¿Kʼuxi xuʼ jnaʼtik bu jaʼ li melel relijione?
Chanubtaseletik ta sKʼop Dios
¿Kʼuxi xuʼ jnaʼtik bu jaʼ li melel relijione?
Li mantal liʼe tskoltaot sventa xasabe stakʼobil ta Avivlia atuk jlom sjakʼobiltak ti xuʼ van oy jech ajakʼojbe abae. Li sjakʼobiltak liʼe xuʼ xachan xchiʼuk junuk yajrextiko Jeova mi jech chakʼane.
1. ¿Mi oy jun melel relijion?
Li Jesuse jun noʼox melel relijion laj yakʼ ta chanel, ti jaʼ noʼox stuk melele. Xkoʼolaj jech kʼuchaʼal jun bikʼit be ti ch-ikʼvan batel ta kuxlejale, pe jech kʼuchaʼal laj yal Jesuse «muʼyuc ep li bochʼo te ta xʼoch batele» (Mateo 7:14). Li Diose jaʼ noʼox chchʼam li ichʼel ta mukʼ ti jech chichʼ pasel kʼuchaʼal chal li Skʼop ta melele, ti jaʼ li Vivliae. Jaʼ yuʼun, li melel yajtsʼaklomtak Cristoe pasemik ta jun ta skoj ti jmoj xchʼunel yoʼontonike. (Kʼelo Juan 4:23, 24; 14:6; Efesios 4:4, 5.)
2. ¿Kʼu yuʼun ep relijionetik chalik ti jaʼik la yajtsʼaklom Cristoe?
Li jecheʼ j-alkʼopetike sokesojik li chanubtaseletik yuʼun yajtsʼaklom Cristoe xchiʼuk tstunesik sventa noʼox tstabeik sbalil stukik. Jech kʼuchaʼal laj yal Jesuse xkoʼolaj xchiʼuk chijetik yilel, pe li ta stalelalike jaʼik jtiʼval okʼiletik (Mateo 7:13-15, 21, 23). Li chanubtaseletik yuʼun yajtsʼaklom Cristoe te lik sokuk tal kʼalal chamik li jtakboletike. (Kʼelo Hechos 20:29, 30.)
3. ¿Kʼuxi xuʼ xichʼik-o ojtikinel li melel yajtsʼaklomtak Cristoe?
Chichʼik ta mukʼ li Vivlia kʼuchaʼal Skʼop Diose. Chakʼik persa xchʼunel li beiltaseletik ta Vivliae, maʼuk li kʼuyelan chchanubtasvan krixchanoetike (Mateo 15:7-9). Maʼuk noʼox chalik, moʼoj, yuʼun tspasik jech kʼuchaʼal chalike. (Kʼelo Juan 17:17; 2 Timoteo 3:16, 17.)
Chichʼik ta mukʼ li sbi Diose, ti jaʼ li Jeovae. Li Jesuse la skolta li krixchanoetik sventa xojtikinik li sbi xchiʼuk li stalelaltak Diose. La xchanubtasan ta skʼanel ta orasion ti akʼo xichʼ ichʼel ta mukʼ li sbie (Mateo 6:9). ¿Bu junukal relijion chal ti skʼan tunesbel sbi Dios li bu nakalote? (Kʼelo Juan 17:26; Romanos 10:13, 14.)
4. ¿Kʼuxi xuʼ jnaʼtik buchʼutik li melel yajtsʼaklomtak Cristoe?
Li melel yajtsʼaklom Cristoe chalbe skʼoplal li Ajvalilal yuʼun Diose. Li Jesuse laj yichʼ takel tal ta balumil sventa tal yalbe skʼoplal li Ajvalil taje, ti jaʼ noʼox stuk jaʼ spatobil yoʼonton li krixchanoetike. Jech-o la spas, jaʼ to laj yikta spasel kʼalal jaʼ xaʼox skʼakʼalil chchame (Lucas 4:43; 8:1; 23:42, 43). Laj yalbe yajtsʼaklomtak ti akʼo yalbeik skʼoplal li Ajvalilal taje. Mi oy buchʼu chkʼot ta ana sventa chalbot skʼoplal li Ajvalilal taje, ¿kʼusi van relijional xanaʼ? (Kʼelo Mateo 10:7; 24:14.)
Li yajtsʼaklom Cristoe maʼukik sventa li chopol balumil liʼe. Muʼyuk tskap sbaik ta politika, mi jaʼuk tstikʼ sbaik kʼalal tsaʼik kʼop li krixchanoetike (Juan 17:16). Jech xtok, muʼyuk chchanbeik stalelal xchiʼuk muʼyuk tspasik li kʼusitik chakʼ vokolil liʼ ta balumile. (Kʼelo Santiago 1:27; 4:4.)
5. ¿Kʼusi jelelik-o li melel yajtsʼaklom Cristoe?
Li melel yajtsʼaklom Cristoe mu kʼusi xkoʼolaj-o ti kʼuyelan skʼanoj sbaike. Chanubtasbilik yuʼun Skʼop Dios ti skʼan xichʼik ta mukʼ skotol krixchanoetik, manchuk mi jelel stsʼunbalik. Li jecheʼ relijionetike nopolik noʼox chkoltavanik ta paskʼop, pe li melel yajtsʼaklomtak Cristoe mu jechuk tspasik (Miqueas 4:1-4). Yuʼun muʼyuk kʼusi smalaoj ch-akʼbatik ti yakʼoj yipik xchiʼuk li kʼusitik oy yuʼunik ta skoltael xchiʼuk spatbel yoʼonton li xchiʼiltakike. (Kʼelo Juan 13:34, 35; 1 Juan 4:20, 21.)
¿Kʼusi relijional ti chchanubtasvan jech kʼuchaʼal chal Vivliae, ti chichʼ ta mukʼ sbi Diose xchiʼuk ti chalbe skʼoplal ti jaʼ noʼox stuk li Ajvalilal yuʼun Dios xuʼ spat-o yoʼonton li krixchanoetike? ¿Bu junukal relijion ti stuk jech skʼanoj sbaik ta melel xchiʼuk ti muʼyuk tstikʼ sbaik ta paskʼope? Ep krixchanoetike chalik ti jaʼik li yajrextikotak Jeovae (1 Juan 3:10-12).
Mi chakʼanbe to mas yaʼyejale, kʼelo li kapitulo 15 ta livro liʼe, ¿Kʼusi chchanubtasvan ta melel li Vivliae?, ti jaʼ pasbil yuʼun yajrextikotak Jeovae.
[Lokʼol ta pajina 14]
«Chalic ti xotquinic Diose pero ta sventa cʼusitic tspasic chvinaj ti mu meleluque.» (Tito 1:16)