Lekil aʼyejetik sventa li povreetike

LI SKʼOP Diose xi chalbutike: «Li bochʼotic abul sbaique mu xchʼayatic o ta oʼntonal» (Salmo 9:18). Xchiʼuk xi chalbutik ta sventa li Jpasvanej kuʼuntike: «Li voʼote chajam li acʼobe; chabusanbe yalel tal abendición scotol li cʼusitic cuxajtique» (Salmo 145:16). Li kʼusitik kichʼojtik albele mu jecheʼuk. Li Dios ti Skotol xuʼ yuʼune xuʼ slajesbe skʼoplal li povreale. ¿Kʼuxi ti tslajesbe skʼoplale?

Jun ants ti chalbe skʼoplal ta sventa takʼin xchiʼuk yan kʼusitik ta spʼejel Balumile, laj yal ta slivro ti muʼyuk lek kʼusi kʼotem ta pasel yuʼunik li buchʼutik tskʼan tskoltaik li povreetike. Li kʼusi laj yale jaʼ chakʼ ta ilel ti skʼan oyuk buchʼu oy sjuʼel xchiʼuk ti oyuk ta yoʼonton spasel sventa xlaj yuʼun li povreale. Jech xtok skʼan ti jun xa noʼox li buchʼu tsventain sjunul li Balumile, yuʼun li povreale jaʼ ta skoj ti jelelutik li ta spʼejel Balumile. Xchiʼuk xtok, skʼan xtojob xchapanel li kʼusi chlik-o povreale, taje jaʼ ti jaʼ noʼox tsaʼ li kʼusi tskʼan stuk li krixchanoe. ¿Bu xuʼ xichʼ tael li ajvalil ti xtojob leke?

Li Diose la stak tal xNichʼon sventa tal yalbe lekil aʼyej li povreetike. Li Jesuse laj yal li kʼusi takbil tal spasel kʼalal la skʼel ta Vivlia ti xi chale: «Li Espíritu yuʼun Diose liʼ oy ta jtojol. Jaʼ yuʼun la stʼujun, jech vocʼbil licom ta sventa yabtel. Jech tal calbe yaʼyic Lequil Aʼyej li bochʼotic abul sbaique» (Lucas 4:16-18).

¿Kʼusitik li lekil aʼyejetik taje?

Jaʼ me jun lekil aʼyej ti la svaʼan ta Ajvalil xNichʼon li Diose. Oy jayibuk srasonal ti jaʼ jun lekil Ajvalil li Jesuse: 1) jaʼ noʼox sta-o xkʼot ta Ajvalil yuʼun li krixchanoetike, 2) chkʼuxubin li povreetike xchiʼuk jech la xchanubtas li yajchankʼoptak ti akʼo xkʼuxubinvanik eke, xchiʼuk 3) xuʼ tslajes ti jaʼ noʼox tsaʼ li kʼusi tskʼan stuk li krixchanoetike. Kalbetik batel skʼoplal li oxtos taje.

1. Jaʼ noʼox sta-o xkʼot ta Ajvalil yuʼun mukʼta lumetik li Jesuse Li sKʼop Diose chal ti Jesuse «laj yichʼ acʼbel tsots yabtel [...] ta jujun lum, ta jujun banamil, ta jujuchop [kʼop] te chtunic ta stojol» (Daniel 7:14). ¿Mi xnop xa noʼox avuʼun li sbalil ti jun xa noʼox Ajvalil tsventain li krixchanoetike? Ta xlaj skʼoplal li ut-ut bail ta sventa li kʼusi chakʼ Balumile, yuʼun jmoj xa ta jtabetik sbalil. Li Jesuse laj yal ta melel ti jaʼ noʼox sta-o xkʼot ta Ajvalil yuʼun spʼejel Balumile, yuʼun xi laj yale: «Liʼacʼbat xa scotol jvuʼel ta sventainel li vinajel xchiʼuc banamile» (Mateo 28:18).

