EP KRIXCHANOETIKE mu xchʼunik mi chkoltavan li orasione. Pe li Vivlia chal ti oy sbalil ta melele (Lucas 22:40; Santiago 5:13). Tskoltautik sventa lek xkil jbatik xchiʼuk Dios xchiʼuk tskoltautik sventa lekuk xaʼi sba koʼontontik xchiʼuk jbekʼtal jtakopaltik. ¿Kʼuxi jech taje?

Jkʼeltik jun skʼelobil: kʼalal ch-akʼbat smoton jun olole, ¿kʼusi chal li stot smeʼe? Chalbeik akʼo xalbe kolaval li buchʼu laj yakʼ li matanale, ti mu jaʼuk noʼox oyuk ta yoʼonton tstoj ta vokole. Yuʼun kʼalal chlokʼ ta ketik stojel ta vokole, mas tstij koʼontontik jech ta jpasilantik-o. Taje jaʼ jech tajek chkʼot ta pasel kʼalal ta jkʼopontik li Dios eke. Jkʼeltik jun chibuk kʼuxi tskoltautik li orasione.

Orasion sventa stojel ta vokol. Kʼalal ta jtojbetik ta vokol Dios li kʼusitik lek kʼotem ta pasel ta jtojolaltike, mas ta jnopbetik skʼoplal li bendisionetik jtaojtike. Ta skoj taje, mas oy ta koʼontontik stojel ta vokol li kʼusitike, mas jun koʼontontik xchiʼuk xi jmuyubaj noʼox (Filipenses 4:6).

Skʼelobil: Li Jesuse la stoj ta vokol ti aʼibat xchiʼuk takʼbat yuʼun sTote (Juan 11:41).

Orasion sventa skʼanel perton. Kʼalal ta jkʼanbetik Dios akʼo xakʼbutik pertone chyamaj li xkʼuxul koʼontontik ta skoj jmultike. Tspʼijubtas li jol koʼontontike, yuʼun mas chkakʼtik venta kʼu to stsatsal bat li jmultike xchiʼuk tstijutik sventa akʼo lek jsutes koʼontontik.

Skʼelobil: Li Davide la spas orasion sventa tsutes yoʼonton (Salmo 51).

Orasion sventa ta jkʼan jpʼijiltik xchiʼuk beiltasel. Tskoltautik sventa mas bikʼit xkakʼ jbatik, tsvules ta joltik ti oy noʼox spajeb li kʼusitik spas kuʼuntike xchiʼuk sventa jpat koʼontontik ta stojolal li jTotik ta vinajele, ti maʼuk ta jpat koʼontontik ta jtuktike (Proverbios 3:5, 6).

Skʼelobil: Li Salomone la skʼan akʼo xbeiltasat xchiʼuk x-akʼbat spʼijil sventa tspas mantal ta Israel (1 Reyes 3:5-12).

Orasion kʼalal oy kʼusi tsots jnupojtike. Kʼalal oy kʼusi tsots chkat-o koʼontontike jaʼ noʼox xuʼ skoltautik mi jamal chkalbetik Dios li kʼusi chkaʼitike. Xchiʼuk mas ta jpat-o koʼontontik ta stojolal Jeova (Salmo 62:8).

Skʼelobil: Li ajvalil Asae la spas orasion kʼalal te xaʼox skʼeloj li yajkontratak ti toj tsotsike (2 Crónicas 14:11).

Orasion sventa buchʼu chtun yuʼunik koltael. Taje tskoltautik sventa mu jsaʼtik li kʼusitik ta jkʼan jtuktike xchiʼuk sventa jchʼiestik lekil talelaletik, jech kʼuchaʼal ti oyuk xkʼuxul koʼontontik xchiʼuk xkakʼ ta koʼontontik li svokol yantike.

Skʼelobil: Li Jesuse la spas orasion sventa li yajtsʼaklomtake (Juan 17:9-17).

Orasion sventa skʼupil kʼoptael Dios. Kʼalal ta jkʼupil kʼoptatik stalelaltak xchiʼuk kʼusitik kʼupil sba spasoj li Jeovae, mas ta xkichʼtik ta mukʼ xchiʼuk mas ta jkʼantik-o. Li orasionetik taje mas tsnopajesutik ta stojolal li Diose ti jaʼ li jTotik ta vinajele.

Skʼelobil: Li Davide la spas orasion sventa tskʼupil kʼopta li kʼusitik spasoj Diose (Salmo 8).

Li sbaliltak xuʼ jtatik kʼalal ta jpastik orasione, maʼuk noʼox te chpaj, yuʼun xuʼ jtatik «li jun oʼntonal chacʼ Diose [ti] echʼem to xjelov jech chac cʼu chaʼal ta jnop ta jcʼantic li vuʼutique» (Filipenses 4:7). Ta melel, jaʼ jun kʼulejal xuʼ jtatik ti jun koʼontontik li ta sba balumil liʼe. Pe xuʼ sta slekilal li jbekʼtal jtakopaltik xtoke (Proverbios 14:30). ¿Kʼuxi van ta tael li jun oʼontonal taje? ¿Mi oy kʼusi mas tsots skʼoplal skʼan jpastik o mi jaʼ noʼox ta kipal jtuktik?