Li Jesuse skotol ora la xchʼun mantal
Chanubtaso avalab anichʼnabik
Li Jesuse skotol ora la xchʼun mantal
¿MI TSOTS chavaʼi xchʼunel mantal? *... Mu xa vat avoʼonton, jkotoltik jech chkaʼitik. ¿Mi anaʼoj ti oy bakʼintik vokol laj yaʼi xchʼunel mantal li Jesús eke?...
¿Buchʼu skʼan xa chʼunbe smantal?... Jaʼ li atot ameʼe. Jech kʼuchaʼal chal Vivliae: «Alab nichʼnabetic, chʼunbeic smantal atot ameʼic ta sventa Cajvaltic» (Efesios 6:1). Ta melel la xchʼunbe smantal stot smeʼ li Jesuse. ¿Mi xa naʼ buchʼu li stot smeʼe?... Veno, pe li sTot ta melele jaʼ li Jeova Diose, ti jaʼ jTotik eke (Mateo 6:9, 10). Mi jaʼ la anop ta stojolal li José xchiʼuk Mariae, jaʼ onoʼox stot smeʼ maʼ taje. ¿Kʼuxi kʼot ta stot smeʼ?...
Jun anjel ti jaʼ sbi Gabriel laj yalbe María ti chchiʼin yole. Pe ¿kʼuxi xa noʼox chkʼot ta pasel jech ti muʼyuk xchiʼinoj vinike? Li Jeovae tspas jun skʼelobil juʼelal. «Ta sventa stsatsal Dios ta vinajel ta xlic achiʼin li avole —xi albat yuʼun anjel li Mariae—. Li olol ta xvocʼ avuʼune jaʼ Xchʼulnichʼon Dios ta xcʼot sbi.» (Lucas 1:30-35.)
Li Jeovae la sjelubtasbe xkuxlejal ta yalajeb María li xNichʼone. Vaʼun, li Jesuse lik chʼiuk ta yalajeb li Mariae, jech kʼuchaʼal chchʼi li ololetik ta yut xchʼut smeʼike. Ta tsʼakale, li Josee nupun xchiʼuk li Mariae. Kʼalal jutuk xaʼox mu sta baluneb ue, vaʼun vokʼ li Jesuse. Jutuk mu skotoluk li krixchanoetike la snopik ti jaʼ mero stot li Josee, pe moʼoj, naka noʼox tsʼitesvan. Jaʼ yuʼun ta alel noʼoxe, li Jesuse chaʼvoʼ stot.
Kʼalaluk lajcheb toʼox sjabilal li Jesuse, oy kʼusi la spas sventa xakʼ ta ilel ti skʼanoj tajek li sTot ta vinajele, li Jeovae. Jkʼeltik kʼusi jaʼ. Li yutsʼ yalal Jesuse nopem onoʼox xaʼiik nom chanavik batel kʼalal chbatik ta Jerusalén li ta kʼin Koltaele. Pe kʼalal sutik xaʼox batel ta snaik te ta Nazarete, li José xchiʼuk Mariae laj yakʼik venta ti muʼyuk te xchiʼukik batel li Jesuse. ¿Mi cha kʼan cha naʼ kʼuxi chʼay yuʼunik?...
Veno, kʼalal jech kʼot ta pasele li José xchiʼuk Mariae oy xaʼox yan yalab xnichʼnabik (Mateo 13:55, 56). Jech noxtok, oy yan yutsʼ yalalik ti xchiʼukik batele, jech kʼuchaʼal Santiago, Juan, xchiʼuk li stot smeʼike, Zebedeo xchiʼuk Salomé, ti yikʼaluk jaʼ xchiʼil ta vokʼel li Mariae. Jaʼ yuʼun yikʼaluk van la snopik ti te xchiʼukik batel li Jesuse (Mateo 27:56; Marcos 15:40; Juan 19:25).
Kʼalal muʼyuk la staike, li José xchiʼuk Mariae chat yoʼonton sutik batel ta Jerusalén, vaʼun buyuk xa noʼox lik saʼik li Jesuse. Jaʼ to la staik ta yoxibal kʼakʼal te ta chʼulna. Li Mariae xi laj sjakʼbee: «¿Cʼu yuʼun ti jech laj apasbuncutique? La jtʼunotcutic xchiʼuc li atote. Ep laj cat coʼntoncutic avuʼun». Pe li Jesuse xi la stakʼe: «¿Cʼu yuʼun laj asaʼilanicun? ¿Me mu xanaʼic ti tscʼan liʼ oyun ta sna li Jtote?» (Lucas 2:45-50).
¿Mi chopol van ti kʼuyelan la stakʼ li Jesuse?... Li José xchiʼuk Mariae snaʼojik onoʼox van ti tskʼupin tajek ti chbat ta sna Dios li Jesuse (Salmo 122:1). Li Jesuse snaʼoj onoʼox ti jaʼ te baʼyel chbat saʼatuk yuʼun stot smeʼ li ta chʼulnae, ¿mi mu jechuk xa naʼ?... Li kʼusitik laj yal Jesuse jal te xnopnun kom yuʼun li Mariae.
¿Kʼu van yelan la spas sba Jesús ta stojolal stot smeʼ kʼalal echʼ xaʼox taje?... Li Vivliae chal ti «la xchiʼin sutel ta Nazaret li stot smeʼe; lec la xchʼunbe smantal li stot smeʼe» (Lucas 2:51, 52). ¿Kʼusi xuʼ xa chanbe taje?... Lek ti jech la takʼe, jaʼ ti skʼan xa chʼunbe smantal li atot ameʼe.
Jech kʼuchaʼal laj xa kiltike, li Jesuse la xchʼun mantal manchuk mi toj vokol laj yaʼi, manchuk mi jaʼ skʼan xchʼunbe smantal li sTot ta vinajele.
Jech kʼuchaʼal liʼe, li Jeovae laj yakʼbe yabtel liʼ ta Balumile: jaʼ ti chcham ta skoj li krixchanoetike. Kʼalal jun xaʼox akʼobal skʼan xchame, li Jesuse tskʼan xaʼox ti sjel snopben li Diose (Lucas 22:42). Manchuk mi jech, la xchʼunbe smantal li sTote. Jech kʼuchaʼal chal Vivliae, li Jesuse «laj yichʼ vocol, jech laj yaʼay cʼu xʼelan ta chʼunel li cʼusi tscʼan Diose» (Hebreos 5:8). ¿Mi xuʼ jech jpastik li voʼotike? ¿Mi ta jchʼuntik van mantal akʼo mi vokol chkaʼitik?...
[Tsʼib ta yok vun]
^ Mi yakal cha kʼel xchiʼuk jun olol li loʼil liʼe, pajan jlikeluk li bu oy oxib puntoetike, xchiʼuk tijbo yoʼonton akʼo yal ta skʼop stuk li sloʼile.
SJAKʼOBILTAK:
▪ ¿Kʼuxi kʼot ta smeʼ Jesús li Mariae, xchiʼuk kʼuxi ti chib stot kʼote?
▪ ¿Kʼu yuʼun muʼyuk laj yakʼik venta José xchiʼuk María mi te xchiʼukik batel li Jesuse?
▪ ¿Bu jotukal ti snaʼoj te chichʼ saʼel yuʼun stot smeʼ li Jesuse?
▪ ¿Kʼusi xuʼ xa chanbe li Jesuse?
[Lokʼol ta pajina 31]
¿Kʼu yuʼun xa naʼ ti baʼyel ox skʼan xbat saʼik ta chʼulna Jesús li José xchiʼuk Mariae?