2. Chkʼuxubaj ta yoʼonton li povreetike Ti kʼu sjalil la xcholmantal li Jesuse kʼuxubaj ta yoʼonton li povreetike. Jech kʼuchaʼal liʼe, oy jun ants ti ep xaʼox tajek slajesoj stakʼin ta doktoretike, vaʼun la spikbe skʼuʼ Jesús sventa xkol-o li ta xchamele. Taje oy xaʼox ta lajcheb jabil ip ta tuchʼpatijel, jaʼ yuʼun tsakbil xa ta anemia chamel. Jech kʼuchaʼal chal li Mantale, li buchʼu chpike yuʼun jun jchamele muʼyuk xa lek chkom ta mantal. Pe li Jesuse laj yakʼ ta ilel slekil yoʼonton ta stojolal. Xi laj yalbee: «Tseb, lacol xa ta sventa xchʼunojel avoʼnton. Jaʼ yuʼun junuc avoʼnton batan, yuʼun icol xa li achamele» (Marcos 5:25-34).

Li kʼuyelan ichanubtasvan li Jesuse, oy sjuʼel sventa tsjelbe yoʼonton li krixchanoetike xchiʼuk ti jech snaʼuk xkʼuxubinvanike. Nopo avaʼi ti kʼusi laj yalbe Jesús li vinik ti la sjakʼ kʼusi xuʼ spas sventa smuyubtabe yoʼonton li Diose. Li vinik taje snaʼoj xa onoʼox ti skʼan jkʼan li jchiʼiltike, pe xi la sjakʼbe li Jesuse: «¿Bochʼo li jchiʼile?».

Li Jesuse laj yal li jun lokʼolkʼop ti ojtikinbile, ti jaʼ chalbe skʼoplal li jun lekil vinik ta Samaria, ti la skolta jun vinik ti «chamen xa icom yuʼunic yilel» li j-elekʼetike, ti jaʼo ilokʼ batel ta Jerusalén sventa chbat ta Jericoe. Jun pale ti jaʼo te chyal  talel li ta be taje, laj yil li vinik ti te mochole vaʼun la sjoy sbe, jaʼ jech la spas li jlevita vinik eke. «Tsʼacal te ilocʼ tal jun samaria vinic. Cʼalal laj yil li vinique, toj abul sba laj yil.» «La xpoxtabe scotol ti bu tuchʼemique» xchiʼuk laj yikʼ batel ta jun vayebal xchiʼuk la stoj li buchʼu oy ta sba li nail vayebal sventa tskʼele. Li Jesuse xi la sjakʼbe li vinike: «¿Bochʼo junucal la scuy ta xchiʼil li jun vinic ti imajat yuʼun jʼeleqʼuetique?». Li vinike xi la stakʼe: «Jaʼ li bochʼo icʼuxubinvane». Vaʼun li Jesuse xi laj yalbee: «Batan, bat cʼuxubinvanan jech ec li voʼote» (Lucas 10:25-37).

Li buchʼutik chkʼotik ta yajrextikotak Jeovae chchanik li kʼusi laj yakʼ ta chanel Jesuse, vaʼun chjel stalelik sventa tskoltaik li buchʼutik chtun yuʼunike. Jech kʼuchaʼal li ta slivro jun jtsʼibajom ants ta Letonia ti laj yalbe skʼoplal kʼalal ipaj ti te ch-abtej ta Potma ta sjabilal 1960, la stsʼiba li ta slivro Women in Soviet Prisons (Li antsetik ti te oyik ta chukinab sovietikoe), xi laj yale: «Kʼalal li ipaje [li antsetik yajrextikotak Jeovae] toj lek ti kʼuyelan la skʼelikune. Ti kʼuyelan la skʼelikune muʼyuk xa noʼox bu jech ta tael». Xi to laj yal xtoke: «Li yajrextikotak Jeovae toj tsots skʼoplal chilik skoltael li krixchanoetike, mu ventauk kʼusi srelijion o bu lumal likem tal».

