Li jkʼel vunetike tskʼan snaʼik

¿Mi lek chil Dios ti oy jayvoʼ yajnil li viniketike?

Taje muʼyuk lek chil li Diose. Kʼalal la slikes nupunel li ta nichimaltik Edene, li Diose laj yal mantal ti akʼo junuk noʼox yajnil li vinike. Ta mas tsʼakale, li Jesuse laj yalbe yajtsʼaklomtak ti akʼo xchʼunik li smantal Dios taje (Génesis 2:18-24; Mateo 19:4-6).

Pe ¿kʼuxi ti oy toʼox jayvoʼ yajnil jlom yajtuneltak Dios ta voʼne, jech kʼuchaʼal Abraham, Jacob, David xchiʼuk Salomone? Jkʼeltik baʼyel kʼusi chal Vivlia ta sventa li viniketik taje, vaʼun jtakʼtik li sjakʼobile. Lek chakʼ ta ilel ti ta yutsʼ yalal Abrahame mu lekuk xil sbaik, jaʼ jech kʼot ta pasel li ta yutsʼ yalal Jacob eke (Génesis 16:1-4; 29:18–30:24). Jnoptik ta sventa Salomón xtok ti muʼyuk la xchʼun li mantal ti xi chal ta sMantal Moisese: «Mu xuʼ tsaʼ ep yajnil [li ajvalile] yuʼun jech mu xchʼay ta be» (Deuteronomio 17:15, 17). Li Vivliae chal ti vukub sien yajnil la saʼe. Toj echʼ xa noʼox sokesat ta skoj taje; li yoʼontone namaj ta stojolal li Jeovae (1 Reyes 11:1-4). Lek xvinaj un chaʼa ti sKʼop Diose chakʼ iluk ti mu lekuk ta jyalel chkʼot ta pasel mi oy jayvoʼ yajnil li vinike.

Ta skoj li kʼusitik la xa jkʼeltik tale, xuʼ van oy buchʼutik tsjakʼbe sbaik kʼu yuʼun laj yakʼ Dios ti akʼo jech spasik li yajtuneltake. Xi jkoʼoltastike: ¿mi mu jechuk bakʼintik ti mu jkomtsan kabteltik akʼo mi mu jkʼupintik ta skoj ti maʼuk to yorail chkiktatik komele? Jaʼ jechtik la spas li Jeova ta sventa li buchʼu oy jayvoʼ yajnile. Akʼo mi mu xkaʼibetik smelolal skotol kʼu yuʼun li kʼusitik tspase, jamal ta ilel ti oy lek srasonal ti kʼu yuʼun muʼyuk la spajese, yuʼun ti kʼuyelan tsnop xchiʼuk li stalelale mu xi jkoʼolaj, yuʼun jaʼ xi jkom to tajek li voʼotike (Isaías 55:8, 9). Jkʼeltik kʼu van yuʼun muʼyuk la spajes.

Jvules ta joltik ti ta Edene, li Diose laj yal ta melel ti chvul ta lokʼel jun nitilulal ti jaʼ tslajes li Satanase. Ta tsʼakale, laj yalbe Abraham ti yalab xnichʼnabe ta xkʼot ta jun mukʼta jteklum xchiʼuk ti jaʼ te chlokʼ talel li nitilulal taje (Génesis 3:15, Ch; 22:18, NM). Li Satanase la skʼan laj yakʼbe slajeb li jteklum Israele yuʼun oy tajek ta yoʼonton ti mu xvul ta lokʼel li nitilulal taje. Ta skoj ti jaʼ tskʼan ti mu xa lekuk x-ilatik yuʼun li Diose xchiʼuk ti mu xchabiatike, li Satanase nopoltik noʼox laj yakʼ akʼo saʼ smulik ta stojolal Jeova.

Sventa chichʼik koltael li j-israeletik yoʼ xkuch yuʼunik li vokoliletike xchiʼuk xtukʼibtasatik kʼalal muʼyuk chchʼunik li tukʼil mantale, li Jeovae la stakulanbe batel yaj-alkʼoptak. Pe li stuke snaʼoj xa onoʼox ti muʼyuk bu chchʼunik li mantaletik ti tsotsik skʼoplal skʼan chʼunele, jech kʼuchaʼal ti mu stakʼ ichʼel ta mukʼ lokʼoletike (Éxodo 32:9). Mi tsots laj yaʼiik ta chʼunel li mantaletik taje, ta melel mas tsots laj yaʼiik ta chʼunel jechuk ek ti lajuk yakʼ Jeova junuk mantal ta sventa ti mu stakʼ saʼ jayvoʼuk yajnil li vinike, ti nopem xaʼiik jech spasel li ta voʼnee. Jaʼ yuʼun li Jeovae —ti xojtikin lek kʼusitik tskʼan tspas li krixchanoetike— la snop ti maʼuk to yorail tspajes li kʼusi nopem xaʼiik spasel taje. Ti lajuk noʼox yakʼbe spajebe, mas kʼun pʼajik ta mulil yuʼun Satanás jechuk li j-israeletike.

Jech xtok, oy kʼusitik lek kʼot ta pasel ta skoj ti laj yakʼ Jeova ti oyuk jayvoʼ yajnil li viniketike. Baʼyel, laj yakʼ akʼo spas ta anil ta jun mukʼta jteklum li Israele sventa mu lajemuk skʼoplalik kʼalal chvul li Mesiase. Jech xtok, ta skoj taje jlom antsetike la staik jutuk chabiel ta kʼusitik xibalik sba xchiʼuk xtok la staik jutuk kʼusitik chtun yuʼunik kʼalal jaʼo oy vokolile.

Kʼuchaʼal laj xa kiltike, li Jeovae maʼuk la slikes ti oy jayvoʼ yajnil li vinike. Akʼo mi laj toʼox yakʼ akʼo oyuk li ta voʼnee, jech xtok laj yal ta sMantal Moisés kʼusitik mu stakʼ spasik yoʼ mu x-echʼik ta mas li buchʼutik jechike (Éxodo 21:10, 11; Deuteronomio 21:15-17). Kʼalal la snop Jeova ti chakʼbe spajebe, laj yakʼ ta naʼel ta stojolal li xNichʼone. Kʼalal la svulesbe ta sjol yajtsʼaklomtak li Jesuse, lek jamal laj yal ti skʼan jun noʼox yajnilik jech kʼuchaʼal la spas ta slikebal li Diose (Marcos 10:8). Jech un chaʼa, lek xvinaj ti sMantal Moisese itun lek li ta voʼnee, pe mas to x-echʼ skʼoplal avi li «smantal li Cristoe» (Gálatas 6:2).