Li jkʼel vunetike tskʼan tsnaʼik

¿Mi chlik van tavanuk li kuxlejal sbatel osil ta Paraisoe?

▪ Li Vivliae chalbutik ti xuʼ xijkuxi sbatel osil liʼ ta Balumile (Salmo 37:29; Lucas 23:43, NM). Akʼo mi jech, ¿mi tan van xlik tavanuk li kuxlejal sbatel osil kʼalal naka tukʼ xaʼox skotol li kʼusitike?

Oy srasonal ti jech ta jakʼbe jbatik taje. Yuʼun akʼbil venta ti buchʼutik skotol kʼakʼal xchʼajetik noʼoxe mas tsvul yoʼontonik, ch-ipajik ta at-oʼonton xchiʼuk xuʼ sta mas svokolik. Jech xtok, mu kʼusi xa skʼanik li buchʼutik muʼyuk sbalil xkuxlejal chaʼiike o ti xtaet xa tajek chaʼiik li kʼusitik tspasike. Pe ¿mi muʼyuk sbalil li kuxlejal ta Paraisoe? ¿Mi chtavan van tajek li kʼusitik ta spasike?

Baʼyele, skʼan jnaʼtik ti buchʼu chakʼ li kuxlejal sbatel osile jaʼ li Jeovae, ti jaʼ yakʼoj ta naʼel li kʼusi chal Vivliae (Juan 3:16; 2 Timoteo 3:16). Li stalelal mas tsots skʼoplale jaʼ li kʼanelale (1 Juan 4:8). Li stuke skʼanojutik tajek xchiʼuk yakʼojbutik skotol li kʼusitik xuʼ jkʼupintike (Santiago 1:17).

Li Jpasvanej kuʼuntike snaʼoj ti ta jkʼan ta jkʼupintik lek li kabteltik sventa xijmuyubaje (Salmo 139:14-16; Eclesiastés 3:12). Li buchʼutik te chnakiik ta Paraisoe jaʼ noʼox tstabeik sbalil stukik xchiʼuk yutsʼ yalalik li yabtel tspasike, jech xtok oy me sbalil chaʼi sbaik (Isaías 65:22-24). ¿Mi ta van xtavan chavaʼi kʼalal jaʼ chapas li kʼusi kʼupilik sba chavaʼi spasel xchiʼuk ti mu xavaʼi chbat-o yuʼun kʼakʼale?

Jech xtok skʼan me jnaʼtik ti oy noʼox yajval ti buchʼu chakʼbe kuxlejal sbatel osil ta Paraiso li Jeovae, yuʼun jaʼ noʼox me xuʼ ta xkuxiik li buchʼu chchanbeik stalelal li Jesuse, ti jaʼ li xNichʼon Jeovae (Juan 17:3). Kʼalal liʼ toʼox oy ta Balumil li Jesuse, la skʼupin spasbel yabtel li sTote. La xchanubtas li yajtsʼaklomtak ti jaʼ mas xijmuyubaj kʼalal chkakʼtike ti jaʼ mu sta ti kʼalal chkichʼtike, taje jech laj yal xchiʼuk laj yakʼ ta ilel (Hechos 20:35). Mi pasem xaʼox ta Paraiso li Balumile, skotol li krixchanoetike jaʼ chakʼ ta yoʼontonik xchʼunel li chib mantal liʼe: skʼanel Dios xchiʼuk li xchiʼiltakike (Mateo 22:36-40). Nopo noʼox avaʼi ti skʼanojoxuk li krixchanoetik ti oy slekil yoʼontonike xchiʼuk ti tskʼupinik tajek spasel li yabtelike. ¿Mi chtavan van chavaʼi xchiʼinel li krixchanoetik taje?

¿Kʼusi to mas xuʼ jkʼupintik li ta Paraisoe? Skotol kʼakʼal oy to kʼusi xuʼ jchantik ta stojolal li Jpasvaneje. Ep kʼusitik tabil ta kʼelel li kʼusitik spasojan Jeovae (Romanos 1:20). Akʼo mi jech, li avie toj jutuk li kʼusi kojtikinojtike. Leʼ xa ta smilal jabile, li tukʼil vinik ti jaʼ li Jobe, la snopbe skʼoplal li spasbentak Dios ti xojtikinane. Xi kʼot ta nopel yuʼune: «Scotol leʼe stiʼtiʼ noʼox yabtel chcaʼibetic; muʼyuc ep li yabtel laj caʼitique. ¿Bochʼo xuʼ yuʼun chaʼibe smelol scotol li smucʼul stsatsale?» (Job 26:14).

Manchuk mi jal tajek xijkuxi, mu onoʼox jtatik ta ojtikinel skotol ta sventa li Jeovae xchiʼuk li kʼusitik spasojane. Li Vivliae chal ti yakʼoj ta koʼontontik Dios ti ta jkʼan chijkuxiutik sbatel osile. Pe chal xtok ti «mu xlaj [kojtikintik-o] scotol li cʼusi spasoj Dios ta sliqueb xchiʼuc cʼalal to ta slajebe» (Eclesiastés 3:10, 11). ¿Mi chtavan van chavaʼi ti chachanbe mas skʼoplal li Jpasvaneje?

Li avie oy onoʼox buchʼutik ti mu xchʼajubik ta skoj ti tspasik abtelaletik ti chtun sventa slekilal xchiʼiltakike xchiʼuk ti jaʼ jech tskʼupil kʼoptaik li Diose. Mi jech ta jtunes jkʼakʼaltik kʼuchaʼal taje muʼyuk me chtavan chkaʼitik, manchuk mi chijkuxi sbatel osil.

[Stojel ta vokol ta pajina 23]

Globo terráqueo: ta slekil yoʼonton Image Science and Analysis Laboratory, NASA-Johnson Space Center; galaxia: The Hubble Heritage Team (AURA/STScI/NASA)