale: «Muc tʼujbiluc bochʼo chcʼuxubin li Diose. Buyuc noʼox banamilal oy li cristianoetique lec ta xʼilatic yuʼun Dios me ta xichʼic ta muqʼue, me tspasic cʼusi tuqʼue» (Hechos 10:34, 35).

¿KʼUSITIK SBALIL CHICHʼ TAEL? Maʼuk me jechutik kʼuchaʼal li krixchanoetik ti «scotol yoʼnton tscʼan chtunic yuʼun Diose, pero mu snaʼbeic smelol cʼu xʼelan xuʼ chtunic yuʼun[e]» (Romanos 10:2). Mi xkojtikintik li kʼusi chchanubtasvan ta melel li Vivlia ta sventa li Jeovae, muʼyuk buchʼu xuʼ xi sloʼlautik. Jaʼ noʼox jech xuʼ chi jnopaj ta stojolal li Diose (Santiago 4:8).

Mi cha kʼanbe to mas yaʼyejale, kʼelo li kapitulo 1 ta livro ¿Kʼusi chchanubtasvan ta melel li Vivliae?, a ti bu chal «¿Kʼusi jaʼ li melel ta sventa li Diose?».

[Tsʼib ta yok vun]

[Lokʼol ta pajina 6]

Jtos ti kʼuyelan xuʼ xkojtikintik li Diose jaʼ mi la jkʼeltik li kʼusitik spasojane