Chanubtaseletik ta sKʼop Dios

¿Kʼuxi ta jtabetik sbalil li smantaltak Diose?

Li mantal liʼe tskoltaot sventa xasabe stakʼobil ta Avivlia atuk jlom sjakʼobiltak ti xuʼ van oy jech ajakʼojbe abae. Li sjakʼobiltak liʼe xuʼ xachan xchiʼuk junuk yajrextiko Jeova mi jech chakʼane.

1. ¿Kʼu yuʼun skʼan jchʼunbetik smantal li Diose?

Sta-o ti jchʼunbetik li smantale yuʼun jaʼ la spasutik. Yuʼun li Jesús eke la xchʼunbe smantal skotol ora (Juan 6:38; Apocalipsis 4:11). Li smantaltak Diose jaʼ chakʼ ti xkakʼtik ta ilel ti jkʼanojtike. (Kʼelo 1 Juan 5:3.)

Skotol li smantaltake jaʼ sventa jlekilaltik. Yuʼun chchanubtasutik kʼuxi xuʼ lek xijkuxi li avie xchiʼuk ti kʼuxi xuʼ jtabetik sbalil ta mas jelavele. (Kʼelo Salmo 19:7, 11 xchiʼuk Isaías 48:17, 18.)

2. ¿Kʼuxi xuʼ jtabetik sbalil li smantaltak Dios sventa lekuk noʼox oyutike?

Li smantal Dios ta sventa li yakubele chchabiutik sventa mu kʼusi xibal sba xkʼot ta jtojolaltik xchiʼuk ti mu stsakutik chamel ti chʼabal xpoxile. Ti toj ep chichʼ uchʼel li poxe chnop xchiʼuk chakʼ jpastik li kʼusi muʼyuk jnopoj ta jpastike (Proverbios 23:20, 29, 30). Li Jeovae muʼyuk chopol chil ti chkuchʼtik poxe, pe ta sbisoluk noʼox. (Kʼelo Salmo 104:15 xchiʼuk 1 Corintios 6:10.)

Jech xtok, li Diose chalbutik ti chopol li itʼixale, li ilinele xchiʼuk li yan talelaletik ti chlajesvane. Mi chkakʼ ta jkuxlejaltik li tojobtasel chakʼbutike muʼyuk me mas chij-ipaj. (Kʼelo Proverbios 14:30 xchiʼuk 22:24, 25.)

3. ¿Kʼuxi chchabiutik ta sventa chiʼinejbail ta vayel li smantal Diose?

Li smantal Diose chal ti mu lekuk li chiʼinejbail ta vayel ti maʼuk snup xchiʼil sbaike (Hebreos 13:4). Li nupultsʼakaletik ti chchʼunik li mantal taje mas jun noʼox yoʼontonik xchiʼuk mas snaʼik kʼuxi chchanubtas yalab xnichʼnabik. Yan vokol tstaik ti oy chchiʼin sbaik ta vayel ti muʼyuk nupunemike jaʼ ti ch-ipajike, tstuchʼ snupunelik ta registro civil, chut sbaik, ip yoʼonton chkomik xchiʼuk oy utsʼ alaliletik ti stuk totil o meʼil tstsʼites yalab xnichʼnabike. (Kʼelo Proverbios 5:1-9.)

Mi ta jkʼel jbatik sventa jchʼuntik li mantal taje, jaʼ lek chkil-o jbatik xchiʼuk li Diose xchiʼuk muʼyuk ta jyayijesbetik yoʼonton li yantike. (Kʼelo 1 Tesalonicenses 4:3-6.)

  4. ¿Kʼuxi ta jtabetik sbalil ti chkichʼtik ta mukʼ li kuxlejale?

Li buchʼutik chichʼik ta mukʼ li matanal kuxlejal yakʼoj Diose ta xiktaik li kʼusi chopolik nopem xaʼiik spasele jech kʼuchaʼal, li slajesel moye xchiʼuk yantik ti kʼusi meʼinem xaʼiik spasel ti xibalik sbae (2 Corintios 7:1). Toj lek chil kuxlejal li Diose, manchuk mi ta xchʼut to smeʼ oy li olole (Éxodo 21:22, 23). Jaʼ yuʼun, mu stakʼ jmiltik jun olol ti muʼyuk to vokʼeme. Jech xtok, li buchʼutik tstsakik ta venta kʼuyelan chil Dios li kuxlejale tskʼelik ti mu kʼusi xkʼot ta pasel ta yabtelik, ta snaik xchiʼuk ta skaroike (Deuteronomio 22:8). Mi jaʼuk tspasik tajimoletik ti chakʼ ta xiʼel xkuxlejalike, yuʼun snaʼojik ti jaʼ jun matanal yakʼoj Dios li jkuxlejaltike. (Kʼelo Salmo 36:9.)

5. ¿Kʼuxi xuʼ jtabetik sbalil ti chʼul li chʼichʼe?

Li chʼichʼe chʼul, yuʼun li Diose jaʼ kuxlejal chil, o jaʼ xchʼulel li kʼusitik kuxajtike (Génesis 9:3, 4). Li smantal Diose chal ti koʼol sbalil li kuxlejal xchiʼuk li chʼichʼe, yuʼun ta jtabetik sbalil. ¿Kʼu yuʼun? Jaʼ ta skoj ti koʼol sbalil li kuxlejal xchiʼuk li chʼichʼe, jech oxal xuʼ x-akʼvan ta perton li Diose. (Kʼelo Levítico 17:11-13 xchiʼuk Hebreos 9:22.)

Li xchʼichʼel Jesuse stuk noʼox jech ti oy sbalile, yuʼun tukʼil krixchano echʼ. Kʼalal laj yakʼ xkuxlejal ta skoj krixchanoetik li Jesuse laj yakʼ ta stojolal Dios li sbalil xchʼichʼele, ti jaʼ li xkuxlejal xkaltike (Hebreos 9:12). Ta skoj ti la smal xchʼichʼele, xuʼ jtatik-o kuxlejal sbatel osil. (Kʼelo Mateo 26:28 xchiʼuk Juan 3:16.)

Mi chakʼanbe to mas yaʼyejale, kʼelo li kapitulo 12 xchiʼuk 13 ta livro liʼe, ti jaʼ pasbil yuʼun yajrextikotak Jeovae.