Yoxibal jecheʼ loʼil: Skotol li lekil krixchanoetike chbatik ta vinajel

¿Kʼuxi ilik talel li jecheʼ loʼile? Li ta siglo 2, kʼalal chamemik xaʼox skotol li yajtakboltak Jesuse, lik stsak yipik jtsop krixchanoetik ti chchanbeik skʼoplal Dios (teólogos) ti Paleetik ta Chʼulna biiltasbilik avie. Jech kʼuchaʼal chal jun ensiklopediae, «chakʼik toʼox ta chanel ti jun chʼulelal ti laj xaʼox yikta komel sbekʼtale tsta lekilal ta vinajel ta ora noʼox mi laj xaʼox yichʼ sakubtasel kʼalal mi chamem xaʼoxe» (New Catholic Encyclopedia, 2003).

¿Kʼusi chal li Vivliae? «Xcuxet noʼox yoʼnton li bochʼo mucʼ noʼox yoʼntonique, yuʼun jaʼ ch-acʼbat sventainic li banamil ti albil scʼoplale.» (Mateo 5:5.)

Akʼo mi laj yal Jesús ti chbat xchapanbe yavil bu chkʼotik ta vinajel li yajtsʼaklomtake, muʼyuk laj yakʼ ta aʼyel ti chbatik ta vinajel skotol li lekil krixchanoetike (Juan 3:13; 14:2, 3). Jvules ta joltik ti la skʼan ta orasion akʼo pasuk kʼusi tskʼan yoʼonton Dios «liʼ ta banamil» jech kʼuchaʼal «te ta vinajele» (Mateo 6:9, 10). Ta melel, oy chaʼtos kʼusi xuʼ staik li tukʼil krixchanoetike. Li uni jtsope chbat tspasik mantal xchiʼuk Cristo ta vinajel, pe jutuk mu skotoluk li krixchanoetike chkuxiik sbatel osil ta Balumil (Apocalipsis 5:10).

Ta tsʼakale, li relijion Katolika ta voʼnee lik sjel li yabtel akʼbil ta Balumile. Jun ensiklopedia chal ti «relijion Katolikae ta kʼunkʼun lik stsakbe yabtel li Ajvalilal yuʼun Dios ti malabile» (The New Encyclopædia Britannica). Sventa stsak mas yipe, lik stikʼ sba ta politika, akʼo mi jamal laj yal Jesús ti maʼukik «sventa banamil» li yajtsʼaklomtake (Juan 15:19; 17:14-16; 18:36). Ta skoj li ajvalil ta Roma ti Constantino sbie, li relijion Katolikae la sjel li kʼusitik mas tsots skʼoplal xchʼunoje. Jech kʼuchaʼal ta jkʼeltike, june jaʼ te tsakal skʼoplal ti kʼuyelan Diose.

Kʼelo li versikuloetik liʼe: Salmo 37:10, 11, 29; Juan 17:3; 2 Timoteo 2:11, 12.

LI KʼUSI MELELE:

Jutuk mu skotoluk li lekil krixchanoetike chkuxiik sbatel osil ta Balumil, maʼuk ta vinajel.

[Stojel ta vokol ta pajina 6]

Art Resource, NY