Spatobil yoʼonton li buchʼu ipik ta at-oʼontone
Nopajan ta stojolal Dios
Spatobil yoʼonton li buchʼu ipik ta at-oʼontone
«MUʼYUK chi skʼanun-o li Jeovae.» Jaʼ jech laj yal jun ants yajtsʼaklom Cristo ti ip ta at-oʼonton ti kʼu xa sjalil kuxul tale. Ta skoj ti chalilanbe sba ti nom oy ta stojolal li Diose la xchʼun ti nom oy ta melele. Pe ¿mi jech ti nom oy ta stojolal li yajtuneltak ti ipik ta at-oʼonton li Jeovae? Taje te ta jtabetik jun stakʼobil ti tspat oʼontonal li ta Salmo 34:18, ti jaʼ la stsʼiba David ti jaʼ akʼbat snaʼ yuʼun Diose.
Li Davide snaʼoj lek ti oy kʼusi xuʼ xkʼot ta pasel ta stojolal li jun tukʼil yajtunel Dios kʼalal chat tajek yoʼontone. Ta skoj li yitʼixal yoʼonton Saule, li Davide ta skeremal toʼox lik jatavuk, yuʼun tskʼan chmile yuʼun li ajvalile. Jun veltae la snakʼ sba ta slumal filisteoetik ti Gat sbie, yuʼun la snop ti muʼyuk chbat saʼatuk tee: ti jaʼ li bu nakal li yajkontratake. Pe laj yojtikinik, jaʼ yuʼun la spas sba ta chuvaj sventa xjatav lokʼel. Li Davide la skʼupil kʼopta Jeova ta skoj ti koltae yuʼune, jech la stsʼiba li Salmo 34 ta skoj li kʼusi la snuptan ta xkuxlejale.
¿Mi laj van xchʼun David ti toj nom oy Dios ta stojolal li buchʼutik chat yoʼontonik ta skoj ti oy svokolike o ti mu xkʼot-o chaʼiik ti chichʼik kʼelel yuʼun Jeovae? Xi la stsʼibae: «Li Mucʼul Diose nopol oy ta stojol li bochʼo oy svocol yoʼntonique; tscolta li bochʼo lajem stsatsal yoʼntonique» (versikulo 18). Jkʼelbetik batel skʼoplal ti kʼuxi xuʼ tspat koʼontontik li versikulo taje.
«Li Mucʼul Diose nopol oy.» Jlik livroe chal ti jpʼel kʼop taje jaʼ skʼan xal ti «jamal chal ti te onoʼox oy sventa tskoltautik xchiʼuk sventa tspoj steklumal li Kajvaltike». Tspat tajek koʼontontik ti chchabi steklumal li Jeovae, ti tskolta kʼalal oyik ta «tsots vocol» xchiʼuk ti xojtikin ti kʼuyelan chkaʼi jbatik ta yutil koʼontontike (2 Timoteo 3:1; Hechos 17:27).
«Oy svocol yoʼntoni[k].» Ta junantik talel kuxlejaletike li jpʼel kʼop taje xuʼ van jaʼ skʼan xal kʼuchaʼal liʼe «yayijem li oʼontonale», taje xuʼ van jaʼo kʼalal skʼanoj sbaik jun kerem xchiʼuk tsebe. Jun vinik ti lek chaneme, laj yalbe skʼoplal ti kʼusi laj yal Davide, jaʼ la li «kʼusi kʼux ta oʼontonal o kʼusi chat-o yoʼonton li jun krixchanoe». Ta melel, li tukʼil yajtuneltak Jeova eke xuʼ lajem xkom yoʼontonik ta skoj ti chil tsots svokolike.
«Lajem stsatsal yoʼntoni[k].» Li krixchanoetik ti chat yoʼontonike, xuʼ muʼyuk xa sbalil chaʼi sbaik xchiʼuk oy bakʼintik ti muʼyuk xa kʼusi spat-o yoʼontonike. Jun livro ti chalbe skʼoplal kʼuxi ta jelubtasel ta yan kʼop li Vivliae, chal ti jpʼel kʼop taje xuʼ xichʼ jelubtasel xie: «Li buchʼutik muʼyuk kʼusi lek xuʼ smalaike».
¿Kʼuxi tstakʼ Jeova ti xvokolet li buchʼu «oy svocol yoʼntoni[k]» xchiʼuk ti «lajem stsatsal yoʼntonique»? ¿Mi nom van oy ta skoj ti mu sta-o chil ti skʼan xchiʼuk xchabi li jun krixchanoe? Ta melel moʼoj. Jech kʼuchaʼal jun totil ti tsmey o tspet kʼalal chat yoʼonton li xnichʼone, jaʼ jech li Jeovae eke, nopol oy ta stojolal li yajtuneltak ti tskʼanik koltael ta skoj ti oy svokolike, yuʼun tskʼan tspatbe yoʼonton xchiʼuk chpoxta ti lajem noʼox yoʼonton chaʼi sbaike. Li Diose xuʼ xakʼbe spʼijil xchiʼuk stsatsal yoʼonton sventa chkuch yuʼun kʼusuk vokolal (2 Corintios 4:7; Santiago 1:5).
¿Kʼu yuʼun mu xa sabe smelolal kʼuxi xuʼ xa nopaj mas ta stojolal li Jeovae? Ta xkʼuxul yoʼonton xi chalbutik ta melele: «Te nacalun [...] xchiʼuc [...] li bochʼotic biqʼuit chacʼ sbaique, xchiʼuc li bochʼotic abul sba chaʼyique; te ta xcacʼbeic lec stsatsal yoʼntonic, ta jmuqʼuibtasbe yoʼntonic» (Isaías 57:15).
Ti bu kʼalal xuʼ jkʼeltik Vivlia li u liʼe:
