Li jkʼel vunetike tskʼan tsnaʼik

¿Mi jaʼ skʼoplal Jesús li bankilal anjel Miguele?

▪ Jaʼ. Li ta skʼakʼalil Vivliae, jech kʼuchaʼal ta yantik lum avie nopem xaʼiik oy jayib sbi yuʼunik li jun krixchanoe. Jech kʼuchaʼal li moltotil Jobe, Israel sbi xtok (Génesis 35:10). Ti kʼuyelan laj yichʼ tsʼibael ta voʼne li sKʼop Diose, li jtakbol Pedroe oy voʼtos sbi: Symeón, Simón, Pedro, Cefas xchiʼuk Simón Pedro (Mateo 10:2; 16:16; Juan 1:42; Hechos 15:7, 14). Pe, ¿kʼuxi xuʼ jnaʼtik ta melel ti Miguel sbi xtok li Jesuse? Jkʼeltik batel li sprevailtak chal Vivliae.

Li biil Miguele voʼob velta ta jtatik ta Vivlia ti jaʼ chalbe skʼoplal jun tsatsal kuxlejal ti mu xvinaj ta kʼelele. Oxib velta ta jtatik ta slivroal Daniel. Li Daniel 10:13, 21 chal ti Miguele jaʼ la li «banquilal yajʼalmantal Diose» xchiʼuk «jaʼ li banquilal yajʼalmantal Dios chaxchabioxuque», xchiʼuk ti bat spoj jun anjel ti la sta svokol kʼalal jaʼo takbil batel ta spasel jun abtelale. Ta tsʼakale, li ta Daniel 12:1 te ta jchantik ti ta slajeb kʼakʼale «jaʼo chlic li banquilal jʼalmantal Miguele, jaʼ li bochʼo tscolta achiʼiltaque».

Ta mas tsʼakale te chichʼ albel skʼoplal yan velta li ta Apocalipsis 12:7, ti bu chal ti «Miguele xchiʼuc li jʼalmantaletic yuʼune la spasic pleito» ta vinajel ti bu te laj yichʼik jipel yalel tal liʼ ta Balumil li Satanás xchiʼuk spukujtake.

Mi xavakʼ venta li ta jujun bu laj xa jkʼelbetik skʼoplal li Miguele chakʼ ta ilel ti jaʼ jun anjel ti snaʼ xletovaje ti ta spoj xchiʼuk chchabi li slumal Jeovae, akʼo mi jaʼ ta stsak sba ta kʼop xchiʼuk Satanás, li bankilal yajkontra Jeovae.

Li ta Judas versikulo 9, te chalbe skʼoplal xtok li Miguele xchiʼuk chal ti jaʼ «banquilal jʼalmantal[e]». Li jpʼel kʼop bankilal j-almantal xi ta Vivliae jun noʼox buchʼu chalbe skʼoplal, maʼuk ti oy jayvoʼike, yuʼun mi jotuk bu bankilal j-almantaletik xi chichʼ tael li ta Vivliae. Jech xtok li ta 1 Tesalonicenses 4:16 ta stunes ek li jpʼel kʼop taje, ti bu xi laj yalbe skʼoplal jtakbol Pablo kʼalal chaʼkuxiem xaʼox li Jesuse: «Chyal tal ta vinajel stuc li Cajvaltique [li Jesuse], oy bochʼo tsots ch-avan tal, tsots chal mantal. Tsots ch-avan tal li banquilal yajʼalmantal Diose, xchiʼuc chcaʼitic oqʼues noxtoc». Liʼe chakʼ kiltik ti jaʼ bankilal yaj-anjel Dios li Jesucristoe, o jaʼ jpas mantal yuʼun li anjeletike.

Li kʼusi laj xa jkʼelbetik skʼoplale, ¿kʼusi chakʼ kiltik? Chakʼ kiltik ti jaʼ bankilal anjel Miguel li Jesuse. Li chaʼtos sbi taje, chakʼ kaʼitik ti jaʼ yabtel spakbel skʼoplal li mukʼul pas mantal yuʼun Diose, yuʼun li biil Miguele jaʼ skʼan xal «¿Buchʼu Jech Kʼuchaʼal li Diose?», xchiʼuk Jesús, ti jaʼ skʼan xal «Jaʼ Chpojvan li Jeovae». Filipenses 2:9 xi chale: «Li Diose la stoy muyel cʼalal to ta toyol [li Jesucristoe]. Laj yacʼbe jun sbi ti echʼem smucʼul ta scotol yan biiletique».

Tsots skʼoplal skʼan jnaʼtik ti maʼuk to liʼ lik xkuxlejal kʼalal vokʼ ta balumil li Jesuse. Li anjel bat svulaʼan Mariae laj yalbe ti ta stsatsal o svuʼel Dios ta xchiʼin li yole, xchiʼuk ti Jesús chakʼbe sbie (Lucas 1:31). Kʼalal jaʼo liʼ tspas yabtel ta Balumil li Jesuse, laj yalilan ti te xa onoʼox kuxul ta vinajele (Juan 3:13; 8:23, 58).

Jaʼ yuʼun li Jesuse bankilal anjel Miguel sbi kʼalal muʼyuk toʼox talem ta Balumile. Kʼalal chaʼkuxi xchiʼuk sut muyel ta vinajele, la xchaʼtsak li yabtel onoʼox ta jpas mantal ta stojolal li anjeletike, sventa «jech ichʼbil ta mucʼ chcʼot li Dios Totile» (Filipenses 2:11).