Li kʼusitik xuʼ jpastik sventa xkaʼibetik smelolal li Vivliae

3. Chʼamo koltael

Li Edward John Eyre ti tsaʼ kʼusitik ta balumile (explorador) la xchʼam li koltael akʼbat yuʼun li jnaklometik ta Australia kʼalal jaʼo yakal ta xan batel li stenlejaltik Nullarbore. Kʼalal te la xchiʼinane, la xchan slokʼesel voʼ ta yiʼtikaltik xchiʼuk ta steʼeltak eucalipto, ti jaʼ koltaat sventa mu xcham-o ta taki tiʼil ta tsakale.

TAJE oy kʼusi jamal chakʼ ta ilel: persa chtun kuʼuntik koltael ta stojolal yan buchʼutik mas chanemik sventa tspas kuʼuntik junuk abtelal ti mu kʼunuk ta pasele. Taje jaʼ jech chkʼot ta pasel ek kʼalal chkakʼ ta koʼontontik skʼelel li Vivliae.

Li Jesuse snaʼoj ti yajtsʼaklomtake mu xaʼibeik smelolal ta stukik noʼox li sKʼop Diose, jaʼ yuʼun skʼan xchʼamik koltael. Jun veltae «ijambat lec yoʼntonic [yuʼun Jesús], yuʼun jech acʼo cʼotuc ta yoʼntonic li scʼop Diose» (Lucas 24:45). Lek xvinaj un chaʼa, ti Jesuse snaʼoj lek ti persa chtun kuʼuntik koltael sventa xkaʼibetik smelolal li chanubtaseletik ta sKʼop Diose.

Bu xuʼ jtatik koltael

Li Jesuse laj yalbe yajtsʼaklomtak sventa akʼo xakʼik li koltael taje. Kʼalal skʼan toʼox xbat ta vinajele, xi laj yalanbee: «Batanic me; bat pasic ta jchʼunolajel cuʼun li cristianoetic ta jujun banamile. [...] Chanubtasic lec ta xchʼunel scotol li jmantaltac laj calboxuc avaʼyique» (Mateo 28:19, 20). Jech oxal un chaʼa, li kʼusi mas tsots skʼoplal skʼan spasik li yajtsʼaklomtak Cristoe jaʼ ti skʼan xchanubtasvanike. Taje jaʼ te smakoj batel ti skʼan xalbeik smelolal kʼuyelan xuʼ xakʼ ta xkuxlejalik li beiltaseletik ta sKʼop Dios li krixchanoetike. Jech un chaʼa, li melel yajtsʼaklomtak Cristoe jaʼ oy ta  sbaik skoltael li krixchanoetik sventa xaʼibeik smelolal li Vivliae.

Jkʼeltik jun loʼil ti kʼot ta pasel ta mas tsʼakal jutuk kʼalal laj xaʼox yalbe yajtsʼaklomtak Jesús li mantal taje. Li loʼil taje chal ti oy la jun vinik ti yichʼoj yabtel ta snail pasobmantal ta Etiopía lume, yakal la tskʼel albil kʼopetik ta slivroal Isaías, pe oy la sta jvokʼ loʼil ti mu xaʼibe smelolale. Li bu mu xaʼie xi chale: «Ta xʼicʼat batel yuʼun chbat yichʼ milel jech chac cʼu chaʼal jcot chʼium chij. Jaʼ jech chcʼot jech chac cʼu chaʼal chʼium chij ti chʼanxi cʼalal [chichʼ] locʼbel stsotsile. Jaʼ jech muʼyuc cʼusi, ta xal jbeluc. Cʼalal jaʼo utsʼil ilbaj chilique, muʼyuc tucʼ laj yichʼ chapanel. ¿Bochʼo xuʼ chatbe cʼu yepal xnichʼnab xchiʼuc smomnichʼnab? Yuʼun laj yichʼ tuchʼbel o yorail liʼ ta banamil[e]» (Hechos 8:32, 33; Isaías 53:7, 8).

¿Kʼusi la spas li vinik taje? La skʼopon Felipe ti jaʼ mas xojtikin li sKʼop Diose. Xi la sjakʼbee: «Albun caʼay bochʼo scʼoplal laj yal li jʼalcʼope. ¿Me jaʼ scʼoplal stuc laj yal, o me yan bochʼo scʼoplal laj yalbe?» (Hechos 8:34). Ta skoj ti sut xaʼox tal ta chʼulna ta Jerusalén li j-etiope vinike, xuʼ xkaltik ti jaʼ chichʼ ta mukʼ li melel Diose. Xuʼ van xkaltik xtok ti la skʼopon Dios  sventa xaʼibe smelolal li jvokʼ loʼil taje. Xchiʼuk lek xvinaj ti tskʼan tajek chaʼibe smelolale xchiʼuk mu kʼusi chopol tsnop kʼalal tskʼel li loʼil taje. Manchuk mi jech mu xaʼibe smelolal kʼusi skʼan xal li loʼil taje. Pe bikʼit laj yakʼ sba xchiʼuk la skʼanbe koltael li Felipee. Jech li Felipe eke lik yalbe smelolal. Kʼalal laj yaʼibe smelolale, xmuyubaj tajek li vinike, jech oxal ta anil kʼot ta yoʼonton ch-och ta yajtsʼaklom Cristo (Hechos 8:35-39).

