Jun jecheʼ loʼil ti snitoj sba ta yane

TA JLIK karta ti la stsʼiba jtakbol Pablo kʼalal echʼ xaʼox oʼlol li ta siglo 1, la spʼijubtas li yajtsʼaklomtak Cristo ta jtos kʼusi xibal sba. «Qʼuelo me abaic, mu me xasloʼlaoxuc li bochʼotic bij scuyoj sbaique, ti mu meleluc cʼusi chalique, ti stalel noʼox cristianoetique», xi (Colosenses 2:8).

Akʼo mi laj yichʼik pʼijubtasel, junantik yajtsʼaklom Cristo ta oʼloltik xchibal sigloe lik stunesik voʼneal chanubtasel yuʼun jyanlum krixchanoetik sventa chchapbeik smelolal li kʼusi xchʼunojike. ¿Kʼu yuʼun jech la spasik? Sventa stijbeik yoʼonton li buchʼutik mas chanemik li ta yosilal Romae, yoʼ jech mas ep buchʼutik xlik stsʼakliik Cristoe.

Jun li jchʼunolajel taje, jaʼ Justino Mártir, li vinik taje xchʼunoj ti laj yakʼ sba ta ilel ta stojolal filosofoetik ta Grecia kʼalal jal toʼox skʼan xtal ta Balumil kʼuchaʼal vinik li J-almantal yuʼun Diose (jaʼ xkaltik li jun noʼox xNichʼon Diose). Jech kʼuyelan tsnop Justino Mártir xchiʼuk li yan buchʼutik chchanbeik skʼoplal Diose (teólogos), li filosofía xchiʼuk mitología tskolta sbaik sventa xkʼot ta jun relijion ta spʼejel Balumil li stsʼakliel Cristoe.

Ta skoj li kʼusitik la sjel li Justino Martire, ep buchʼutik kʼotik ta jchʼunolajel. Pe sventa xchʼamik-o li achʼ chanubtaseletik taje persa la slikesik yan jecheʼ loʼiletik, vaʼun jaʼ jech ilik talel jecheʼ loʼiletik ti ep buchʼutik chalik ti jaʼ chanubtaseletik yuʼun Cristoe. ¿Mi cha kʼan cha nabe smelolal jun-chibuk li jecheʼ loʼiletik taje? Chkalbotkutik ti akʼo xa kʼel li kʼusitik chal jlom vunetike, vaʼun kʼelo li kʼusi chchanubtasvan ta melel li Vivliae.

[Stojel ta vokol ta pajina 3]

Li Diabloe: Barrators—Giampolo/The Doré Illustrations For Danteʼs Divine Comedy/Dover Publications Inc.; anjeletik: Art Resource, NY; Trinidad: Museo Bardini (Florencia)