2 ¿Buchʼu skʼan jkʼopontik?
LI AVI kʼakʼale, epal krixchanoetik xchʼunojik ti mu ventauk buchʼu tskʼoponik li ta orasione, yuʼun tsnopik ti skotol li orasionetike chkʼot la ta stojolal Dios. Taje jaʼ jech tsnopik li buchʼutik tikʼilik ta yalel o tskʼanik ti akʼo pasuk ta jun skotol li relijionetike xchiʼuk li buchʼutik chalik ti lek skotol li relijionetike. Pe ¿mi melel taje?
Li sKʼop Diose jamal chakʼ ta ilel ti epal orasionetike maʼuk chalbeik li buchʼu chaʼi ta melele. Ta voʼnee, kʼalal laj yichʼ tsʼibael li Vivliae, nopem xaʼiik ti jaʼ tskʼoponik li santoetik o lokʼoletike. Pe, li Diose laj yalbe ep ta velta li steklumal ti akʼo mu jechuk spasike. Ta Salmo 115:4-6 chal ti santoetike «oy xchiquinic, pero mu xaʼyic cʼop». Li kʼusi chal liʼe lek jamal ta aʼiel: ¿mi oy xa noʼox srasonal ti chichʼ kʼoponel jun dios ti mu xaʼi kʼoponele?
Sventa xkiltik ti mu xaʼiik kʼoponele, jchanbetik skʼoplal li labal sba loʼil ta Vivlia ti bu chal ti laj yakʼik jun trato li j-alkʼop Elías xchiʼuk li paleetik yuʼun Baale: li Eliase jaʼ tskʼopon li sDiose yan li stukike jaʼ tskʼoponik li Baale, vaʼun ti buchʼu tstakʼ tale jaʼ chakʼ ta ilel ti jaʼ li melel Diose. Li yaj-alkʼoptak Baale la xchʼamik li tratoe, vaʼun lik vokoletikuk ta skʼoponel li sdiosike. Jal tajek te xvokoletik, «pero muʼyuc bochʼo xtacʼov; muʼyuc bochʼo xʼaybunuc li scʼopique» (1 Reyes 18:29). ¿Mi jech ikʼot ta stojolal li Elías eke?
Moʼoj, yuʼun kʼalal naka toʼox laj yoʼonton ta spasel orasione, li Diose la stak tal kʼokʼ ta vinajel, jech ikʼakʼ li matanal laj yakʼ li j-alkʼope. ¿Kʼu yuʼun jaʼ takʼbat li Eliase? Li stakʼobile te ta jtatik ta 1 Reyes 18:36, 37 li ta orasion la spas Eliase. Li ta orasion ti jlikel noʼox la spase —ti te van 30 ta pʼel kʼop li ta voʼneal hebreoe— oxib velta laj yalbe sbi li Diose, ti jaʼ li Jeovae. *
¿Kʼu yuʼun tsots skʼoplal taje? Veno, li biil Baale jaʼ skʼan xal «yajval», jaʼ toʼox sdiosik li jcanaanetike xchiʼuk ep ta tos kʼuyelan xojtikinik. Pe li sbi Jeovae stuk noʼox jech, yuʼun jaʼ jech chichʼ ojtikinel ta sjunul vinajel-balumil. Li stuke xi laj yale: «Vuʼun li Mucʼul Dios [Jeova] jbie, mu xcacʼ bochʼo yan chichʼ li jlequilal cutsilale» (Isaías 42:8).
