Jelbat-o xkuxlejalik yuʼun li Vivliae

¿KʼUSI tijbat-o yoʼonton jun tseb sventa sut li ta relijion yoʼ bu chanubtase yuʼun stot smeʼe? Kakʼtik akʼo stakʼ stuk.

«Li avie oy xa sbalil li jkuxlejale» (LISA ANDRÉ)

KʼUSI ORA VOKʼ: 1986

SLUMAL: LUXEMBURGO

KʼU TOʼOX YELAN XKUXLEJAL: TSEB TI SUTESOJ YOʼONTONE

LI JKUXLEJAL TOʼOXE: Te lichʼi ta lum Bertrange, ti jaʼ jun lum ti sake, leke xchiʼuk ti oy noʼox takʼin ta taele, ti nopol xil li jteklum Luxemburgoe. Ta jvoʼvoʼalkutike voʼon li mas bikʼitune. Li jtot jmeʼ ti jaʼik yajrextiko Jeovae laj yakʼik persa ti ta jbikʼtalkutik noʼox la xchanubtasunkutik ta sventa li mantaletik chichʼik li yajtsʼaklomtak Cristoe.

Akʼo mi jech, kʼalal laj xaʼox jta jvaʼleje lik jnopilan mi jech ta melel li kʼusi chakʼik ta chanel li yajrextikotak Jeovae. Ta skoj ti muʼyuk la jtabe stakʼobil mi jech ta melele lik kʼunibuk batel li xchʼunel koʼontone. Laj yakʼik persa li jtot jmeʼ sventa xichaʼsute, pe muʼyuk la jchʼam li koltaele. Manchuk mi mu snaʼik li stukike lik jchiʼinan kerem tsebetik ti mu skʼan ti oy buchʼu spasatik ta mantale. Ta jkʼan ti kolemun noʼox chkaʼi jba jech kʼuchaʼal kolemik yileluk li stukike. Chibatkutik ta kʼinetik, buchʼuuk noʼox jchiʼinkutik ta vayel, chi-echʼkutik ta mas yuchʼel pox xchiʼuk ta slajesel droga. Ta slikebal toʼoxe jaʼ lek chkaʼi ti ta jchiʼinan li buchʼutik tskʼupinik ta mas li xkuxlejalik yileluke.

Akʼo mi jech, muʼyuk ximuyubaj ta melel. Ti kʼuyelan toʼox li jkuxlejale muʼyuk sbalil toʼox chkaʼi, yuʼun li kamigotake mu kʼusi sventaik-o li kʼusi chkʼot ta pasele. Yan li voʼone ta jvul-o koʼonton ti muʼyuk tukʼilal chkil li ta balumile. Mas chi-ipaj-o ta at-oʼonton yuʼun taje.

TI KʼUYELAN LA SJEL JKUXLEJAL LI VIVLIAE: Kʼalal vuklajuneb xaʼox jabilale, jun kʼakʼale laj yakʼ venta ti chkat koʼonton ta jyalel li jmeʼe, jaʼ yuʼun la stijbun koʼonton ti akʼo xlik jchan yan velta li Vivliae. Laj yalbun ti skʼan jchan ta melel li kʼusi chchanubtasvan Vivliae xchiʼuk ti jnop lek mi ta jkʼan chkakʼ ta jkuxlejal li kʼusi chale. Ti vaʼ jamal laj yalbun li kʼusitik tsots skʼoplale jaʼ la sjelbun-o li kʼusi toʼox ta jnope. Lek laj kaʼi ti xi xchanubtasikun ta Vivlia li jvix Caroline xchiʼuk li smalal ti Akif sbie. Maʼuk toʼox yajrextiko Jeova ta sbikʼtal li Akife yuʼun jaʼ to kʼot ta yajrextiko Jeova kʼalal mukʼta krixchano xaʼoxe. Jaʼ yuʼun laj kil ti xuʼ xkal ta jamal li kʼusi oy ta koʼontone, ti jaʼ li kʼusi tsots skʼoplal chkaʼie.

