Kʼalal ta jnup jbatik xchiʼuk ikʼe

KʼALAL la sloʼiltabe skʼoplal li kʼusi la snupik li yajtsʼaklomtak Jesuse, ti jaʼo kʼalal vokol tajek ta xtuchʼik jelavel ta jun kanova li nab ta Galileae, li Marcos ti laj yalbe skʼoplal Jesuse chal ti «lubemic xa ta xanubtasel li canavae yuʼun ta snup sbaic schiʼuc li iqʼue». Kʼalal te toʼox oy ta tiʼnab li Jesuse, laj yil kʼuyelan oy li svokolike vaʼun ta sjuʼel Dios ixanav batel ta banab sventa chbat sta li yajtsʼaklomtake. Kʼalal och xchiʼin ta yut kanovae, jech ta ora ichʼabi li ikʼe (Marcos 6:48-51, Achʼ Testamento, ta skʼop San Andrés).

Li jtsʼibajom Marcose laj yal xtok ti jun veltae, kʼalal mu toʼox xkʼot ta pasel taje, «ilic tsots icʼ, tsots la syuqʼuilan li nabe». Li Jesuse «la spajes li iqʼue [...] ta ora ichʼabi o li iqʼue; batsʼi lec lamal icom scotol» (Marcos 4:37-39).

Manchuk mi mu xkiltik tana skʼelobiltak sjuʼel Dios kʼuchaʼal taje, oy kʼusitik lek xuʼ jchantik te. Ta skoj ti jmulavil krixchanoutike xchiʼuk ti xibal sba kʼusitik chkʼot ta pasel li avi kʼakʼale, mu xi jkol yuʼun li vokoliletike (2 Timoteo 3:1-5). Jech noxtok, bateltike xuʼ van xkoʼolaj ta mukʼta tsatsal ikʼal voʼ chkaʼitik li xkʼuxul jvokoltik ta jujuntale. Manchuk mi jech, ta jtatik koltael. Xi chalbutik li Jesuse: «Laʼic ta jtojol acotolic, voʼoxuc ti lubenoxuc yuʼun li tsatsal abtele, xchiʼuc li alal icatsile, vuʼun ta xcacʼ acux avoʼntonic», xi (Mateo 11:28).

Kʼalal mi lubemutik xa ta xanubtasel jkanovatik ta skoj ti ta jnuptik vokoliletik ti jech stsatsal kʼuchaʼal ikʼe, xuʼ jtatik spatel koʼontontik. ¿Kʼuxi? Jaʼo mi la jpat koʼontontik li ta kʼusitik yaloj tspas Diose (koʼoltaso xchiʼuk Isaías 55:9-11; Filipenses 4:5-7).