¿Mi oy pʼajbilot avaʼioj aba junuk velta?
Chanubtaso avalab anichʼnabik
¿Mi oy pʼajbilot avaʼioj aba junuk velta?
LI JUN krixchanoe xuʼ pʼajbil ta xaʼi sba ta skoj ti jelel stsʼunbale, slumale o jaʼ van ti jelel skʼopojele o ti jelel stalelale. ¿Mi oy pʼajbilot avaʼioj aba junuk velta? *...
Li avie ta jkʼelbetik skʼoplal jun vinik ti jech laj yaʼi sbae. Mefi-boset sbi. Mi oy jech avaʼioj aba junuk velta jech kʼuchaʼal li vinik taje, ep kʼusi xuʼ xa chan. ¿Buchʼu xchiʼuk kʼu yuʼun pʼajbil laj yaʼi sba?
Li Mefi-bosete jaʼ xnichʼon li Jonatane, ti yamigo sbaik tajek xchiʼuk li Davide. Kʼalal skʼan toʼox xcham ta pas kʼop li Jonatane la skʼanbe vokol David ti akʼo oyuk slekil yoʼonton ta stojolal li yutsʼ yalale. Ta mas tsʼakal kʼalal jaʼ xaʼox Ajvalil li Davide ivul ta sjol li kʼusi i-albat yuʼun yamigoe. Li vaʼ kʼakʼal taje, kuxul toʼox li Mefi-bosete. Ta sbikʼtale oy kʼusi la snuptan ti mu xa xanav-o lek ikome. ¿Mi xavakʼ xa venta ti kʼu yuʼun pʼajbil laj yaʼi sba une?...
Li Davide oy ta yoʼonton ti chchabibe li xnichʼon Jonatane, jaʼ yuʼun laj yikʼ batel ta naklej ta Jerusalén sventa nopol oy xchiʼuk laj yalbe ti ta xchiʼin ta veʼel ta xmexae. Jech noxtok laj yalbe xchiʼuk xnichʼnabtak jun vinik ti Siba sbi sventa tskʼelike, xchiʼuk laj yalbe xtok li yajtuneltak Sibae. Ta melel toj lek la xkʼuxubin Mefi-boset li Davide. ¿Mi xanaʼ kʼusi ikʼot ta pasel ta tsʼakal?...
Li Davide laj yil svokol ta yutsʼ yalal. Li Absalone tskʼan ox jaʼ ch-och ta ajvalilal. Li Davide ijatav xchiʼuk epal viniketik la xchiʼinik batel sventa tskoltaik. Akʼo mi oy ox ta yoʼonton chbat xchiʼin ajvalil li Mefi-bosete, pe muʼyuk xbat ta skoj ti mu xanav leke.
Ta mas tsʼakale li Sibae laj yalbe David ti muʼyuk bu xbat li Mefi-boset ta skoj ti yuʼun jaʼ la tskʼan chkom ta ajvalile. Kʼux ta alel, pe li Davide la xchʼun li jutbil kʼop taje jaʼ yuʼun li yosil Mefi-bosete jaʼ laj yakʼbe skotol li Sibae. Li Davide muʼyuk bu jal xakʼ saʼ kʼop li Absalone vaʼun isut ta Jerusalén. Jech oxal li Mefi-bosete laj yalbe skotol li Davide, kʼalal laj yaʼi ti mu jechuk kʼuchaʼal laj yal li Sibae la snop ti akʼo koʼol xchʼakbe sbaik li osile. ¿Kʼu van yelan laj yaʼi sba xanaʼ li Mefi-bosete?...
Muʼyuk bu chopol laj yaʼi li kʼusi kʼot ta nopel yuʼun ajvalil li Mefi-bosete. Yuʼun snaʼoj ti toj ep xa yiloj tal svokol li Davide xchiʼuk ti jaʼ xa noʼox tskʼan ti akʼo junuk yoʼonton x-ajvalilaje. Jaʼ yuʼun li Mefi-bosete laj yalbe ti xuʼ xichʼ komel skotol osil li Sibae. Li kʼusi noʼox tsots skʼoplal chaʼi li Mefi-bosete jaʼ ti chaʼoch xa ta ajvalil ta Jerusalén li David ti jaʼ li yajtunel Jeovae.
Li Mefi-bosete toj ep laj yil svokol xchiʼuk ep ta velta ti pʼajbil laj yaʼi sbae. Pe kʼanbil yuʼun li Jeovae xchiʼuk ichabiat. ¿Kʼusi xuʼ jchantik ta sventa li loʼil taje?... Jaʼ ti akʼo mi lek li kʼusi ta jpastike, xuʼ xkichʼtik sabel jmultik. Li Jesuse xi laj yale: «Me chopol chayiloxuc li cristianoetique, naʼic me ti baʼyuc jech chopol laj yilicune». Ta skoj ti toj echʼ xa noʼox la spʼajike la smilik-o. Mi lek li kʼusi ta jpastike, xuʼ me jpat koʼontontik ti tskʼanutik li melel Dios Jeovae xchiʼuk tskʼanutik ek li xNichʼone, ti jaʼ li Jesuse.
Ti bu xuʼ jkʼeltik ta Vivliae
2 Samuel 4:4; 9:1-10; 19:24-30
[Tsʼib ta yok vun]
^ Mi yakal cha kʼel xchiʼuk jun olol li loʼil liʼe, pajan jlikeluk li bu oy oxib puntoetike, xchiʼuk tijbo yoʼonton akʼo yal ta skʼop stuk li sloʼile.
