Xchibal jecheʼ loʼil: Li chopol krixchanoetike chil svokolik ta kʼatinbak

¿Kʼuxi ilik talel li jecheʼ loʼile? «Ta skotol filosofoetik li ta época clásica ta Greciae, jaʼ mas chʼambil li kʼusi laj yal Platón ta sventa li kʼatinbake.» (Historia de los infiernos, yuʼun Georges Minois, pajina 64.)

«Te xa noʼox ta oʼloltik batel siglo 2 d.C., jlom yajtsʼaklomtak Cristo ti xchanojik li chanubtaseletik yuʼun jgriegoetike tsots skʼoplal laj yaʼiik ti skʼan xalik li kʼusi xchʼunojik ta sventa taje [...]. Li chanubtasel mas lek laj yaʼiike jaʼ li kʼusi chal Platone.» (The New Encyclopædia Britannica, 1988.)

«Li relijion Katolikae chchanubtasvan ti oy kʼatinbake xchiʼuk ti te oy-o sbatel osile. Li xchʼulel buchʼutik tsots smul chchamike ta ora noʼox chbatik ta kʼatinbak kʼalal mi chamike xchiʼuk jaʼ te chil svokolik li ta kʼatinbake, “li kʼokʼ ti mu xtupʼ sbatel osile” [...]. Li kastigo mas toj tsots ta kʼatinbake jaʼ ti chʼakbilik ta sbatel osil ta stojolal li Diose.» (Catecismo de la Iglesia Católica, tercera edición revisada, pajina 242.)

¿Kʼusi chal li Vivliae? «Li bochʼotic cuxulic toe snaʼic ti ta onoʼox xchamique, pero li bochʼotic chamenic xae mu xa cʼusi snaʼic o, [...] yuʼun cʼalal me labat ta yavil animaetique, muʼyuc xa abtel, muʼyuc cʼusi stacʼ pasel, muʼyuc xa cʼusi jnaʼtic, muʼyuc xa bijubtasel.» (Eclesiastés 9:5, 10.)

¿Kʼusi chakʼ jchantik ta sventa kʼuyelan oy animaetik li teksto ta Vivlia taje? ¿Mi yakal van chil svokolik sventa tstoj smulik li ta «yavil animaetique»? Moʼoj, yuʼun li versikuloe chal ti «mu xa cʼusi snaʼic o[e]». Ta melel, li animaetike mu xa kʼusi chaʼiik xchiʼuk mi jaʼuk xa chil svokolik. Jaʼ yuʼun chkaʼibetik smelolal kʼu yuʼun li moltotil Jobe, la skʼanbe Dios ti akʼo xnakʼat ta «yavil animaeti[k]» kʼalal jaʼo chil tsatsal chamele (Job 14:13). Ti jaʼuk bu chichʼik akʼbel svokolik sbatel osil li animaetike ¿mi la van skʼanbe Dios jechuk ti akʼo xnakʼat ta yavil animaetik o kʼatinbak li Jobe? Moʼoj kʼuxi un. Li ta Vivliae, li yavil animaetike jaʼ li mukinal ta komon ti bu chbat li animaetike, ti ta alel noʼoxe jaʼ ti bu muʼyuk xa kʼusi chichʼ pasel tee.

Li kʼusi laj xa jchapbetik skʼoplal sventa li kʼatinbake koʼol chal kʼuchaʼal li Vivliae xchiʼuk mas stakʼ chʼunel. ¿Kʼusi xa noʼox mulil xuʼ spas jun krixchano yoʼ sta-o xichʼ akʼbel kastigo sbatel osil yuʼun li jkʼanvanej Diose? (1 Juan 4:8.) Pe, mi jaʼ jun jecheʼ loʼil li vokolil ta kʼatinbake, ¿kʼusi xuʼ xkaltik ta sventa li vinajele?

Kʼelo li versikuloetik liʼe: Salmo 146:3, 4; Hechos 2:25-27; Romanos 6:7, 23.

LI KʼUSI MELELE:

Li Diose muʼyuk chakʼbe kastigo krixchano ta kʼatinbak.

[Stojel ta vokol ta pajina 5]

Barrators—Giampolo/The Doré Illustrations For Danteʼs Divine Comedy/Dover Publications Inc.