¿Kʼu yuʼun skʼan jchʼuntik li beiltaseletik ta Vivliae?

¿MI MUʼYUK xa van sbalil li beiltasel sventa lekil talelalil ta Vivliae xchiʼuk mi toj tsots van tspasvan ta mantal ta sventa li chiʼinejbail ta vayele? Moʼoj. Li buchʼutik tstsakik ta ventae muʼyuk ta sta svokolik kʼuchaʼal liʼe...

▪ ... li chameletik tstaik ta chiʼinejbail ta vayele

▪ ... ti chchiʼin yolik manchuk mi mu skʼanike

▪ ... ti kʼux chaʼiik kʼalal tsutes sbaik li jun nupultsʼakale

▪ ... ti mu junuk sjol yoʼontonike

▪ ... ti muʼyuk xa sbalil chaʼi sbaike

Li Jeova Diose * jaʼ Jpasvanej kuʼuntik, jaʼ yuʼun tskʼan ti jkʼupintik skotol li kʼusitik yakʼojbutike. Li ta Isaías 48:17 chal ti jaʼ sventa jlekilaltik li chanubtasel chakʼe. Jaʼ yuʼun, li jun krixchano ti tstsak ta venta li beiltasel ta Vivliae, ta skʼupin...

▪ ... ti lek ch-ilat yuʼun Diose

▪ ... ti jun noʼox yoʼontone

▪ ... ti lek noʼox oy xchiʼuk snup xchiʼile

▪ ... ti lek noʼox skʼoplale

▪ ... ti oy xa sbalil chaʼi sbae

Pe, ¿mi muʼyuk yakal chkakʼ ta jkuxlejaltik li mantal ta sventa li lekil talelalil chakʼ Diose? ¿Mi stakʼ jelel ti kʼu toʼox yelan li jkuxlejaltike? ¿Mi ta van stikʼ ta jsatik ta tsʼakal li kʼusi chopol la jpastik li Diose?

Jnopbetik skʼoplal li stsobobbail yajtsʼaklom Cristo ta baʼyel sigloe. Li buchʼutik te oyik ta tsobobbail taje jaʼik toʼox jmulivajeletik, tsloʼla xchiʼilik ta nupunel xchiʼuk tskʼupin xchiʼil ta vinikal o ta antsil, pe ta sjunul yoʼonton la sjel li stalelalike, vaʼun li Diose laj yakʼbe perton (1 Corintios 6:9-11). Li avie, ta smilal xa noʼox ti jech sjeloj xkuxlejalik ta spʼejel Balumile. Li krixchanoetik taje la spasik li kʼusi chal li beiltaseletik ta Vivlia ta sventa li  chiʼinejbail ta vayele xchiʼuk yiktaojik xa li smol kuxlejalike. Skotolik taje —ti te tsakal skʼoplal li Sara, li tojol tseb laj kalbetik skʼoplal li ta slikebal li mantaletik liʼe— yiloj xa ta xkuxlejalik li kʼusitik lek chkʼot ta pasele.

«Ta anil noʼox toj lek laj kaʼi jba»

Li Sarae laj yakʼ venta ti kʼalal kolem noʼox li xkuxlejale xchiʼuk ti muʼyuk tstsak ta mukʼ li mantaletike, muʼyuk tskʼupin xkuxlejal jech kʼuchaʼal snopoje xchiʼuk muʼyuk jun yoʼonton kʼuchaʼal tskʼane. Xi chale: «Solel mu xaʼox kʼusi chopol chaʼi li jnopbene. Pe akʼo mi jech, solel chikʼexav xchiʼuk chixiʼ mi jchiʼin kol o ti stsakun jtosuk chamele. Pe muʼyuk laj kikta ti jchʼunoj ta stojolal li Diose xchiʼuk jnaʼoj ti solel chopol chaʼi sba kuʼun ta skoj li jtalelale. Skotol li kʼusitik chopol la jpas taje, solel tslajesun laj kaʼi».

Ta mas tsʼakale laj yakʼ persa li Sara sventa tsjel ta jyalel li xkuxlejale. Ay skʼanbe koltael li stot smeʼ ti jaʼik yajrextikotak Jeovae, xchiʼuk li moletik ta stsobobbail yajrextikotak Jeova ti bu nakale. Xi to chal li Sarae: «Toj lek laj kil ti kʼuyelan la stsakikun ta venta xchiʼuk la xkʼuxubinikun li jtot jmeʼ xchiʼuk li moletik ta tsobobbaile. Ta anil noʼox toj lek laj kaʼi jba».

Li avie, oy chaʼvoʼ yalab li Sarae. Xi chale: «Kalojbeik ti kʼu toʼox yelan li jkuxlejale. Ta jkʼan ti xaʼibeik smelolal li kʼusitik jvokol la jta kʼalal muʼyuk la jtsak ta mukʼ li beiltasel chakʼ Dios ta sventa li chiʼinejbail ta vayele, xchiʼuk ti xakʼik venta ti oy sbalil kʼalal lek noʼox oyutike, ti lek noʼox jnopbentike xchiʼuk ti jun noʼox koʼontontik yuʼun mi ta jchʼuntike. Jnaʼoj lek ti jaʼ ta skoj ti mu skʼan ti xkil jvokoltik ti yakʼojbutik smantaltak li Diose».

Jkotoltik xuʼ jtabetik sbalil li lekil tojobtasel chakʼbutik Diose. Li Vivliae xi chale: «Li chanubtasel yuʼun Mucʼul Diose toj tucʼ, chijyacʼbutic lec xcuxetel coʼntontic» xchiʼuk «li bijubtasel yuʼun Mucʼul Diose muʼyuc cʼusi capbil o; lec chjam jba jsatic yuʼun». Jech noxtok, chal ti «toj lec [chijbat] yuʼun me ta jchʼun[tik]» li mantale (Salmo 19:8, 11). *

[Tsʼibetik ta yok vun]

[Tsʼib ta mukʼtik sletraile ta pajina 8]

Li buchʼutik muʼyuk chchʼunik li mantaletik chakʼ Vivliae chil ep vokolik

[Tsʼib ta mukʼtik sletraile ta pajina 9]

Li buchʼutik ta xchʼunik li mantaletik chakʼ Diose ta skʼupinik ti lek noʼox li sjol yoʼontonike xchiʼuk ti lek noʼox oy xchiʼuk snup xchiʼile