Li Jeremiase muʼyuk bu xikta sba
Chanubtaso avalab anichʼnabik
Li Jeremiase muʼyuk bu xikta sba
¿MI OY chibajem avoʼonton chavaʼi aba bakʼintik xchiʼuk ti mu xa xa kʼan chavakʼbe yipale? *... Ep buchʼu jech chaʼi sbaik. Li chex kerem Jeremiase jech laj yaʼi sba. Pe li stuke muʼyuk bu laj yikta sba akʼo mi oy kʼusi tspasik o chalik li krixchanoetike. Jkʼeltik kʼu yuʼun stuk noʼox jech ilat yuʼun Dios xchiʼuk kʼu yuʼun chibaj yoʼonton li Jeremiase.
Kʼalal skʼan toʼox xvokʼ li Jeremiase, li melel Diose, li Jeovae, la stʼuj sventa chkʼot ta j-alkʼop. Li Jeremiase skʼan chalbe jteklum ti muʼyuk xmuyubaj li Diose, yuʼun muʼyuk chchʼunbeik smantal. ¿Mi xa naʼ kʼusi laj yalbe Jeova li Jeremías kʼalal echʼ xaʼox jayibuk jabile?... «Mu to jnaʼ xiloʼilaj, yuʼun queremun to.»
¿Kʼu van yelan la stakʼ li Jeovae?... Ta slekil yoʼonton xchiʼuk tukʼ xi laj yalbee: «Mu xaval jech ti queremot toe, yuʼun ti bu chajtacot batele persa te chabat, xchiʼuc persa chavalbe yaʼyic scotol li cʼusitic chacalbote. Cʼalal te oyot ta stojolique, mu me xaxiʼ». ¿Kʼu yuʼun? «Vuʼun chajcoltaot», xi laj yal li Jeovae (Jeremías 1:4-8).
Akʼo mi jech, jech kʼuchaʼal laj xa kaltike, ta tsʼakale chibaj yoʼonton li Jeremiase. Yuʼun jaʼ ta skoj ti la snaʼleik ti chtun ta stojolal Diose. Li Jeremiase chal ti tstseʼinik xchiʼuk ti chnaʼleat yuʼun li krixchanoetik ta skotol orae, jaʼ yuʼun laj snop chikta sba. «Muʼyuc xa chicʼopoj ta sventa li Mucʼul Diose», xi laj yal. Pe ¿mi ta melel laj yikta spasel?
Mas tsʼakale laj yal ti lik tsanuk ta yoʼonton jech kʼuchaʼal kʼokʼ ta sbakiltak li skʼop Diose xchiʼuk ti mu xa xuʼ spajese (Jeremías 20:7-9). Akʼo mi xiʼ bakʼintik li Jeremiase, la spas li kʼusi lek chil Diose ta skoj ti skʼanoj tajeke. Jkʼeltik kʼuxi chabiat yuʼun Dios ta skoj ti tukʼ laj yakʼ sbae.
Li Jeovae laj yalbe Jeremías ti mi mu xiktaik spasel li kʼusitik chopol li jteklume, li Jerusalene ta xichʼ lajesel. Kʼalal laj yaʼiik li krixchanoetik li kʼusi laj yal li j-alkʼope, ilinik xchiʼuk xi laj yalike: «Li vinic liʼi ta persa ta xichʼ milel». Pe li Jeremiase xi xvokolet laj yale: «Jaʼ chʼunbeic cʼusi chal li Mucʼul Dios cuʼuntique». Ta tsʼakale laj yal ti mi milate, jaʼ ta smilik jun vinik ti muʼyuk smul ti tʼujbil yuʼun Dios sventa chpʼijubtasatike. ¿Mi xa naʼ kʼusi kʼot ta pasel ta tsʼakal?...
Li Vivliae xi chale: «Li banquilaletic xchiʼuc scotol jteclume jech laj yalbeic li paleetique xchiʼuc li jʼalcʼopetique: “Li vinic liʼi muʼyuc smul ti chichʼ milele, yuʼun jaʼ ta sventa Mucʼul Dios cuʼuntic ti jech tal yalbutique”, xutic». Ta skoj ti muʼyuk laj yakʼ sba ta tsalel ta skoj xiʼele, li Diose la xchabi. Li avie jkʼeltik kʼusi kʼot ta stojolal Urías (Uriya), yan yaj-alkʼop Jeova, ti jelel li kʼusi la spase.
Li Vivlia chal, ti Uriase laj yal li kʼusi chkʼot ta stojolal li Jerusalene, jech kʼuchaʼal laj yal li Jeremiase. Pe kʼalal kap sjol ta stojolal Urías li ajvalil Joacime (Jehoiaquim), ¿mi xa naʼ kʼusi la spas li j-alkʼop taje?... Xiʼ, laj yikta spasel li kʼusi albat yuʼun Diose xchiʼuk jatav batel ta Egipto. Jaʼ yuʼun li ajvalile la stak batel sviniktak sventa chikʼik sutel. ¿Mi xa naʼ kʼusi la spas ta tsʼakal li chopol ajvalil taje?... ¡La smil li Uriase! (Jeremías 26:8-24.)
¿Kʼu yuʼun van jaʼ la spoj Jeremías li Jeovae, ti jaʼ muʼyuk li Uriase?... Yuʼun akʼo mi xiʼ bakʼintik li Jeremiase, muʼyuk bu laj yikta spasel li kʼusi tskʼan Diose xchiʼuk muʼyuk bu xjatav. Muʼyuk bu xikta sba. Pe li Uriase laj yikta sba. ¿Kʼusi xuʼ jchantik ta sventa li Jeremiase?... Xuʼ van tsots chkaʼitik bakʼintik spasel li kʼusi tskʼanbutik Jeovae, pe skʼan ti jpat-o koʼontontik ta stojolale xchiʼuk ti jchʼuntik li kʼusi chale.
[Tsʼib ta yok vun]
^ Mi yakal cha kʼel xchiʼuk jun olol li loʼil liʼe, pajan jlikeluk li bu oy oxib puntoetike, xchiʼuk tijbo yoʼonton akʼo yal ta skʼop stuk li sloʼile.
Sjakʼobiltak:
❍ ¿Kʼusi abtelal akʼbat spas yuʼun Dios li Jeremiase?
❍ ¿Kʼu yuʼun tskʼan ox chikta sba li j-alkʼope?
❍ ¿Kʼu yuʼun jaʼ la spoj Jeremías li Jeovae, ti jaʼ muʼyuk li Uriase?
❍ ¿Kʼusi la achan ta stojolal li Jeremiase?