¿Mi sta-o van jnoptik ti jun noʼox dios la staik ta kʼoponel li Elías xchiʼuk li yaj-alkʼoptak Baale? Moʼoj. Sventa chichʼik ta mukʼ li Baale, bakʼintike chakʼik ta chikʼbil matanal li krixchanoetike xchiʼuk chmulivajik, ti chilbajin xchiʼuk tsok yuʼun li krixchanoetike. Pe li yichʼel ta mukʼ Jeovae mi jsetʼuk xchopolal xchiʼuk muʼyuk tsuj ta spasel kʼusitik ibal sba li jteklume. Melel onoʼox ti mu jaʼuk kʼot ta stojolal Baal li orasion laj yichʼ pasbel li Jeovae. Taje xkoʼolaj kʼuchaʼal ta jtakbetik batel junuk karta jun kamigotik ti lek ichʼbil ta mukʼe. ¿Mi mu jechuk ti muʼyuk jmalaojtik ti chkʼot ta skʼob yan krixchano ti ojtikinbil ti chopole xchiʼuk ti kontra chil li kʼusitik tspas li avamigoe?
Jech kʼuchaʼal laj yakʼ ta ilel Eliase, mu skotoluk orasionetik chkʼot ta stojolal li Diose
Li buchʼutik tspasbeik orasion Jeovae jaʼ tstaik ta kʼoponel li Jpasvaneje, li Totil yuʼun skotol krixchanoetike. * Li j-alkʼop Isaiase xi laj yal li ta s-orasion la spase: «Pero li voʼote Mucʼul Dios, voʼot noʼox jtototcutic o» (Isaías 63:16). Jaʼ laj yalbe skʼoplal ek kʼalal xi laj yalbe yajtsʼaklomtak li Jesuse: «Ta xibat ta stojol li Jtote; jaʼ Atotic ec. Jaʼ li Dios cuʼune; jaʼ Dios avuʼunic [ek]» (Juan 20:17). Jaʼ yuʼun, mi jaʼ sTot Jesús li Jeovae, jaʼ li buchʼu la sta ta kʼoponel eke xchiʼuk jaʼ li buchʼu skʼan skʼoponik li yajtsʼaklomtake (Mateo 6:9).
Pe ¿mi oy chal Vivlia ti skʼan jkʼopontik li Jesuse, li Mariae, li santoetike o li anjeletike? Moʼoj, yuʼun jaʼ noʼox skʼan jkʼopontik li Jeovae. Jkʼeltik chib srasonal kʼu yuʼun. Baʼyel, yuʼun li spasel orasione jaʼ sventa yichʼel ta mukʼ li Diose, xchiʼuk jech kʼuchaʼal chal li sKʼop Diose jaʼ noʼox stuk skʼan xkichʼtik ta mukʼ li Jeovae (Éxodo 20:5). Xchibal, yuʼun li Jeovae jaʼ chaʼibutik stuk li jkʼoptike (Salmo 65:2). Manchuk mi oy svaʼanojbe yajval li kʼusitik yan sbainoj spasele, oy jtos kʼusi ti muʼyuk svaʼanojbe yajvale: jaʼ ti chaʼi stuk li j-orasiontike.
Jaʼ yuʼun chaʼa, sventa xaʼibutik j-orasiontik li Jeovae, skʼan jaʼ jtatik ta kʼoponel. Li Vivliae xi chale: «Scotol li bochʼo tscʼanbicun vocole jaʼ chcolic» (Hechos 2:21). ¿Mi jaʼ van skʼan xal ti chaʼi skotol orasionetik li Diose ti jaʼ noʼox venta mi jaʼ ta jtatik ta kʼoponele? ¿O mi oy to kʼusi yan skʼan pasel?
^ par. 6 Li Vivliaetik ta tsotsile sjelubtasojik kʼuchaʼal «Mucʼul Dios», «Dios», «Cajvaltic» xchiʼuk «Ajvalil» (avokoluk kʼelo li tsʼib ta yok vun ta Éxodo 3:14).
^ par. 9 Jlom ti kʼusitik nopem xaʼi tspas ta srelijionike jaʼ ti mu xakʼik ta tunesbel sbi li Diose mi jaʼuk kʼalal tspasik orasione. Pe li biil taje oy van vukmil ta velta te chvinaj kʼalal laj yichʼ tsʼibael ta voʼne li sKʼop Diose, nopolik noʼox ta jtatik ta orasionetik xchiʼuk ta kʼejojetik ti la spasik li tukʼil yajtuneltak Diose.