Jun totil sventa li buchʼu chamem stot o smeʼe
Nopajan ta stojolal Dios
Jun totil sventa li buchʼu chamem stot o smeʼe
«L I Dios ti nacal ta xchʼulnae; jaʼ stotic cʼotem li bochʼotic muʼyuc xa stot smeʼique.» (Salmo 68:5.) ¡Li ta teksto liʼe te chvinaj ti toj echʼ xa noʼox lek yoʼonton li Jeova Diose! Jech onoʼox ta melel, yuʼun chchabi xchiʼuk tskolta li buchʼutik oy svokolike, ti te kapal skʼoplal li buchʼutik chamem stot o smeʼike. Li Mantal ti laj yakʼbe Jeova li j-israeletike te chakʼ ta ilel ti oy tajek ta yoʼonton li ololetik taje. Jkʼeltik ta Éxodo 22:22-24, ti bu baʼyel velta laj yichʼ albel skʼoplal li «meʼon ololetique». a
Xi toʼox chpʼijubtasvan li Mantale: «Mu me xavutsʼintaic li [...] meʼon ololetique» (versikulo 22). Li kʼusi laj yal Dios taje mu jaʼuk noʼox laj yalbe mi tskʼan chchʼunik li j-israeletike, moʼoj, laj yalbe ti skʼan chchʼunike yuʼun jaʼ jun mantal. Li ololetik ti chcham stot o smeʼike chʼabal xa buchʼu xkʼelatik, muʼyuk xa buchʼu xmakʼlinatik xchiʼuk xchabiatik. Jaʼ yuʼun, mu «xavutsʼintaic», xi li Diose —o jech kʼuchaʼal chal yan Vivliaetike akʼo mu xichʼ «ilbajinel» o «akʼbel svokol»— li ololetik ti chamem stot o smeʼike. Jkʼeltik kʼu to stsatsal skʼoplal chil li Diose.
«Me abul sba avuʼunique, —xi chal Jeova li ta smantale—, chiscʼanbicun vocol ta jtojol, jaʼ ta jcoltaic ta xcaʼibe li scʼopique.» (Versikulo 23.) Li ta voʼneal tsʼib ta Hebreo kʼope, li ta versikulo 22 la stunes ta plural li jpʼel kʼop «voʼot» xie, yan li ta versikulo 23 ta singular la stunes. Jech taje, li ta voʼneal tsʼib ta Hebreo kʼope chakʼ ta ilel ti ta jujuntal li krixchanoetike xchiʼuk ta komon li jteklume, skʼan xchʼunik li smantal Dios taje. Jaʼ jech laj yal ti skotolik —ta jujuntal o ta komon— skʼan chchʼunik li mantale. Jech xtok jamal ta ilel ti Jeovae chil li kʼusi chkʼot ta pasele: chaʼibe mi xvokolet li uni olol ti chʼabal stot o smeʼe xchiʼuk oy ta yoʼonton tskolta ta kʼusiuk noʼox ora (Salmo 10:14; Proverbios 23:10, 11).
¿Kʼusi van chkʼot ta pasel mi chilbajinik junuk olol ti chʼabal stot o smeʼ xchiʼuk ti xvokolet tskʼanbe koltael Jeovae? «Me jech chapasique, chiʼilin ta atojolic; —xi chal li Jeovae—, ta xcacʼoxuc ta milel ta espada.» (Versikulo 24.) Jlik livro ti chalbe skʼoplal Vivliae, xi chal ta sventa li jpʼel kʼop liʼe: «Jaʼ jpʼel kʼop ti chakʼ ta ilel mukʼta ilinele» xchiʼuk jaʼ skʼan xal «chkʼakʼub li jniʼe». Jech xtok, li buchʼu oy ta sba yakʼbel kastigo li buchʼu chilbajin li uni olol ti mu snaʼ spoj sbae, maʼuk junuk jchapanvanej ta Israel, moʼoj, jaʼ stuk li Diose (Deuteronomio 10:17, 18).
Li Jeovae mu xjel-o yoʼonton (Malaquías 3:6). Li avi kʼakʼale kʼux-o ta yoʼonton li ololetik ti chamem stot o smeʼike (Santiago 1:27). Mu me xchʼay xkaʼitik, mi chkilbajintik li ololetik ti chʼabal stot o smeʼike, oy me srasonal ti ch-ilin li Totil sventa li buchʼutik chamem stot o smeʼike. Li buchʼutik chilbajinik li olol ti mu snaʼ spoj sbae mu me xkolik li ta «scʼacʼal yoʼnton Mucʼul Diose» (Sofonías 2:2). Chaʼiik stukik ti «¡toj xiʼbal me sba me lijʼoch xaʼox ta scʼob li cuxul Diose!» (Hebreos 10:31).
[Tsʼib ta yok vun]
a Li jpʼel kʼop liʼe te van 40 ta velta oy li ta Vivliae. Manchuk mi jaʼ noʼox chalbe skʼoplal keremetik li ta voʼneal hebreo kʼope, li sMantal Moisese jtunelik ek sventa tspakbe skʼoplal sderechoik li tsebetik ti chcham stot o smeʼike (Números 27:1-8).