¿Kʼusi ti skʼan xichʼ akʼbel xchanike?
¿Kʼusi ti skʼan xichʼ akʼbel xchanike?
«Scotol li scʼop Dios tsʼibabil comele jaʼ laj yacʼ ta naʼel ta sventa svuʼel stuc li Diose. Jech lec chtun ta sventa chanubtasel, ta sventa taqʼuiel, ta sventa tuqʼuibtasel, xchiʼuc ta sventa bijubtasel ta spasel cʼusi tucʼ.» (2 TIMOTEO 3:16)
SKʼAN snaʼik li melel ta sventa Dios li alab nichʼnabiletike. Pe, ¿bu xuʼ xchanik? Jaʼ li ta Vivliae, yuʼun jaʼ jun livro sventa relijion ti ichʼbil ta mukʼ ta spʼejel Balumile.
Li Vivliae xkoʼolaj ta jun karta ti stsʼibaoj li Diose, te chakʼ ta ilel li stalelaltake xchiʼuk chakʼbe mantaletik sventa stalelal skotol li xnichʼnabtake, manchuk mi bikʼitik o mi mukʼtik xa. Liʼe jaʼ jlom li chanubtaseletik xchiʼuk li kʼusi xuʼ jchantik ti xuʼ xtun kuʼuntik ta bikʼit ta mukʼe.
¿Kʼusi tskʼan ti akʼo jnaʼtik ta stojolal li Diose?
◼ Li kʼusi chchanubtasvan li Vivliae: «Sventa tsnaʼ li krixchanoetik ti voʼote, ti jaʼ Jeova abie, voʼot noʼox atuk ti Toj Toyol Oyot ta sba spʼejel li balumile» (Salmo 83:18, NM).
Kʼusi xuʼ jchantik: Li Diose maʼuk jun tsatsal juʼelal ti muʼyuk kuxule, yuʼun kuxul ta melel xchiʼuk oy sbi stuk.
◼ Li kʼusi chchanubtasvan li Vivliae: «Li [Diose] [...] xotquin cʼusi ta jnoptic; snaʼ cʼusi oy ta coʼntontic. Me oy ta avoʼnton chasaʼe, chacʼ sba ta ilel ta atojol» (1 Crónicas 28:9).
Kʼusi xuʼ jchantik: Li Jeovae oyutik ta yoʼonton, xchiʼuk li kʼoxetik eke stsakoj ta venta (Salmo 10:14; 146:9). Li Jeovae tskʼan ti xkojtikintike.
◼ Li kʼusi chchanubtasvan li Vivliae: «Mu me xavutsʼintaic [...] li meʼon ololetique, yuʼun me abul sba avuʼunique, chiscʼanbicun vocol ta jtojol, [...] ta xcaʼibe li scʼopique» (Éxodo 22:22-24).
Kʼusi xuʼ jchantik: Li Jeovae chchikinta skotol li orasionetike, manchuk mi jaʼ s-orasion li kʼoxetike. Xuʼ xkalbetik li kʼusi ta jnoptike xchiʼuk li kʼusi oy ta koʼontontike.
◼ Li kʼusi chchanubtasvan li Vivliae: «Tsʼacal la saʼbeic scʼacʼal yoʼnton yan velta noxtoc; laj yacʼbeic yat yoʼnton li Chʼul Dios yuʼun Israele» (Salmo 78:41).
Kʼusi xuʼ jchantik: Li kʼusi chkaltike xchiʼuk li kʼusi ta jpastike xuʼ me chmuyubaj o chat-o yoʼonton li Jeovae, jaʼ yuʼun skʼan jnoptik lek baʼyel li kʼusi chkaltik xchiʼuk ta jpastike.
¿Kʼu yelan skʼan xkiltik li buchʼutik jelelik kʼuchaʼal voʼotike?
◼ Li kʼusi chchanubtasvan li Vivliae: «Muc tʼujbiluc bochʼo chcʼuxubin li Diose. Buyuc noʼox banamilal oy li cristianoetique lec ta xʼilatic yuʼun Dios me ta xichʼic ta muqʼue, me tspasic cʼusi tuqʼue» (Hechos 10:34, 35).
Kʼusi xuʼ jchantik: Li Diose ta xchʼam kʼuk noʼox yelan li krixchanoe, jaʼ yuʼun muʼyuk lek mi ta jpʼajtik junuk krixchano ti mu xkoʼolaj jsatik jchiʼuktik xchiʼuk ti jelel skoloral sbekʼtal stakopalike.
