1 ¿Kʼu yuʼun skʼan jpastik?
LI ORASIONE. Oy ep loʼiletik ta Vivlia ti xojtikinik li krixchanoetike, pe junantik noʼox ti labal sba tajek chaʼiike. Jchantik batel vukub sjakʼobiltak ti nopem xaʼi tsjakʼik li krixchanoetike xchiʼuk li stakʼobiltak chakʼ li Vivliae. Chib srasonal kʼusi tskʼan tsta li mantaletik liʼe: baʼyel, jaʼ ti xichʼik tijbel yoʼontonik sventa spasik orasion li buchʼutik muʼyuk to tspasike. Xchibal, sventa xlekub li kʼuyelan tspas s-orasionik li buchʼutik tspasik xa onoʼoxe.
VOKOL ta tael junuk lum o junuk relijion ti muʼyuk bu tspasik orasione. Manchuk mi stukik o mi ep tsobolik li krixchanoetike, skotolik tspasik orasion. Jlome ta chʼulna, ta templo, ta snail tsobobbail, ta mezquita o ta pagoda. Tstunesik rosario xtok, slivroal orasionetik, lokʼoletik, orasion tsʼibabil ta uni bikʼtal pechpech teʼetik, cilindro de oración xchiʼuk jlome chakʼ skejlebik sventa tspasik orasion
Muʼyuk yan kuxlejal ta sba Balumil ti tspas orasione, jaʼ noʼox li krixchanoetike. Kʼuchaʼal li chonbolometike chi jveʼ, chkuchʼtik voʼ xchiʼuk chkichʼtik ikʼ. Jech xtok chi jvokʼ, chi jchʼi xchiʼuk chi jchamutik (Eclesiastés 3:19). Akʼo mi jech, jaʼ noʼox li krixchanoutik ta jpastik orasione. ¿Kʼu yuʼun?
Yuʼun chtun kuʼuntik. Li orasione chtun kʼuchaʼal jun bakʼo sventa xkʼotik o xnopajik li krixchanoetik ta stojolal li kʼusi spʼisojik ta chʼul xchiʼuk ti te oy-o sbatel osile. Li Vivlia chal ti kʼusi taje oy xa onoʼox ta koʼontontik kʼalal kichʼtik pasele (Eclesiastés 3:11). Li Jesuse xi laj yale: «Xmuyubajik li buchʼutik oy ta sjol yoʼontonik ti chtun yuʼunik mantale» (Mateo 5:3, NM).
Ta skoj ti oy ta sjol yoʼonton krixchanoetik ti chtun yuʼunik li mantale, oy epal temploetik, ep ta tos kʼusitik tstunesik xchiʼuk ep xa noʼox yorail chchʼakik sventa tspasik orasion. Melel onoʼox, junantik krixchanoetike tskʼanbeik koltael yan krixchanoetik o tsaʼ ta yoʼonton stukik li kʼusi chtun yuʼunik ta mantale. Pe, ¿mi mu jechuk chavil ti oy noʼox spajeb xuʼ xkoltavan li krixchanoe? Jech, yuʼun toj kʼunutik, j-echʼel beutik xchiʼuk oy noʼox spajeb ti kʼuyelan chkaʼibetik smelolal li kʼusitik chkʼot ta pasel ta balumile. Jaʼ noʼox xuʼ xakʼbutik kʼusi chtun kuʼuntik ta sventa mantal li buchʼu kuxul sbatel osile, ti oy ep spʼijil xchiʼuk ti oy sjuʼele. Pe ¿kʼusitik ti tstij koʼontontik ta spasel orasione?
Jech kʼuchaʼal liʼe, ¿mi oy kʼusi anuptanoj ti muʼyuk buchʼu xa sbeiltas, xa stojobtas o ti muʼyuk buchʼu stakʼbot li kʼusi cha kʼan cha naʼe? Kʼalal oy avokole, xuʼ van ta skoj ti oy buchʼu chame, kʼalal oy kʼusi tsots skʼoplal cha nop cha pase o mi oy kʼusi tsots chopol kʼot ta pasel avuʼune, ¿mi oy avaʼioj ti mu junuk avoʼonton la kom kʼalal la avichʼ patbel avoʼontone, kʼalal la avichʼ beiltasele o kʼalal la avichʼ akʼbel pertone?
Li Vivliae chal ti jaʼ srasonaltak ti ta jpastik-o orasione. Li Vivliae jaʼ jun livro ti xuʼ jpat koʼontontik ti melel kʼusitik chal ta sventa taje, chalbe skʼoplal xtok epal orasionetik ti la spasik tukʼil viniketik xchiʼuk antsetik ti la skʼan spatobil yoʼontonik, beiltasel xchiʼuk pertone. Jech xtok la skʼanik albel smelolal li kʼusi tsots ta aʼibel skʼoplale (Salmo 23:3; 71:21; Daniel 9:4, 5, 19; Habacuc 1:3).
Skotol li orasionetik ta jtatik ta Vivliae oy kʼusi koʼolik-o. Li buchʼutik la spasike oy kʼusi tsots skʼoplal snaʼojik sventa xichʼik aʼibel: snaʼojik buchʼu skʼan skʼoponik batel. Taje muʼyuk stsakojik ta venta li krixchanoetik avie, manchuk mi yolbaj yuʼunik o mi moʼoj.