¿Kʼu yuʼun laj yichʼ kʼanel tajek li Dorcase?
Chanubtaso avalab anichʼnabik
¿Kʼu yuʼun laj yichʼ kʼanel tajek li Dorcase?
JKOTOLTIK ta jkʼantik ti kʼanbilotike. ¿Kʼusi chanop li voʼote? a... Li Vivliae chalbutik skʼoplal Dorcas jun ants ti kʼanbil tajeke.
Jaʼ jun ta skotolal li baʼyel antsetik ti kʼotik ta yajtsʼaklomtak Jesús ti te inaki ta Jopee, jun lum ta tiʼnab yuʼun Mediteraneo ti 56 kilometro yiloj Jerusalene.
¿Kʼu van yuʼun xanaʼ ti laj yichʼ kʼanel tajek li Dorcase?... Yuʼun li Vivliae chal ti ta slekil yoʼonton la skʼelan kʼusitik xchiʼuk ti oy kʼusitik yan lek la spase. Chal ti la spasanan epal kʼuʼiletik sventa meʼon antsetike, jaʼ xkaltik, antsetik ti chamem xa smalalike. Jech noxtok, ta skoj ti jaʼ la xchanbe li Jesuse, laj yalbe skotol krixchanoetik ta sventa li melel Dios Jeovae.
¿Mi xanaʼ kʼusi la spas li Dorcase?... Tsots ipaj, vaʼun icham. Skotol li yamigotake laj yat
tajek yoʼontonik, jaʼ yuʼun la stakik ta ikʼel jtakbol Pedro, ti te van 16 kilometro snamal xil li lum bu oyike vaʼun laj yalbeik ti akʼo suj sbae. Kʼalal ikʼot li jtakbole, imuy batel ti bu oy li Dorcase xchiʼuk li antsetike x-okʼolet xa laj yakʼbeik yil li kʼuʼiletik yichʼojik pasbele.Vaʼun li Pedroe laj yal ti akʼo lokʼikuk skotolik li ta kuartoe. Spasojik xa onoʼox skʼelobiltak juʼelal li Pedro xchiʼuk yan jtakboletike, pe mi junuk toʼox xchaʼkuxesojik li animaetike. ¿Kʼusi van la spas ta tsʼakal xanaʼ li Pedroe?...
Ikeji ta stsʼel li animae, vaʼun la skʼopon li Jeovae. Ta tsʼakale laj yalbe Dorcas ti akʼo xlike, ¡vaʼun ilik! Laje la skolta li Pedro sventa xvaʼie xchiʼuk laj yalanbe ti akʼo x-ochik li meʼon antsetik xchiʼuk li yan krixchanoetik sventa tskʼelike. ¿Mi xanaʼ kʼu to noʼox yelan xmuyubajik?...
Jkʼeltik kʼusi xuʼ jchantik li ta sloʼilal ti laj yichʼ chaʼkuxesel li Dorcase. Jtos ti kʼusi xuʼ jchantike, jaʼ ti mi ta jkoltatik li yantike ep buchʼu chiskʼanutik. Pe li kʼusi mas tsots skʼoplale jaʼ ti tskʼanot li Diose xchiʼuk ti mu xa xchʼayot ta sjole; jech xtok muʼyuk chchʼay ta sjol li kʼusitik lekik chapase xchiʼuk chakʼ kuxian sbatel osil li ta Paraiso liʼ ta Balumile.
Ti bu xuʼ jkʼeltik ta Vivliae
[Tsʼib ta yok vun]
a Mi yakal chakʼel xchiʼuk jun olol li loʼil liʼe, pajan jlikeluk li bu oy oxib puntoetike, xchiʼuk tijbo yoʼonton akʼo yal ta skʼop stuk li sloʼile.