Lekil aʼyejetik ta voʼob sien kʼopetik

LI TA Ruandae, ta skoj li pas kʼop tee, li jayvoʼ buchʼu ch-abtejik ta sjelubtasel ta yan kʼop li vunetike, persa chjatavik batel ta osiltik ti bu mu kʼusi stakʼ spasbatike. Kʼalal jatavik batele laj yiktaik komel skotol li kʼusitik oy yuʼunike. Akʼo mi jech, jaʼ laj yichʼik batel li skomputadoraik ti stakʼ kuchele. ¿Kʼu yuʼun toj jtunel yuʼunik? Yuʼun jaʼ sventa tsjelubtasik-o ta kiniaruanda kʼop li jeltos vunetik lokʼem ta Vivliae.

Ta jun lum ta Asiae oy jun tseb ti te ch-och akʼobaltik yuʼun ta skoj ch-abtej ta skomputadorae. Akʼo mi chlub, mi kʼixin chaʼi xchiʼuk mu xanav yabtel ta skoj ti jujulikel chbat luse, pe li stuke muʼyuk chikta sba. ¿Kʼu yuʼun? Sventa xichʼ pasel imprimir ta yorail noʼox li vunetik yakal tsjelubtas ta skʼope.

Ta skotolale oy 2,300 ti chtunik ta jelubtasej kʼopetik xchiʼuk ti oyik ta 190 lumetik ta spʼejel Balumile. Li viniketik xchiʼuk li antsetik taje, ti te van ta 20 kʼalal ta 90 sjabilalike, ta sjunul yoʼonton ch-abtejik sventa chlokʼ ta voʼob sien kʼopetik li aʼyej ta Vivlia ti tspat oʼontonale (Apocalipsis 7:9).

Krixchanoetik ti jeltos skʼopike

Li jabiletik xa tale, li yabtelik yajrextikotak Jeova ta sjelubtasel ta yantik kʼopetik li vunetike epajem xa noʼox ta jyalel. Ta 1985, li revista Li Jkʼel osil ta toyole koʼol toʼox tajek yorail chlokʼ ta 23 kʼopetik, toj echʼ xa noʼox lek maʼ taje. Li avie oy xa ta 176 kʼopetik ti koʼol tajek yorail chlokʼ ta spʼejel Balumile, jech taje li buchʼutik chchanik revistae koʼol tajek kʼusitik chchanik ta spʼejel Balumil.

Li ta yepal kʼopetik taje, oy van 50 ti bu jaʼ noʼox chichʼ pasel Li Jkʼel osil ta toyole, yuʼun li ta kʼopetik taje li empresaetik ti jaʼ yabtelik spasel yan vunetik sventa chchonike mu xlokʼ venta chilik. Pe li yajrextikotak Jeovae toj jelelik. Li kʼusi tskʼanike jaʼ ti skotoluk noʼox krixchanoetik ta spʼejel Balumil xchanik li sKʼop Diose. Jech taje, koliyal li matanal takʼin chakʼ stukike, li vunetik lokʼem ta Vivliae koʼol xa chkʼot ta buyuk noʼox jotukal lum ti bu chtun yuʼunike (2 Corintios 8:14).

Pe ¿mi oy sbalil ti jech chakʼbeik tajek yipal spasele? Ta melel oy. Li krixchanoetike tstojik tajek ta vokol ti chchan ta skʼop stukik li mantaletik ta Vivliae, taje jech chakʼ ta ilel li loʼil liʼe. Mu to jaluke, oy jun ants ti mískito skʼope laj yichʼ akʼbel jlik Jlivro ti chal loʼiletik ta Vivliae. * Li miskitoe jaʼ jun kʼop ta Nicaragua ti oy chib sien mil krixchanoetik jech chkʼopojike. Li ta kʼop taje jaʼtik to lik yichʼ jelubtasel li vunetik lokʼem ta Vivliae. Li antse te toʼox xchiʼuk jun pastor ta chʼulna, ti tskʼan ox chichʼ li livroe. Pe li stuke muʼyuk la skʼan laj yakʼbe ¡akʼo mi yebat jtob kilo sat kafe!

 Li echʼ xa tal lajuneb jabile, mas xa ta voʼlajuneb kʼopetik ta México jelubtasbil li vunetik lokʼem ta Vivliae, jech kʼuchaʼal maya, náhuatl xchiʼuk tsotsil. Ta skoj taje, li tsobobbailetik ta batsʼi kʼopetik xchiʼuk ta senya kʼope epajem xa, leʼ toʼox tal ta lajuneb jabile oy toʼox 72, pe li avie oy xa 1,200. Lek jamal xvinaj ti jaʼ Dios chakʼ chʼiuk ta yoʼonton krixchanoetik li meleletik ta Vivlia ti tstsʼunik o chcholik li yajrextikotak Jeovae (1 Corintios 3:5-7).

Ta 80 kʼopetik kʼun noʼox ta aʼyel jelubtasbil li Vivliae

Li avie, li yajrextikotak Jeovae tspasik imprimir ta 80 kʼopetik li Vivlia Traducción del Nuevo Mundo de las Santas Escrituras sbie, oy tspasik imprimir ta sliklejal o jvokʼ noʼox. ¿Kʼuyelan yiloj krixchanoetik taje? Jun yajrextiko Jeova ta Sudáfrica xi laj yal ta sventa jlik Vivlia ta tsuana kʼop: «¡Toj jtunel tajek! Ta skoj ti kʼun noʼox ta aʼyel li kʼopetik tstunese, ta jkʼupin tajek skʼelel. Ta melel, mas to ta jkʼuxubin li sKʼop Diose». Jun vinik ta Mozambique ti tskʼel Vivlia ta tsonga kʼope, xi la stsʼibae: «Oy xa onoʼox kuʼunkutik yan vunetik ta tsonga ti lokʼemik ta Vivliae, pe jaʼ skʼan toʼox li Vivliae. Xkoʼolaj kʼuchaʼal jaʼ noʼox tsots tajek ch-avan xchiʼuk xleblun li chauke, pe ti chʼabal chakʼ voʼe. Pe kʼalal laj yichʼ pasel li Traducción del Nuevo Mundo ta tsongae, jaʼ to lik yakʼ yaʼeluk li voʼe».

Li buchʼutik tsjelubtasik ta yan kʼop li lekil aʼyejetik chal Vivliae xchiʼuk li buchʼutik chbat yakʼbeik yan krixchanoetike, yakal chakʼik xkʼot ta pasel jun voʼneal albil kʼop. Jaʼ xi laj yal stuk li Jesucristoe: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale» (Mateo 24:14, Ch).

[Tsʼib ta yok vun]

[Lokʼol ta pajina 15]

TRADUCCIÓN YANTIK

DEL NUEVO MUNDO VUNETIK

Ta sliklejal

o jvokʼ noʼox

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

YEPAL KʼOPETIK

[Lokʼol ta pajina 15]

Oy 2,300 buchʼutik chtunik ta sjelubtasel ta voʼob sien kʼopetik li vunetik lokʼem ta Vivliae

BENÍN

ESLOVENIA

ETIOPÍA

GRAN BRETAÑA