Li jkʼel vunetike tskʼan tsnaʼik

¿Mi oy van junuk stsʼunbal krixchanoetik ti mas lek chil li Diose?

▪ Muʼyuk, yuʼun li Vivliae xi chale: «Muc tʼujbiluc bochʼo chcʼuxubin li Diose. Buyuc noʼox banamilal oy li cristianoetique lec ta xʼilatic yuʼun Dios me ta xichʼic ta muqʼue, me tspasic cʼusi tuqʼue» (Hechos 10:34, 35).

Jamal lek xvinaj ti mu jechuk tsnop li krixchanoetik jech kʼuchaʼal li smukʼta nopben li Jpasvanej kuʼuntike. Oy ep krixchanoetik ti chalik ti jaʼ mas lek li stsʼunbal stukike. Ti kʼuyelan ta snopik taje jaʼ jech kʼuchaʼal ta snop li Charles Darwin, ti xi la stsʼibae: «Leʼ ta mas jelavele, [...] chlaj skotol stsʼunbal li krixchanoetike, jaʼ xa noʼox chkom stsʼunbalik li buchʼutik mas tsotsike». Kʼux ta alel, pe ep lajemik ta ilbajinel ta skoj ti oy krixchanoetik ti toj toyol skʼoplal chaʼi sbaik ta skoj li stsʼunbalike.

Pe, ¿mi oy van srasonal ti jech toyol skʼoplal chaʼi sbaike? ¿Mi oy staojik ta ilel li sientifikoetik ti oy krixchanoetik ti mas lek stsʼunbalike? Mu jechuk, yuʼun li Bryan Sykes ti chchanbe skʼoplal gen xchiʼuk ti chchanubtasvan ta Universidad de Oxford, xi chale: «Muʼyuk bu xuʼ xichʼ tabel skʼoplal ti xuʼ xkaltik ti oy junuk tsʼunbalil ti mas leke. [...] Ta onoʼox sjakʼilanbikun mi oy van ADN ti jaʼ griegoe o ADN ti jaʼ italianoe, pe muʼyuk ta melel. [...] Jmoj jtsʼunbal jkotoltik».

Li kʼusi laj yichʼ alele koʼol xchiʼuk li kʼusi chal Vivliae, yuʼun chal ti jaʼ la spas li baʼyel vinik xchiʼuk li baʼyel ants li Jeovae xchiʼuk ti jaʼ te likemutik tal jkotoltike (Génesis 3:20; Hechos 17:26). Jaʼ yuʼun ta sba sat li Jeovae jun noʼox tsʼunbalil oy: jaʼ noʼox li stsʼunbal krixchanoetike.

Li Jeovae maʼuk noʼox tskʼel li kʼu kelantik xchiʼuk ti kʼusi skoloral li jbekʼtal jtakopaltike, yuʼun jaʼ tskʼel li kʼusi mas tsots skʼoplale: jaʼ li kʼusi oy ta yutil koʼontontike. Yuʼun xi chal ta melel li stuke: «Yuʼun li cristianoetique jaʼ noʼox tsqʼuel ti bu lec chilique, pero li vuʼune jaʼ ta jqʼuelbe cʼu xʼelan yut yoʼnton» (1 Samuel 16:7). Ti te oy ta joltik taje tspat tajek koʼontontik. Jkʼeltik kʼu yuʼun.

Buyuk noʼox likem tal li jtsʼunbaltike, oy van eputik ti muʼyuk lek chkiltik ti kʼu kelantike. Ta melel, muʼyuk kʼusi xuʼ jpastik sventa jeltik ti kʼu kelan chkil jbatike. Pe li kʼusi xuʼ jeltike jaʼ li kʼusi mas tsots skʼoplale: jaʼ li jnopbentik xchiʼuk koʼontontike (Colosenses 3:9-11). Mi la jkʼeltik lek li kʼusi oy ta jol koʼontontike, xuʼ van te chkakʼtik venta ti oy bakʼintik mas mukʼ jutuk chkaʼi jbatik o ti mas bikʼit chkaʼi jbatik kʼuchaʼal li yan krixchano ti yan-o stsʼunbale. Skʼan xkakʼtik persa ta slokʼesel ta koʼontontik mi jech chkaʼi jbatike, yuʼun li snopben Jeovae mu jechuk kʼuchaʼal taje (Salmo 139:23, 24).

Mi chkakʼtik persa snopel jech kʼuchaʼal tsnop li Jeova ta sventa taje, ta me xi skoltautik. Li Vivliae xi chal ta melele: «Yuʼun li Mucʼul Diose jaʼ sqʼueloj scotol li banamile, jech xuʼ chacʼ ta ilel svuʼel ta stojol li bochʼo scotol yoʼntonic tscʼanic coltael yuʼune» (2 Crónicas 16:9). ¡Xijmuyubaj ti manchuk mi jeltos li jtsʼunbaltike ta onoʼox xkʼot ta pasel li kʼusi yaloje!