¿Mi xuʼ van xkaʼibetik smelolal kʼusi chal li Vivliae?

«Ta jujun domingoe ta jtsob jbakutik ta skʼelel Vivlia li ta jnakutike. Manchuk mi jnaʼoj ti likem talel ta stojol Diose, mu masuk jkʼupin skʼelel, yuʼun ep bu mu xkaʼibe smelolal.» (Steven, ta Gran Bretaña)

«Kʼalal kichʼoj xaʼox 17 jabilale lik jkʼel, pe toj vokol tajek kaʼi, jaʼ yuʼun laj kikta.» (Valvanera, ta España)

«Ta skoj ti jtsakoj li relijion katolikae, laj kaʼibe smelolal ti skʼan jkʼel junuk velta ta jkuxlejal li Vivliae. Oxib jabil laj yichʼ kuʼun skʼelel, pe mu kʼusi laj kaʼibe smelolal.» (Jo-Anne, ta Australia)

LI VIVLIAE mu kʼusi xkoʼolaj-o xchiʼuk ti kʼu sjalil echʼem tal li kuxlejal ta sba Balumile. Mi junuk livro jech xa noʼox yepal chonbil, skotol krixchano xuʼ sta jlikuk, ep xa noʼox tajek jelubtasbil ta yantik kʼop ta spʼejel Balumil; solel ep ta tos ti kʼuyelan pasbile. Manchuk mi jech, oy ep krixchanoetik ti vokol chaʼibeik smelolale. ¿Mi jech van vokol chavaʼibe smelolal li voʼot eke?

¿Mi yuʼun van mu skʼan xkaʼibetik smelolal li buchʼu la spase?

Tsʼakal to jtakʼtik taje, baʼyel jkʼeltik ti buchʼu la spas li Vivliae. Ta 2 Timoteo 3:16 xi jamal chale: «Li scʼop Dios tsʼibabil comele jaʼ laj yacʼ ta naʼel ta sventa svuʼel stuc li Diose». Vaʼun chaʼa, ¿mi oy van ta yoʼonton ti xkaʼibetik smelolal li sKʼope? ¿O mi laj van spas sventa jun-chib noʼox krixchanoetik, jech kʼuchaʼal li buchʼutik chchanbe skʼoplal Dios (teólogos) xchiʼuk li jbabeetik ta relijione?

Li tekstoetik ta xtale tsjambe smelolal taje:

«Li mantaletic laj calboxuc avaʼyic liʼ ta orae, maʼuc toj tsots ta chʼunel ta aventaic, maʼuc toj nom oy ta atojolic.» (Deuteronomio 30:11.)

«[Ta skoj li] acʼope, chjam jba jsat yuʼun; jaʼ sventa chbijub li bochʼotic muʼyuc to bijique.» (Salmo 119:130.)

«Ta yorail leʼe, toj xcuxet yoʼnton laj yaʼay ta sventa Chʼul Espíritu li Jesuse, jech laj yalbe li stote: “Tati, voʼot Yajvalot li vinajel banamile, colaval ti muc xavacʼbe yaʼyic smelol li bochʼotic bijique, xchiʼuc li bochʼotic lec snaʼ yalojique. Jaʼ laj avacʼbe yaʼyic smelol li bochʼotic muʼyuc stu ch-ilatique”.» (Lucas 10:21.)

Lek xvinaj ta melel un chaʼa, ti buchʼu la spas li Vivliae oy ta yoʼonton ti akʼo xkaʼibetik smelolale. Akʼo mi jech, epal krixchanoetike mu xaʼibeik smelolal manchuk mi chakʼik tajek persa. ¿Mi oy van kʼusi xuʼ jpastik? ¡Oy, kʼuxi un! Li ta jayvokʼ mantaletik chtale ta jkʼeltik oxtos kʼusitik xuʼ skoltautik sventa xkaʼibetik smelolal li Vivliae.