Nopajan ta stojolal Dios

Ep sbalil chil Jeova li buchʼu bikʼit chakʼ sbaike

Números 12:1-15

JUN-CHIB stalelal li buchʼutik tskʼan mukʼ skʼoplalik li ta balumile, jaʼ ti ep kʼusi tskʼan tstaike, ti chakʼik tsalbaile xchiʼuk ti tstoy sbaik tajeke. ¿Mi tsnopajesutik ta stojolal Dios li talelaletik taje? Ta melel moʼoj. Li Diose smalaoj ti manxoikuk xchiʼuk ti mu saʼik kʼop li buchʼutik chtun ta stojolale. Jkʼeltik kʼuyelan lek chakʼ ta ilel li kapitulo 12 ta Numerose. Li loʼil taje ikʼot ta pasel ta taki xokol balumil ta yosilal Sinaí, kʼalal mu toʼox jaluk slokʼel ta Egipto li jteklum Israele.

Li loʼil taje chal ti María (Míriam) xchiʼuk Aarone «lic chopolcʼopojicuc ta stojol li Moisese» ti jaʼ mukil itsʼinal yuʼunike (versikulo 1). Li Vivliae muʼyuk chal ti bat xchopol kʼoponik li Moisese, moʼoj, chal ti lik chopol kʼopojikuk ta stojolale, taje jaʼ svinajeb ti la spukik batel ta yantik li kʼusitik chalike. Xuʼ van jaʼ María li buchʼu mu noʼox xmak ye ta spukel batele, yuʼun jaʼ baʼyel chichʼ albel skʼoplal. Li kʼusi mu xkʼot-o chilike jaʼ ti laj yikʼ jun cusita ants li Moisese. ¿Mi ch-itʼixaj van li Mariae? ¿Mi ta van xiʼ ti jaʼ mas tsots skʼoplal xkʼot li jun ants ti yan-o slumal xtoke, ti jaʼ mu xa xichʼ ichʼel ta mukʼ li stuke?

Maʼuk noʼox taje, oy yan srasonal ta yoʼontonik, yuʼun li María xchiʼuk Aarone xi laj yalike: «Li Moisese maʼuc noʼox stuc chcʼopanat yuʼun li Mucʼul Diose, jech chiscʼopanutic ec li vuʼutique», xiik (versikulo 2). Yaʼeluke, li kʼusi tskʼanik tajeke jaʼ ti mas tsotsuk yabtelike xchiʼuk ti mas ojtikinbilikuke.

Li Moisese, te noʼox smalaoj kuch yuʼun ti kʼuyelan chopol kʼoptaate. Jech taje chakʼ ta ilel —kʼuchaʼal chal li Vivliae— ti «jaʼ jun vinic ti toj biqʼuit yacʼoj sba liʼ ta banamile» (versikulo 3). a Li stuke muʼyuk la spak skʼoplal, yuʼun li Jeovae jaʼ la sbain xchapanel li kʼop taje, ti laj yaʼi skotol li kʼusi laj yichʼ alele.

Ti chopol kʼopojike, jaʼ xa ipasbat yaʼi li Diose. Yuʼun jaʼ svaʼanoj ta yajkʼopojel li Moisese. Jech oxal, kʼalal tsots mantal laj yalbe María xchiʼuk Aarone, la svulesbe ta sjolik ti toj lek xil sbaik xchiʼuk li Moisese. Xi laj yal li Diose: «Lec ta jchiʼin ta loʼil stuc». Vaʼun xi laj sjakʼanbe xtoke: «Pero li voʼoxuque, ¿cʼu yuʼun ti chachopolcʼopojic ta stojole?» (versikulo 8). Jaʼ yuʼun kʼalal chopol kʼopojik ta stojol Moisese, jaʼ la xchopol kʼoptaik li Diose. Ta skoj ti muʼyuk xkʼexlalik ti jech ichopol kʼopojike, laj yilbeik skʼakʼal yoʼonton li Diose.

Li María —ti jaʼ yaʼel li buchʼu la spuk li chopol kʼoptaele— akʼbat kʼaʼemal chamel. Ta tsʼakale, li Aarone xvokolet xa la skʼanbe Moisés ti akʼo xpoxta Dios li Mariae. Nopo avaʼi: ti buchʼu laj toʼox xchopol kʼopta li Mariae, jaʼ xa noʼox te xuʼ xkol. Jech oxal li Moisese la skʼanbe vokol Jeova ti akʼo xpoxta li Mariae. Li ta sjunul loʼil taje, li Moisese jaʼ to sba velta te kʼopoj, jech laj yakʼ iluk xtok ti oy slekil yoʼontone, ti bikʼit yakʼoj sba xchiʼuk ti snaʼ smalaele. Jech ikol li Mariae akʼo mi la stsʼik kʼexlal, yuʼun lokʼesat ta stojolal jteklum vukub kʼakʼal.

Li loʼil liʼe chakʼ ta ilel kʼusitik talelal lek chil li Jeovae, xchiʼuk li kʼusitik chopol chile. Mi ta jkʼan chi jnopaj ta stojolal Diose, skʼan mi jsetʼuk xvinaj ta jkuxlejaltik li stalelal krixchanoetik ti oy tajek kʼusi tskʼan tstaike, ti chakʼik tsalbaile xchiʼuk ti tstoy sbaik tajeke. Vuleso me ta ajol ti ep sbalil chil Jeova li buchʼu bikʼit chakʼ sbae. Yuʼun xi chal ta melel xtoke: «Ti buchʼu biqʼuit yacʼoj sbaic une, ta xrextoinic ti banomile, ta scʼupinic ta jʼechʼel ti yutsil slequile» (Salmo 37:11, Ch; Santiago 4:6).

[Tsʼibetik ta yok vun]