◼ Li kʼusi chchanubtasvan li Vivliae: «Chapalucoxuc me scotol cʼacʼal cʼusi chatacʼbeic me oy bochʼo chasjacʼboxuc ta sventa li cʼusi apatoj avoʼnton chamalaique. Pero ta smucʼuluc avoʼnton xavalic; ichʼvananic me ta mucʼ» (1 Pedro 3:15, 16).
Kʼusi xuʼ jchantik: Jaʼ ti skʼan jpʼeluk koʼontontik jchapbetik smelolal li kʼusi jchʼunojtike, pe mu me xij-ilin kʼalal chkaltike. Jech noxtok, skʼan xkichʼtik ta mukʼ li buchʼutik yan-o kʼusi xchʼunojike.
¿Kʼu yelan skʼan xkiltik li kutsʼ kalaltike?
◼ Li kʼusi chchanubtasvan li Vivliae: «Alab nichʼnabetic, chʼunbeic smantal li atot ameʼique, yuʼun jaʼ toj lec chil Cajvaltic cʼalal me jech chapasique» (Colosenses 3:20).
Kʼusi xuʼ jchantik: Kʼalal chchʼunik mantal li kʼoxetike maʼuk noʼox chakʼik ta ilel ti skʼanoj li stot smeʼike, moʼoj, yuʼun chakʼik ta ilel ti tskʼan tsmuyubtaik li Diose.
◼ Li kʼusi chchanubtasvan li Vivliae: «Tsʼikbo abaik ta jujuntal xchiʼuk pasbo abaik perton ta sjunul avoʼontonik ta jujuntal mi oy buchʼu chopol kʼusi tspasboxuke. Jech kʼuchaʼal la spasboxuk perton ta sjunul yoʼonton li Jeovae, jaʼ jech xa pasik ek li voʼoxuke» (Colosenses 3:13, NM).
Kʼusi xuʼ jchantik: Oy van bakʼintik ti tsyayijesutik li kutsʼ kalaltik xchiʼuk li yan krixchanoetike. Pe skʼan me jnaʼtik xijpasvan ta perton mi ta jkʼan chispasutik ta perton li Diose (Mateo 6:14, 15).
¿Kʼu yuʼun tukʼ kʼusi skʼan jpastik xchiʼuk ti lekuk koʼontontike?
◼ Li kʼusi chchanubtasvan li Vivliae: «Comtsanic li epalcʼope; meleluc scotol li cʼusitic chavalbe abaique» (Efesios 4:25).
Kʼusi xuʼ jchantik: Kʼalal melel chijkʼopoje jaʼ ta jchanbetik stalelal li Diose xchiʼuk ta jmuyubtabetik yoʼonton. Jech noxtok, mi nop xkaʼitik li jut kʼope, jaʼ me ta jchanbetik li yajkontra Diose, ti jaʼ li Diabloe yuʼun «jaʼ mero smeʼ jʼepalcʼop» (Juan 8:44; Tito 1:2).
◼ Li kʼusi chchanubtasvan li Vivliae: «Ti cʼu xʼelan chacʼan chaspasboxuc li cristianoetique, jaʼ jech xapasbeic ec» (Mateo 7:12).
Kʼusi xuʼ jchantik: Skʼan jtsaktik ta mukʼ li kʼusi oy ta yoʼontone, li kʼusi tsnope xchiʼuk li kʼusi chtun yuʼun li kutsʼ kalaltike xchiʼuk li buchʼutik oy ta jpat jxokontike. Mi chkakʼtik persa ti chkaʼitik ti kʼuyelan chaʼi sbaik xchiʼuk ti chkakʼtik ta ilel slekil koʼontontik ta stojolalike, xuʼ me jech chi spasbutik ek (1 Pedro 3:8; Lucas 6:38).
Jech kʼuchaʼal chal li beiltaseletik liʼe, li Vivliae chakʼ lekil chanubtasel ti jaʼ chkoltavan yoʼ lekil krixchanoetikuk mi chʼiik li kʼoxetike, ti x-ichʼvanikuk ta mukʼe xchiʼuk ti xaʼibeikuk lek smelolale. Pe, ¿buchʼu skʼan xchanubtas?