Li jkʼel vunetike tskʼan tsnaʼik

¿Mi chichʼ lajesel ta 2012 li Balumile?

▪ «Li buchʼutik xchʼunojik ti chtal xa li lajebale kʼotik ta jun jteklum ta Francia [...]. Solel xchʼunojik ti chlaj ta 21 yuʼun disiembre ta 2012 li balumile, ti jaʼo chkʼot ta tsutsel li 5,125 jabil ti jech chchapik kʼuchaʼal voʼneal kalendario mayae.» (BBC News.)

Li Balumile muʼyuk chlaj, te oy-o, manchuk mi chalik ti chlaj Balumil li jnitvanejetik ta relijione, li sientifikoetik ta alele o li buchʼutik kak chalik avi li kʼusi chkʼot ta pasel ta tsʼakale. Li kʼusi xuʼ jchʼuntike jaʼ ti muʼyuk chichʼ lajesel ta 2012 li Balumile. Ta melel, muʼyuk chlaj li Balumil vaʼ jabile, mi jaʼuk li jabiletik chtale.

Li Vivliae xi chale: «Xvocʼ jcʼol alab nichʼnabetic, xcham yan jcʼol; te staoj yav o li banamile» (Eclesiastés 1:4). Jech xtok, nopo avaʼi li kʼusi smakojbe skʼoplal li kʼusi chal Isaías 45:18: «Jech chal li Mucʼul Dios ti [...] jaʼ li bochʼo la spas banamile; ti la xchapan leque, ti lec nacal icom yuʼun sventa acʼo oyuc bochʼotic te chnaquie: “Vuʼun mucʼul Diosun jtuc, muʼyuc yan dios[”]».

Nopo avaʼi ti ta skoj ti tskʼan chmuyubaj xnichʼnab li jun lekil totile chchʼak skʼakʼal sventa tsmeltsanbe junuk ixtolal varko o junuk sna munyekaetik. ¿Mi mu jechuk ti muʼyuk tslilinbe kʼalal naka toʼox yakʼojbe smoton li xnichʼnabe? Muʼyuk slekil yoʼonton ti jechuk tspase. Veno, li Dios eke la smeltsan Balumil sventa xuʼ skʼupinik li krixchanoetike. Xi laj yalbe li Adán xchiʼuk Evae: «Bolanic; epajanic. Nojesic li banamile; ventainic o». Ta tsʼakale «scotol li cʼusitic pasbil yuʼun Diose toj lec laj yil» (Génesis 1:27, 28, 31). Li kʼusi tskʼan ta sventa Balumil li Jpasvaneje muʼyuk sjeloj-o, jaʼ yuʼun muʼyuk chakʼ ti xichʼ lajesele. Ta sventa li kʼusi yaloj tspase, li Jeovae xi chal ta melele: «Li jcʼop[e] [...] muc xocoluc tsut batel ta jtojol. Chcʼot ta pasel li cʼusi oy ta coʼntone; chcʼot ta pasel scotol li cʼusi ta xcale» (Isaías 55:11).

Pe li Vivliae xi chal ta sventa li kʼusi snopoj tspas Jeovae: «Ta xatubbe scʼoplal ti jsoquesej-banomile» (Apocalipsis 11:18, Ch). Li ta Vivliae xi chal ta melele: «Yuʼun li bochʼotic tucʼ yoʼntonique te chnaquiic o ta banamil; li bochʼotic lequique jʼechʼel te oyic o. Yan li bochʼotic chopolique ta xichʼic nutsel loqʼuel; li jtoybaetique ta xichʼic bulel loqʼuel» (Proverbios 2:21, 22).

¿Kʼusi ora chkʼot ta pasel taje? Mu buchʼu snaʼ. Li Jesuse xi laj yale: «Li cʼusi ora chitale muʼyuc onoʼox bochʼo ta snaʼ, me jaʼuc li jʼalmantaletic ta vinajele, me jaʼuc vuʼun li Nichʼonilune. Jaʼ noʼox snaʼ stuc li Totile» (Marcos 13:32). Li yajrextikotak Jeovae muʼyuk kak chalbeik skʼoplal kʼusi ora tslajes chopol krixchanoetik li Diose. Akʼo mi smalaojik li «sqʼuelubil» ta sventa li slajeb kʼakʼale xchiʼuk ti xchʼunojik ti ta «slajebal [kʼakʼal]» kuxulutik jech kʼuchaʼal yaloj xa onoʼox li Vivliae, mu snaik lek kʼusi ora chkʼot ta pasel taje (Marcos 13:4-8, 33; 2 Timoteo 3:1). Pe jaʼ chiktabeik ta skʼob stuk li Totil yuʼunik ta vinajele xchiʼuk li Xnichʼone.

Kʼalal mu to chkʼot ta pasel taje, yakʼoj ta yoʼontonik xcholel li lekil aʼyej ta sventa li Ajvalilal yuʼun Diose, li Ajvalil ta vinajel taje tsventain li Balumile xchiʼuk tskʼatajes ta jun alakʼ sba paraiso. Vaʼun, «li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o» (Salmo 37:29).

[Stojel ta vokol ta pajina 13]

Ta slekil yoʼonton Image Science and Analysis Laboratory, NASA-Johnson Space Center