Kʼalal laj yil svokolik ta takʼin jlom yajrextikotak Jeova li ta Ancón (Ecuadore), li yan yajrextikotak Jeovae la snopik ti kʼuxi xuʼ skoltaike: la smeltsanik veʼlil sventa chchonbeik li jtsak choyetik ta akʼobal kʼalal tsutik xaʼox tale (lokʼol ta batsʼikʼob). Ta bikʼit ta mukʼ la skolta sbaik li tsobobbail taje. Ta xlik spasik ta jun ora sob li veʼlile, jaʼ yuʼun meltsajem xaʼox kʼalal tsutik tal li jtsak choyetik li ta chanik ora ta sobe. Ti kʼuyepal la stsobik li takʼine la xchʼakbeik ta jujuntal ti kʼuyepal chtun yuʼunike.

Li loʼil taje jaʼ chakʼ ta ilel ti xuʼ yuʼun tsjel talelalil sventa xichʼ koltael li buchʼutik ta xtun yuʼunik ti kʼuyelan la spas li Jesuse xchiʼuk ti kʼuyelan ichanubtasvane.

3. Xuʼ sjel li kʼusi nopem xaʼi tspas krixchano li Jesuse Li saʼel kʼusi ta jkʼan noʼox jtuktike ojtikinbil ta buyuk noʼox. Mulil chakʼbe sbi li Vivliae. Jaʼ yuʼun li jtakbol Pabloe xi la stsʼibae: «Quiloj xa ti jech chcʼot ta pasel cuʼune. Acʼo me ta jcʼan ta jpas li cʼusi leque, pero jaʼ xaʼox liʼ oy ta jtojol li cʼusi chopole». Vaʼun xi to laj yale: «¿Bochʼo chiscoltaun ta sventa li jbecʼtal sventa lajele? Batsʼi coliyal Dios ti jaʼ la scoltaun ta sventa li Jesucristoe» (Romanos 7:21-25). Li kʼusi la skʼan laj yal Pablo liʼe, jaʼ ti la stunes Jesús sventa tskoltautik lokʼel ta mulil li Diose ti jaʼ noʼox ta jsaʼ li kʼusi ta jkʼan jtuktike. ¿Kʼuxi ti jech chkʼot ta pasele?

Kʼalal naka toʼox laj yichʼ voʼ li Jesuse, li Juan j-akʼvanej ta voʼe xi laj yakʼ ta ojtikinele: «Qʼuelavilic, leʼ xa xtal li chʼium chij yuʼun Dios ti chchʼaybe smul scotol cristianoetic ta banamile» (Juan 1:29). Jutuk xa skʼan ti spʼejel Balumile, ta xnoj ta krixchanoetik ti maʼuk xa jmulaviletike xchiʼuk ti maʼuk xa tsaʼ li kʼusi tskʼan noʼox stukike (Isaías 11:9). Taje jaʼ me jech tslajesbe skʼoplal li kʼusi chlik-o povreal li Jesuse.

¡Toj echʼ xa noʼox xi jmuyubaj ti jnaʼojtik ti chkʼot skʼakʼalil ti oy xa noʼox kuʼuntik li kʼusitik chtun kuʼuntike! Li sKʼop Diose xi chalbutik ta melele: «Te chotajtic chcuxic ta yolon tsʼusubtic xchiʼuc ta yolon higotic yuʼunic. Muʼyuc xa bochʼo chtal sibtasaticuc» (Miqueas 4:4). Li nichimal loʼil taje jaʼ chakʼ ta ilel ti chkʼot skʼakʼalil ti jkotoltik ch-ayan lek kabteltike, ti muʼyuk xa kʼusi chi jxiʼoe xchiʼuk ti chi jkuxi ta jun Balumil ti muʼyuk xa povreale, skotol taje jaʼ sventa yichʼel ta muk li Jeovae.