La skolta sjuntot sventa mu xlaj ta milel
Chanubtaso avalab anichʼnabik
La skolta sjuntot sventa mu xlaj ta milel
¿MI ANAʼOJ ti oy toʼox jlom yutsʼ yalal Pablo ti jaʼik yajtsʼaklom Cristoe? a... Li xvixe xchiʼuk li sjunichʼone yakal xaʼox tstsʼakliik li Cristoe. Mu jnabetik sbiik, pe li kʼusi jnaʼtike jaʼ ti tsots tajek yoʼonton li sjunichʼone. ¿Kʼu yuʼun jech chkaltik taje? Yuʼun jun veltae la skolta li sjuntot sventa mu xlaj ta milele. ¿Mi cha kʼan cha jloʼiltabot kʼusi kʼot ta pasel?...
Jaʼ xa sjabilal 56, li Pabloe naka to sut talel ta Jerusalén, yoxibal xa velta ay xchol mantal kʼuchaʼal misionero. Tee laj yichʼ chukel yuʼun li j-abteletike xchiʼuk kʼot ta nopel yuʼunik ti chchapanike. Pe li yajkontratake mu skʼanik ti xichʼ chapanel li Pabloe, moʼoj, yuʼun tskʼan tsmilik. Li kʼusi snopojike jaʼ ti ta nakʼal chbat 40 krixchanoetik sventa tsmilike.
Mu jnaʼtik kʼuxi, pe li sjunichʼon Pabloe kʼot ta xchikin li kʼusi tskʼan tspasik li judioetike. ¿Kʼusi van la spas xa naʼ?... Bat yalbe li sjuntote. Li Pabloe ta anil la stak ta ikʼel li bankilal soldadoe, xi laj yalbee: «Icʼo batel ta stojol mero banquilal soldado li querem liʼi yuʼun oy yaʼyej ta xalbe», xut. Jech oxal li bankilal soldadoe laj yikʼ batel ta stojolal li mero bankilal soldado Claudio Lisiase xchiʼuk kʼot yalbe ti oy kʼusi tsots skʼoplal chloʼiltabat yuʼun li kereme. Li mero bankilal soldadoe laj yikʼ lokʼel jutuk li kereme, vaʼun li kereme lik yal skotol.
Li Claudio Lisiase xi lik yalbee: «Mu me bochʼo xavalbe li cʼusi laj avalbune». Ta tsʼakale la stak ta ikʼel chib bankilal soldado xchiʼuk laj yalbe ti akʼo xchapanik 200 soldadoetik, 70 buchʼutik kajajtik ta kaʼ xchiʼuk 200 ti buchʼutik oy slansaike sventa xikʼik batel ta Cesarea li Pabloe, ti bu oy li ajvalil yuʼun Roma ti Felics sbie. Li 470 soldadoetik ti lokʼik batel ta baluneb ora ta akʼobaltik xchiʼukik li Pabloe, lek kʼot yuʼunik ta stojolal li Felicse. Li Claudio Lisiase la stakbe batel jun karta li ajvalile, li ta karta taje chal ti tskʼan tsmilik Pablo li judioetike.
Li judioetike persa xa chbatik kʼalal to ta Cesarea lum sventa chbat stikʼbeik smul li Pabloe. Pe mu x-akʼ yuʼunik ta ilel mi melel li kʼusi chalike. Manchuk mi jech, chib jabil ta jecheʼ noʼox laj yichʼ tikʼel ta chukel li Pabloe. Jech oxal, la skʼan chichʼ chapanel ta Roma, vaʼun ta mas tsʼakale te laj yichʼ ikʼel batel (Hechos 23:16–24:27; 25:8-12).
Tana un, ¿kʼusi xuʼ jchantik ta skoj ti kʼusi la spas li sjunichʼon Pabloe?... Mi oy kʼusi jnaʼojtik ti xuʼ xkol-o ta milel jun krixchanoe, skʼan me tsotsuk koʼontontik xchiʼuk akʼo kaltik. Taje jech la spas li Jesuse. Manchuk mi snaʼoj ti tskʼan chmilat yuʼun jlom krixchanoetike, tsots yoʼonton laj yalbe skʼoplal li Ajvalilal yuʼun Diose. Li stuke lek snaʼoj ti jaʼ te tsta xkuxlejal li krixchanoetike, jech oxal laj yalbutik mantal ti akʼo kakʼbetik yojtikin yan krixchanoetik ek li voʼotike. ¿Mi cha kʼan cha chʼunbe smantal li Jesuse?... Mi jeche chaʼa, skʼan me tsots avoʼonton xa pas aba, jech kʼuchaʼal la spas li sjunichʼon Pabloe (Juan 7:1; 15:13; Mateo 24:14; 28:18-20).
Jun veltae, li Pabloe la stojobtas jun yamigo ti kerem toʼoxe, jaʼ sbi Timoteo, xi laj yalbee: «Qʼuelo me aba atuc, xchiʼuc qʼuelo me lec ti cʼu xʼelan chachanubtasvane. Jaʼ me te oyuc o ta avoʼnton scotol li cʼusitic laj calbote. Me jech chapase, chacol li voʼote xchiʼuc li bochʼotic ta xaʼibot acʼope» (1 Timoteo 4:16). Ta melel, taje jech la spas li sjunichʼon Pabloe. ¿Mi jech van tsots avoʼonton cha pas ek?
[Tsʼib ta yok vun]
a Mi yakal cha kʼel xchiʼuk jun olol li loʼil liʼe, pajan jlikeluk li bu oy oxib puntoetike, xchiʼuk tijbo yoʼonton akʼo yal ta skʼop stuk li sloʼile.
Sjakʼobil:
❍ ¿Kʼusi xuʼ xkaltik ta stojolal jlom yutsʼ yalal li Pabloe?
❍ ¿Kʼusi la spas li sjunichʼon Pablo sventa mu xlaj ta milel li sjuntote?
❍ ¿Kʼusi mantal laj yakʼbutik Jesús sventa tsta xkuxlejal li krixchanoetike?