Chanubtaseletik yuʼun Jesús

Li «slajebal cʼacʼale»

¿Kʼusi jaʼ li «slajebal cʼacʼale»?

Jun veltae xi jakʼbat yuʼun yajtsʼaklomtak li Jesuse: «¿Kʼusi senyail ti liʼ xa oyote xchiʼuk li slajebal kʼusitik chkʼotanuk ta pasele?», o «slajebal [kʼakʼal]» xi ta yan Vivliaetike (Mateo 24:3, NM). Li ta stakʼobil laj yal Jesuse muʼyuk bu laj yakʼ ta aʼyel ti jaʼ chlaj li Balumile. Li stuke stunesoj xa onoʼox li kʼopetik liʼe: «Kʼusitik chkʼotanuk ta pasel», o li «slajebal cʼacʼale». Taje jaʼ sventa chichʼ albel skʼoplal li kʼusitik chkʼotanuk ta pasel ta balumil —sventa politika, kʼusitik ta sventa pʼolmal xchiʼuk relijion— ti jaʼ oy ta skʼob li Satanase (Mateo 13:39, 40, 49). Jaʼ yuʼun kʼalal laj yal li albil kʼop: «Jaʼ to ta xtal li slajebal [kʼakʼal]», xie, jaʼ laj yalbe skʼoplal slajeb li kʼusitik chkʼotanuk ta pasel liʼ ta balumile (Mateo 24:14).

¿Kʼu van yelan chkʼot ta pasel?

Li Jesuse laj yal ti jaʼ la lekil aʼyejetik li slajel kʼusitik chkʼotanuk ta pasel ta balumil ti bu naka choplejal oye xchiʼuk li kʼusitik muʼyuk tukʼe, yuʼun xi laj yale: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale [o «kʼusitik chkʼotanuk ta pasele», NM]». Xchiʼuk xi laj yal kuxi chkʼot ta pasele: «Ta onoʼox xtal li tsots vocole. Muʼyuc onoʼox jech cʼalal ilic li banamile xchiʼuc cʼalal to tana. Muʼyuc ta xcʼot ta pasel jech yan velta noxtoc. Ti manchuc ta xichʼ comajesbel scʼacʼalil li vocol leʼe, muʼyuc bochʼo ta xcol ti jechuque» (Mateo 24:14, Ch, 21, 22).

¿Mi oy buchʼu ta xkol?

Jaʼ noʼox chlajik li buchʼutik muʼyuk skʼanojik Jeova xchiʼuk Jesuse, xchiʼuk ti mu xchʼunbeik smantaltak Diose. Xi laj yal li Jesuse: «Jech chac cʼu chaʼal icʼot ta pasel ta yorail li Noee, jaʼ noʼox jech ta xcʼot ta pasel cʼalal chital [o «liʼ xaʼox oyun», NM], vuʼun ti Xnichʼon cristiano licʼote. [...] Cʼalal muʼyuc toʼox chtal li pulel ta voʼe, [...] muc xchʼunic ti chtal li pulel ta voʼe. Jaʼ to la xchʼunic  ti cʼalal itale, pero ilaj o scotolic» (Mateo 24:36-39). Li Jesuse laj yal ti epal krixchanoetike jaʼ te oyik li ta be ti ch-ikʼvan batel ta lajelale, pe jech noxtok laj yal ti oy jun «biqʼuit» be ti jaʼ «sbelal cuxlejale» (Mateo 7:13, 14).

¿Bakʼin van chtal?

Kʼalal la sjakʼbeik kʼusitik senyail kʼalal liʼ xaʼox oy li Jesuse xchiʼuk li senyail «slajebal cʼacʼale [o li «slajebal kʼusitik chkʼotanuk ta pasele», NM]», xi la stakʼ li stuke: «Yuʼun ta to xlic scontrain sbaic yantic banamil; ta to xlic scontrain sbaic mucʼtic ajvaliletic. Ta to xtal tsots viʼnal; ta xjelov niqueletic [...] [xchiʼuk] ta sventa ti echʼem ta xʼepaj li cʼusi chopole, jech ep bochʼotic mu xa scʼan xchiʼilic» (Mateo 24:3-12). Jech un chaʼa, skotol li kʼusitik chopol ch-echʼ ta notisia li avie oy kʼusi lek chakʼ ta ilel, yuʼun chakʼ ta ilel ti Diose toj jutuk xa skʼan chlik yakʼ ventainvanuk li Ajvalilal yuʼune xchiʼuk xichʼ talel lekilal sventa skotol li krixchanoetike. Ta sventa taje, li Jesuse xi laj yale: «Cʼalal chavilic ta xcʼot ta pasel scotol li cʼusi calojboxuque, jech chanaʼic o ti poʼot xa chlic sventainoxuc li Diose» (Lucas 21:31).

¿Kʼusi van xuʼ jpastik sventa xi jkol?

«Li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil.» (Juan 3:16.) Jech onoʼox ta melel, sventa oyuk xchʼunel koʼontontik ta stojolal Diose xchiʼuk ta sventa li xnichʼone, skʼan xkojtikintik lek xchaʼvoʼalik. Jaʼ yuʼun xi laj yal li Jesuse: «Jech ta xcuxiic sbatel [osil], yuʼun xayotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale» (Juan 17:3).

Ta skotol li kʼusi laj xa jchantike, mu me xkakʼtik smakutik li kʼopetike xchiʼuk li kʼusitik chkat-o koʼontontik ti mu xa jchantik mas ta sventa Dios xchiʼuk ti mu xkakʼtik ta ilel ti jkʼanojtike. Li Jesuse xi pʼijubtasvane: «Bijanic, mu me xyijub avoʼntonic [...] [ta skoj] ti xvulvun noʼox avoʼntonic cʼusi xuʼ ta xavut aba liʼ ta sba banomile, yoʼ mu chʼayaluc avoʼntonic xataeic ti jech cʼacʼal taje. Yuʼun coʼol sʼelan junuc petsʼ ta xvul ta stojol ti jnaclejetic ti oyic ta sjoylej banomil ti cʼalal ta sta ti scʼacʼalile». Mi la jchʼuntike xuʼ jpoj jbatik «ta stojol scotol ti cʼusitic ta xcʼot ta pasele» (Lucas 21:34-36, Ch).

Mi cha kʼanbe to mas yaʼyejale, kʼelo li kapitulo 9 ta livro ¿Kʼusi chchanubtasvan ta melel li Vivliae?, a ti bu chal «¿Mi ta slajebal xa kʼakʼal kuxulutik?».

[Ts’ib ta yok vun ta pajina 17]