Li kʼusitik ora mu stakʼ xijvaye
Chanubtaso avalab anichʼnabik
Li kʼusitik ora mu stakʼ xijvaye
¿MI MU jechuk ti tsots skʼoplal skʼan julavemukutik li ta chanobvune? Jech onoʼox ti oy buchʼutik ta xvayik kʼalal yorail chanune, pe mi oy kʼusi chakʼan chachane, skʼan me mu xavay. Taje jaʼ jech chkʼot ta pasel kʼalal chijbat ta tsobajeletike ti jaʼ li bu ta jchanbetik skʼoplal li Vivliae.
¿Kʼusi xuʼ tskoltaot sventa mu xavaye? *... Xuʼ van mas sob xavay o xakux uni jlikeluk li ta kʼakʼaltike. Li ta Vivliae te chalbe skʼoplal jun kerem ti och svayel kʼalal jaʼo chal mantal ta akʼobaltik li jtakbol Pabloe. Jkʼeltik batel kʼusi xuʼ jchantik ta sventa li loʼil taje. Kʼelo ta Hechos kapitulo 20 versikulo 7 kʼalal ta 12.
Li Pabloe yakal ta svulaʼan jun tsobobbail ta jteklum Troas, ti te xkom ta stiʼiltik batel nabe. Li Vivliae chal ti «ta yocʼomal xa ta xbat» ta varkoe, jaʼ yuʼun «ichanubtasvan cʼalal to ta oʼlol acʼubal». Li Vivliae xi to chal batele: «Te oy jun jilum querem, Eutíco sbi, te chotol ta ventana. Ta sventa ti jal loʼilaj li Pabloe, jech tal svayel ti quereme». ¿Mi chakʼan chanaʼ kʼusi kʼot ta pasel?...
Li Euticoe «ipitcʼuj yalel ta yoxcojal jolna». Skotol li buchʼutik te oyike xchiʼuk li Pabloe, yalik ta anil li ta eskalerae. Pe kʼalal kʼotik ta olone, chamem xaʼox la staik li Euticoe. ¿Mi xnop xa noʼox avuʼun ti kʼu to yepal laj yat yoʼontonike?... Li Vivliae chal ti tsots la smey kerem li Pabloe. Vaʼun xi xmuyubaj laj yale: «¡Mu xavat avoʼontonik, li Euticoe lek oy!». Taje jaʼ jech ta melel, yuʼun li Diose la xchaʼkuxes li kereme.
¿Kʼusi chchanubtasutik ta sventa Dios li kʼusi kʼot ta stojolal Euticoe?... Li kʼusi baʼyel xuʼ jchantik ta stojolal Jeova ti jaʼ li Jtotik ta vinajele, jaʼ ti xuʼ xchaʼkuxes li buchʼutik chamemike ti te tsakal skʼoplal li ololetike. Jech noxtok, li Jeovae mas to xayojtikinot lek xchiʼuk skʼanojot tajek, mas to skʼanojot kʼuchaʼal atot ameʼe. Kʼalal ay ta Balumil li Jesuse, laj yakʼ ta ilel ti skʼanoj ololetik jech kʼuchaʼal li Stote, ti jaʼ li Jeovae. Maʼuk noʼox ti la spetanan xchiʼuk ti laj yakʼbe sbendisione, yuʼun la xchaʼkuxes epal kerem tsebetik ti te tsakal skʼoplal jun tseb ti yichʼoj lajcheb jabile.
¿Kʼu yelan chavaʼi aba ti anaʼoj xa ti skʼanojot tajek li Diose?... Jaʼ jech, jkotoltik jkʼanojtik tajek xchiʼuk ta jkʼan ta jchʼunbetik smantal. ¿Mi chakʼan chanaʼ kʼusi xuʼ jpastik sventa chkakʼtik ta ilel ti jkʼanojtike?... Xuʼ xkalbetik ti jkʼanojtike, jech kʼuchaʼal laj yal li Jesuse: «Lec jcʼanoj ti Jtote». Pe li Jesuse oy to kʼusi la spas: laj yakʼ ta ilel ta stalelal ti skʼanoje.
Li Jesuse la xchʼunbe smantal li Diose. Yuʼun xi laj yale: «Jaʼ ta jpasbe scotol cʼacʼal li cʼusi lec chile». Mi ta jkʼan ta jchʼunbetik smantal li Dios sventa xmuyubaj kuʼuntik xchiʼuk li Xnichʼone, chkakʼtik persa ti julavemutik li ta chanobvune xchiʼuk li ta tsobajeletik ti bu ta jchantik Vivliae.
Ti bu xuʼ jkʼeltik ta Vivliae
[Tsʼib ta yok vun]
^ par. 4 Mi yakal chakʼel xchiʼuk jun olol li loʼil liʼe, pajan jlikeluk li bu oy oxib puntoetike, xchiʼuk tijbo yoʼonton akʼo yal ta skʼop stuk li sloʼile.
