4 Sabo smelolal li kʼusi vokol chavaʼi ta chʼunele

«¡Muʼyuc to lec xchʼunojel avoʼnton! ¿Cʼu yuʼun chloʼilaj avoʼnton?» (Mateo 14:31)

¿KʼU YUʼUN XUʼ VOKOL TA PASEL? Li yajtsʼaklomtak Cristo ta voʼnee oy to kʼusi vokol laj yaʼiik ta chʼunel bakʼintik ek (Mateo 14:30; Lucas 24:36-39; Juan 20:24, 25). Yuʼun noxtok, li Vivliae chal ti mi chʼabal xchʼunel koʼontontike jaʼ la «li mulil chispajesutique» (Hebreos 12:1). Li jtakbol Pabloe xi laj yal eke: «Yuʼun mu onoʼox scotoluc ta xchʼunic» (2 Tesalonicenses 3:2). Pe taje maʼuk skʼan xal ti oy buchʼutik mu xuʼ xchʼies li xchʼunel yoʼontonike. Ti kʼusi chkʼot ta pasele jaʼ ti mi jutuk chakʼ yipik xchʼiesele. Pe kʼalal oy buchʼu chakʼ yip ta xchʼiesel li xchʼunel yoʼontone, chkoltaat yuʼun li Diose.

¿KʼUSI XUʼ XA PAS SVENTA XA SABE SMELOLAL LI KʼUSI VOKOL CHAVAʼI TA CHʼUNELE? Baʼyele, kʼelo li kʼusitik vokol  chavaʼi ta chʼunele. Jech kʼuchaʼal li jtakbol Tomase vokol toʼox chaʼi ta chʼunel mi chaʼkuxiem xaʼox ta melel li Jesuse, akʼo mi chalik yantik yajtsʼaklom Cristo ti laj xaʼox yilike. Pe li stuke tskʼanbe to mas sprevail. Li Jesuse laj yakʼbe li sprevailtake, vaʼun tsatsub xchʼunel yoʼonton li Tomase (Juan 20:24-29).

Li kʼusitik vokol chkaʼitik ta chʼunele chakʼbutik stakʼobiltak ta Vivlia li Jeova Diose. Jkʼelbetik skʼoplal jun sjakʼobil ti xchʼayojbe xchʼunel yoʼonton epal krixchanoetike: «¿Mi jaʼ van ta smul jutuk o mi jaʼ ta smul skotol Dios li pas kʼopetike, li majbaile xchiʼuk li vokolil oy ta balumile?». Jkʼeltik kʼusi chal Vivlia ta sventa taje.

Li Diose maʼuk tspas mantal liʼ ta balumile. Li Jesuse laj yal ta melel ti «banquilal jpasmantal liʼ ta banamile» jaʼ li Satanase, jun kuxlejal ti mu xvinaj ta kʼelel ti toj chopole (Juan 14:30). Jun veltae, li Satanase laj yalbe Jesús ti chakʼbe «scotol li mucʼtic lumetic liʼ ta [balumil]» mi la skejan sba ta stojolale xchiʼuk mi laj yichʼ ta mukʼe. Xi laj yalbee: «Voʼot ta xcacʼbot scotol li svuʼelic, li slequilalic leʼ chaqʼuel batele. Yuʼun vuʼun acʼbilun jventain, jech xuʼ chcacʼbe ec li bochʼo ta jcʼan chcacʼbee». Pe li Jesuse, xi la stakʼbee: «Jech tsʼibabil ta scʼop Dios: “Jaʼ noʼox xavichʼic ta mucʼ stuc li Cajvaltique, jaʼ li Dios avuʼune, jaʼ noʼox xaquejan aba ta stojol”», xut (Lucas 4:5-8). Jech kʼuchaʼal chkiltike, li Jesuse jamal laj yal ti jaʼ tspas mantal liʼ ta balumil li Satanase. Jaʼ yuʼun, maʼuk smul Dios li vokoliletike, jaʼ smul li Satanás xchiʼuk li ajvaliletik ta balumile (Apocalipsis 12:9, 12).

Li Jeovae poʼot xa tslajes li vokoliletike. Li Diose svaʼanoj xNichʼon, jaʼ xkaltik li Jesucristoe, sventa ch-och ta Ajvalilal yoʼ tspas ta mantal li krixchanoetike (Mateo 6:9, 10; 1 Corintios 15:20-28). Xchiʼuk jech kʼuchaʼal laj onoʼox yal Vivliae, li lekil aʼyej taje yakal chichʼ pukel batel ta spʼejel Balumil (Mateo 24:14). Li Ajvalil taje, poʼot xa slajes li yajkontratake xchiʼuk li vokoliletike, jech kʼuchaʼal chichʼ bulel jun chopol tsʼiʼlel kʼalal to ta yibele (Daniel 2:44; Mateo 25:31-33, 46; Apocalipsis 21:3, 4).

¿KʼUSITIK SBALIL CHICHʼ TAEL? Jech kʼuchaʼal chal Vivliae, li buchʼutik oy kʼusi vokol-o chaʼiik ta chʼunele xkoʼolajik «jech chac cʼu chaʼal [li] cʼusi cuchbil noʼox ta iqʼue», ti chichʼik loʼlael ta jecheʼ chanubtasel yuʼun li jloʼlavanejetike (Efesios 4:14; 2 Pedro 2:1). Pe li buchʼutik tsabeik stakʼobil li kʼusi vokol chaʼibeik smelolale chkoltaatik sventa xuʼ «jʼechʼel me oyuc o xchʼunojel [y]oʼntonic» (1 Corintios 16:13).

Li yajrextikotak Jeova ti tslokʼesik li revista liʼe, xmuyubajik ta skoltaot sventa tstakʼboxuk li kʼusi vokol chavaʼi ta chʼunele xchiʼuk sventa xa chʼies li xchʼunel avoʼontone. Chkalbotkutik ti xa chiʼinan ta loʼile xchiʼuk xa kʼel atuk li kʼusitik chchanubtasvanike. Mi jech cha pase, chavakʼ venta ti tstsatsub tajek li xchʼunel avoʼonton ta stojolal Diose.

Mi cha kʼanbe to mas yaʼyejale, kʼelo li kapitulo 8 xchiʼuk 11 ta livro ¿Kʼusi chchanubtasvan ta melel li Vivliae?, a ti bu chal «¿Kʼusi jaʼ li Ajvalilal yuʼun Diose?» xchiʼuk «¿Kʼu yuʼun yakʼoj to oyuk vokolil li Diose?».

[Tsʼib ta yok vun]

[Lokʼol ta pajina 9]

Li buchʼutik tsabeik stakʼobil li kʼusi vokol chaʼibeik smelolale, tstsatsubtas li xchʼunel yoʼontonike