Li jkʼel vunetike tskʼan snaʼik

¿Mi jaʼ van skastigo Dios li vokoletik ta jnuptan ta jkuxlejaltike?

Kʼalal oy kʼusi tsots tsnup jun krixchanoe, xuʼ van ta snop ti yakal ch-akʼbat kastigo yuʼun li Diose. Mi la ipaj ta chamel, mi oy kʼusi la apas o mi ta skoj slajel junuk buchʼu akʼanoj tajeke, yikʼaluk van xuʼ xa nop ti jech tskʼan Dios chavil avokole. ¿Mi jech cha nop li voʼote?

Pato avoʼonton yuʼun mu jechuk tskʼan li Diose, li stuke tskʼan ti akʼo junuk koʼontontike. Kʼalal la spas li baʼyel jtot jmeʼtike, laj yakʼ nakiikuk ta jun nichimaltik ti jaʼ sbi, «tsʼunubaltic Edén». Li te taje mu xat yoʼontonik ta sventa xkuxlejalik (Génesis 2:15).

Kʼux ta alel, yuʼun li Adán xchiʼuk Evae yolbaj la xchʼayik li kʼusitik lek ox xuʼ chkʼot ta xkuxlejalike xchiʼuk, yolbaj, la stoy sbaik ta stojolal li Jeova Diose. Ta skoj taje maʼuk noʼox laj yil svokol stukik, moʼoj, laj yil svokol yuʼunik ek li yalab xnichʼnabike. ¿Kʼu yuʼun? Kakʼbetik jun skʼelobil. Ti oyuk junuk totil mu skʼan stoj li slokʼ snae, chil svokol skotol li yutsʼ yalale, yuʼun chichʼik nutsel lokʼel skotolik. Jaʼ jech ek, ta skoj ti la stoy sba li baʼyel jtot jmeʼtike chkil jvokoltik li voʼotik eke. Taje jaʼ srasonal ti ep tajek vokolil tana li ta balumile (Romanos 5:12). Jun tukʼil yajtunel Dios ta voʼne ti Job sbie, laj yal ti xuʼuk la xichʼ «bisel ta kilo» li svokole, mas to la echʼem yepal yalal chkʼot, jaʼ la xkom to li «yiʼ ta tiʼnab[e]» (Job 6:2, 3).

Bateltik xtoke chkil jvokoltik ta skoj ti mu lekuk chbat ta nopel kuʼuntik li kʼusitik ta jpastike. Kaltik noʼox avaʼi ti la aman jpʼej nae, pe muʼyuk baʼyel la jakʼbe skʼoplal, jaʼ to la avile vaʼanbil ta jtuchʼ osil ti xibal sba anil xtil kʼokʼe. ¿Mi mu van xibaluk sba xil svokol li avutsʼ avalale? Pe, ati oy kʼusi chopol xkʼot ta pasele, ¿mi xuʼ van xavakʼbe xkuchin Dios xa naʼ? Jech oxal, li Vivlia chal ti akʼo pʼijukutike, xi chale: «Li bochʼo muʼyuc sbijile ta svontolchʼun noʼox li cʼusi ch-albate; yan li bochʼo bije tsnop lec ti bu chbate» (Proverbios 14:15).

Jech, jkotoltik xuʼ oy kʼusi vokol jnuptik. Pe li Diose yaloj ta jamal ti poʼot xa ta stupʼe. Mi kʼot yorail taje, mu xa bu ta xkil jvokoltik, mi jaʼuk chkaʼibetik skʼoplal. Li at-oʼontone, li kʼux ipe xchiʼuk li lajelale chchʼay skʼoplal (Apocalipsis 21:4). Li Vivliae chal ta melel ti ta jelavele chʼabal buchʼu ta xchʼay sna, chʼabal ta xchʼay kʼusitik tstsʼun ta skoj li pas kʼope o ta skoj li kʼusi chkʼot ta pasel kʼuchaʼal nikel, nojelal ta voʼ o yan kʼusitike. Chal xtok ti jkotoltik ta jkʼupintik «lec» li yabtel kok jkʼobtike (Isaías 65:21-25).

Pe yoʼ to mu xkʼot li skʼakʼalil ta stupʼbe skʼoplal sbatel osil kʼusitik chopol li Diose, ¿kʼusi xuʼ jpastik sventa stsal kuʼuntik li vokoliletike o sventa mu masuk jta jvokoltike? Li Vivliae xi chal mantale: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque», xi (Proverbios 3:5). Jech oxal, saʼo beiltasel xchiʼuk spatel avoʼonton ta stojolal. Xchiʼuk ichʼo ta kʼux li mantaletik chal ta sKʼope. Jech taje, xuʼ lek chbat li kʼusitik cha nop cha pase xchiʼuk sventa mu xa nuptan jlom vokoliletik ta akuxlejal (Proverbios 22:3).