Li kʼusitik xuʼ jpastik sventa xkaʼibetik smelolal li Vivliae

2. Mu kʼusi chopol jnoptik ta sventa Vivlia kʼalal ta jchantike

¿Mi oy junuk krixchano ti oy kʼusi chopol yalojbot ta stojolal yan krixchano ti mu to xavojtikine? ¿Kʼusi kʼot ta pasel kʼalal lik akʼopon li buchʼu oy kʼusi chopol albilot ta stojolale? Ta melel, toj vokol van la avaʼi skʼelbel li slekil talelaltak ta skoj ti muʼyuk lek albil skʼoplale. Taje jaʼ jech chkʼot ta pasel ek ta stojolal li Vivliae.

LI JTAKBOL Pabloe lek snaʼoj ti xibal sba mi oy kʼusi chopol ta jnoptik ta sventa Vivlia kʼalal ta jchantike. Jaʼ jech kʼot svokol jlom judioetik ta baʼyel siglo, ti xi laj yalbe skʼoplale: «Scotol yoʼnton tscʼan chtunic yuʼun [Dios], pero mu snaʼbeic smelol cʼu xʼelan xuʼ chtunic yuʼun» (Romanos 10:2).

Ta skoj ti oy kʼusi chopol ta snopik ta sventa li sKʼop Diose, ep buchʼutik ti muʼyuk la skʼan laj yojtikinik li Mesías ti albil onoʼox skʼoplal li ta Tsʼibetik ta Hebreo Kʼope. Li Jesús, ti likem ta nazarete lek kʼot ta pasel ta stojolal skotol li albil kʼopetik taje, manchuk mi jech, li kʼusi chopol ta snopik li judioetike, jaʼ makatik-o sventa mu xaʼibeik smelolal li sKʼop Diose.

¿Kʼusi ta jchantik ta sventa ti chopol kʼusi la spasike? Jaʼ ti tsots skʼoplal ti mu kʼusi chopol jnoptik ta sventa Vivlia kʼalal ta jchantike. Yuʼun mi moʼoje, muʼyuk bu chkaʼibetik smelolal li kʼusi chal Vivliae.

Jun jchanubtasvanej ta sventa Xchanel Skʼoplal Relijionetike ta Carolina del Norte (Estados Unidos) laj yal ti Vivliae xkoʼolaj la kʼuchaʼal «jun livro ti jaʼ spasoj krixchanoetike  xchiʼuk ti jaʼ noʼox la sventa krixchanoetike, ti ep butik tsvalopatin sba li kʼusi laj yalike xchiʼuk ti mu kʼusi chtun-o ta jkuxlejaltik li tojobtaseletike». Tana un, mi jech ta xkiltik li Vivlia kʼuchaʼal «jun livro ti jaʼ spasoj krixchanoetike xchiʼuk ti jaʼ noʼox la sventa krixchanoetike», ¿mi mu jechuk ti xuʼ mas mu jchʼamtik junuk chanubtasel xchiʼuk beiltasel mi mu lekuk chkiltike?

Pe li Vivliae, chalbutik ti akʼo jchantik jech kʼuchaʼal la spasik jlom krixchanoetik ta Berea ta skʼakʼalil Pabloe. Li stukike maʼuk noʼox «ta scotol yoʼntonic» la xchʼamik li chanubtaseletik yuʼun Cristoe, moʼoj, li Vivliae chal xtok ti «scotol cʼacʼal la sqʼuelic li scʼop Diose, yuʼun tsqʼuelic me xcoʼlaj xchiʼuc cʼusi ta xchol li Pabloe» (Hechos 17:11). Mi mas ta jkʼan chkaʼibetik smelolal li Vivliae, skʼan jpastik jech kʼuchaʼal li stukike, skʼan mu kʼusi chopol jnoptik xchiʼuk jlokʼes ta joltik li kʼusi chopol chalik ta stojolal kʼalaluk ta jkʼeltike. Jech oxal chaʼa, mu kʼusi chopol jnoptik kʼalaluk ta jkʼeltike, oyuk ta koʼontontik ta jkʼan ta jchantik li mantal chal li Buchʼu la spase.