Nopajan ta stojolal Dios

¿Kʼusi tskʼan akʼo jpastik li Jeovae?

Deuteronomio 10:12, 13

LI XCHʼUNEL mantale mu toj kʼunuk. Jech onoʼox ta melel, ep j-abteletike ta utel to chchʼunbeik smantal li yajvalik ti tsots yoʼontone o ti lek snaʼ sujvan ta abtele. ¡Toj jelel stalelalik li yajtuneltak Diose! Li stukike chchʼunbeik smantal Dios yuʼun jech tskʼan yoʼontonik. Li kʼusi laj yal Moisés te ta Deuteronomio 10:12, 13 jaʼ te chkaʼitik kʼu yuʼun jech tspasik. *

Ta sventa li kʼusitik tskʼanbe Dios li yajtuneltake, li Moisese xi oy kʼusi tsots skʼoplal la sjakʼe: «¿Cʼusi tscʼan acʼo apasic li Mucʼul Dios cuʼuntique?» (versikulo 12). Li stuke jaʼ Mukʼul Jpas mantal, jaʼ laj yakʼbutik jkuxlejaltik xchiʼuk jaʼ chakʼ akʼo xi jkuxi-o batel (Salmo 36:9; Isaías 33:22). Jaʼ yuʼun chaʼa, xuʼ xi skʼanbutik li kʼusi tskʼan yoʼontone. Mi oy buchʼu tskʼan ti xichʼ chʼunbel smantale, jaʼ li stuke. Pe, mu skʼan ti sujbiluk ta jchʼuntike. Moʼoj, yuʼun tskʼan ti jchʼuntik ta skotol koʼontontike (Romanos 6:17).

Pe ¿kʼusi tstij koʼontontik ta xchʼunbel ta sjunul koʼontontik li smantale? Li Moisese chal ti akʼo la kichʼtik ta mukʼe (versikulo 12). Taje jaʼ chalbe skʼoplal ti jtsaktik lek ta venta li Diose yoʼ mu kʼusi chopol jpastik ti xuʼ tsyayijesbe yoʼontone.

Pe li kʼusi mas tsots skʼoplal ti skʼan tstij koʼontontik ta xchʼunbel smantal li Diose yan-o. Jech kʼuchaʼal laj yal Moisese, li Jeovae tskʼan ti jkʼantik ta skotol jol koʼontontike (versikulo 12). Jaʼ xkaltik, skʼan jchʼunbetik ta skoj ti jkʼanojtike. Pe li skʼanel Diose, maʼuk noʼox skʼan xal ti chkal ta koʼontontik ti jkʼanojtike. Jlik livroe chal «ti verboetik ta hebreo ti chalbe skʼoplal kʼuyelan chaʼi sba li oʼontonale, bateltik xtoke jaʼ chalbe skʼoplal li kʼusitik chkʼot ta pasel yoʼ jech chaʼi sba li koʼontontike». Jech oxal, li krixchano ti skʼanoj Diose chakʼ ta ilel ta kʼusitik tspas ti jech chaʼi li yoʼontone. Jech un chaʼa, mi ta melel jkʼanojtik li Diose, ta me xkakʼtik persa ta jpastik li kʼusi chmuyubaj-oe (Proverbios 27:11).

Jech un chaʼa, ¿mi oy van spajeb li xchʼunbel smantal Diose? Li Moisese xi laj yale: «Acʼo atamic batel [skotol, NM] li lequil be yuʼune» (versikulo 12). Li Jeovae tskʼan ti jchʼubetik smantal ta skotole. Oy onoʼox van buchʼutik chalik ti muʼyuk sbalil ti chichʼ chʼunel skotol li kʼusitik chkichʼtik albele. Pe li kʼusitik ta sventa Diose ep sbalil.

Li xchʼunel mantal ta sjunul koʼontontike jaʼ noʼox voʼotik ta jtabetik sbalil. Li Moisese ta jamal laj yal li ta versikulo 13: «Pasic me li mantaletic yuʼune, yuʼun jech lec chabatic». Mu ventauk li kʼusi chi skʼanbutike, jaʼ noʼox sventa jlekilal jtuktik. Mu me xchʼay xkaʼitik «li Diose jaʼ stalel ta xcʼanvan o» (1 Juan 4:8). Jech oxal, li smantaltake jaʼ sventa jlekilaltik, manchuk mi chkilbetik sbalil ta anil o ta mas tsʼakal (Isaías 48:17). Mi ta jpastik li kʼusi chi skʼanbutike, muʼyuk me jecheʼ ta jsaʼ jvokoltik xchiʼuk ta jkʼupintik epal bendisionetik ta sbatel osil ta tsʼakal ti jaʼ chichʼ talel li Ajvalilal yuʼun Diose. *

Ta melel kʼalal oy kʼusi chi skʼanbutik li Jeovae, li kʼusi mas leke jaʼ ti jchʼunbetik ta skotole xchiʼuk ti jchʼunbetik ta sjunul koʼontontike. Mu ta naʼeteluk, mi ta jpastik jeche ta me xi jnopaj batel mas ta stojolal Jeova, li Dios ti toj ep chkʼanvan ti jaʼ noʼox oy ta yoʼonton li jlekilaltike.

[Tsʼibetik ta yok vun]