 Jnaʼoj ti mu jechuk xkuxlejal li yajrextiko Jeova ti kʼuyelan kuxulune, pe kaloje voʼon noʼox jtuk ta jta-o jvokol. Akʼo mi jech, kʼalal la jchan li Vivliae laj kakʼ venta ti chopol chaʼi sba kuʼun Jeova ta skoj ti kʼuyelan jtalelale (Salmo 78:40, 41; Proverbios 27:11). Maʼuk noʼox taje, yuʼun oy yan buchʼutik ti chopol chaʼi sbaik kuʼune.

Kʼalal mas ta jchan li Vivliae mas ta jchʼun-o ti jaʼ Skʼop Dios ta melele. La jtabe srasonaltak ti kʼu onoʼox yelan tukʼ smelolal chbate xchiʼuk ti chkʼot ta oʼontonale, jech kʼuchaʼal li albilkʼopetik ta Vivlia ti tukʼ kʼuyelan chkʼotanuk ta pasele. Skotol taje jaʼ la skoltaun sventa jtabe stakʼobil li kʼusi ta jnopilan toʼox mi jech ta melele.

Kʼalal jun xaʼox jabil jchaʼlikesoj xchanel li Vivliae ay jchiʼin li jtot jmeʼ ta svulaʼanel li jbankil ti te chkoltavan ta abtel ta Betel yuʼun yajrextikotak Jeova ta Alemaniae. La stijbun tajek koʼonton ti xmuyubaj noʼox laj kile. ¡Taje jaʼ li muyubajel yakal ta jsaʼ eke! Toj yan sba laj kil xtok li yan ermanoetik laj kojtikinane. Mi jsetʼuk xkoʼolajik jech kʼuchaʼal li krixchanoetik ti jecheʼ noʼox tspakʼta sbaike xchiʼuk ti jaʼ noʼox batem ta yoʼontonik spasel li kʼusi tskʼanike, ti jaʼik jech li buchʼutik la jchiʼinan toʼoxe. Kʼalal muʼyuk toʼox jal li-ay ta vulaʼal taje, la jpas orasion xchiʼuk laj kalbe ta melel Dios ti chitun ta stojolal ti kʼu sjalil kuxulune. Kʼalal kichʼoj xaʼox balunlajuneb jabilale laj kichʼ voʼ, sventa chkakʼ ta ilel ta stojolal yantik ti kakʼojbe xa jkuxlejal li Jeovae.

KʼUSITIK SBALIL JTAOJAN: Li avie oy xa sbalil li jkuxlejale. Ta jkʼupin ti chkalbe krixchanoetik li kʼusi chal Vivliae xchiʼuk ti xuʼ jkoltaik sventa xojtikinik li Jeovae xchiʼuk ti snaʼik ti kʼusi yaloj tspas ta melel ta mas jelavele. Staojbeik sbalil li kutsʼ kalal eke, yuʼun muʼyuk xa tsvul yoʼontonik ta jtojolal.

Ep kʼusitik chopol la jpas li ta voʼnee, pe chkakʼ persa sventa mu masuk jnopilan taje. Jaʼ chkakʼ ta koʼonton ti jaʼ jun Dios ti ch-akʼvan ta perton li Jeovae xchiʼuk ti skʼanojun tajeke. Jaʼ jech chkaʼi jba kʼuchaʼal chal Proverbios 10:22: «Li bendición yuʼun Mucʼul Diose jaʼ jcʼulejaltic chcʼot; mu jta jvocoltic yuʼun».

[Tsʼib ta mukʼtik sletraile ta pajina 14]

«Chibatkutik ta kʼinetik, buchʼuuk noʼox jchiʼinkutik ta vayel, chi-echʼkutik ta mas yuchʼel pox xchiʼuk ta slajesel droga»

[Tsʼib ta mukʼtik sletraile ta pajina 15]

«Ep kʼusitik chopol la jpas li ta voʼnee, pe chkakʼ persa sventa mu masuk jnopilan taje»