Li yajrextikotak Jeova tana eke, jech tspasik kʼuchaʼal li Felipe xchiʼuk yan yajtsʼaklomtak Cristo ta baʼyel sigloe. Chlokʼ ta yoʼonton stukik yakʼel ta chanel Vivlia te van ta 235 balumiletik xchiʼuk osiletik. Ta skoj ti oy smelolal kʼuyelan chchanubtasvanike xchiʼuk ti oy jayibuk veltae, xcholet batel chalbeik skʼoplal jujutos loʼil ta Vivlia. a (Kʼelo li rekuadro «Stakʼobiltak ta Vivlia ti xuʼ jpat-o koʼontontike».)

«Tsjambe batel smelolal kʼusitik mu xkaʼi li Vivliae»

Steven, Valvanera xchiʼuk Jo-Anne —ti laj kalbetik skʼoplal li ta baʼyel jvokʼ mantal li ta revista liʼe— lik xchanik Vivlia xchiʼuk li yajrextikotak Jeovae. ¿Kʼusi kʼot ta pasel un? Li Stevene xi chale: «Toj labal ikil ti kʼuyelan kʼun noʼox ta jtabetik stakʼobiltak li kʼusitik ta jkʼan ta jnaʼe. Jaʼ noʼox skʼan ta jkʼel junantik versikulo xchiʼuk li loʼiletik ta Vivliae. Mi junuk velta jech toʼox jpasoj. Xkuxet to koʼonton laj kaʼi ti mu persauk jtsak jbatik ta il xchiʼuk ta utbail sventa xkaʼibetik smelolal li Vivliae».

Jech kʼot ta pasel ta stojolal li Valvanera eke. «Laj kakʼ venta ti skotol li kʼusitik chchanubtasvan li Vivliae lek ta aʼibel smelolal xchiʼuk muʼyuk tsvalopatin sba. Ta jchʼun li kʼusitik chal Vivliae yuʼun xkʼot noʼox ta chʼunel li kʼusi chale, maʼuk ta skoj ti jech chalbikun ta jrelijion ti akʼo jech jpase.» Li Jo-Anne xi chal eke: «Kʼalal laj kil ti tsjambe batel smelolal kʼusitik mu xkaʼi li Vivliae, mas to la stijbun koʼonton yichʼel ta mukʼ li Diose. Toj labal laj kil ti stsʼibaoj komel stakʼobil kʼusiuk noʼox ta jkʼan ta jnaʼtike», xi.

¿Mi xavojtikin junuk yajrextiko Jeova li voʼote? Xuʼ van xavalbe ti akʼo yakʼbot ta ilel kʼuyelan chakʼik li chanubtasel ta Vivliae. Mi mu xavojtikin junuk yajrextiko Jeovae, xuʼ van xa tsʼibaj batel li bu jotukal jaʼ sventa alumal chal ta pajina 2 li ta revista liʼe, sventa xuʼ xa svulaʼanik. Vuleso me ta ajol ti Vivliae stakʼ noʼox xavaʼibe smelolal. Jaʼ noʼox skʼan jpastik li oxib kʼusitik la jchantike: jkʼanbetik Dios li xchʼul espiritue, mu kʼusi chopol jnoptik ta sventa Vivlia kʼalal ta jchantike xchiʼuk jchʼamtik koltael ta stojolal junuk jchanubtasvanej ti lek xtojobe.

[Tsʼib ta yok vun]

[Rekuadro ta pajina 8]

Stakʼobiltak ta Vivlia ti xuʼ jpat-o koʼontontike

Li ta chanubtasel chakʼik yajrextikotak Jeovae te chichʼ takʼel li sjakʼobiltak liʼe:

• ¿Kʼusi tskʼan Dios ta sventa li Balumile?

• ¿Bu oy li animaetike?

• ¿Mi ta slajebal xa kʼakʼal kuxulutik?

• ¿Kʼu yuʼun yakʼoj to oyuk vokolil li Diose?

• ¿Kʼuxi xuʼ jtatik muyubajel li ta utsʼ-alalile?

[Lokʼol ta pajina 7]

Yoʼ xkaʼibetik smelol li Vivliae, jkʼanbetik Dios li xchʼul espiritue, mu kʼusi chopol jnoptik ta sventa Vivlia kʼalal ta jchantike xchiʼuk jchʼamtik koltael