Li jkʼelvunetike tskʼan tsnaʼik

¿Buchʼu la stak batel ta Belén li kʼanale?

▪ ¿Mi oy aviloj junuk velta ti kʼuyelan ch-ayan ta alel li Jesuse o kʼalal chakʼik ta ilel ti chvulaʼanat yilel yuʼun oxvoʼ reyes magos kʼalal achʼ toʼox svokʼele? Oy loʼiletike chalik ti Diose laj la stunes jpʼej kʼanal sventa tsbeiltas batel ta nail vakax ta Belén li oxvoʼ krixchanoetik yoʼ bu puchʼul ta sveʼeb vakax li Jesuse. Ep ololetike snaʼojbeik sbi li oxvoʼ reyetike: Melchor, Gaspar xchiʼuk Baltasar. Pe li loʼiletik taje, ¿mi koʼol van jech kʼuchaʼal chal li Vivliae? Ta melel mu xkoʼolaj.

Baʼyel, ¿buchʼu jaʼ li oxvoʼ viniketike? Li jpʼel kʼop ta griego tstunes li Vivliae, chal ti maʼuk reyetik o ajvaliletike. Li viniketik taje jaʼik magoetik o jkʼelkʼanaletik. Taje jaʼ smelolal ti maʼuk jchʼunolajeletike, yuʼun jkʼelkʼanaletik. Li kʼusi tspasik taje, smakojbe skʼoplal li skʼelel kʼuyelan chanav li kʼanaletik sventa chalik li kʼusi chkʼot ta pasel ta tsʼakale. Li Vivliae muʼyuk bu chal kʼusi sbiik xchiʼuk jayvoʼik.

Xchibal, ¿kʼusi ora la svulaʼanik Jesús li jkʼelkʼanaletike? Li Vivliae chal ti kʼalal kʼot ta Belene muʼyuk bu laj yilik jun neneʼ ta sveʼeb vakax, yuʼun xi chal li jtsʼibajom yuʼun Evanjelio ta Mateoe: «Cʼalal iʼochic ta nae, te laj yilic li olole, xchiʼuc li smeʼe, jaʼ li Mariae» (Mateo 2:11). Jaʼ yuʼun kʼalal kʼot li jvulaʼaletike, li Jesuse olol xaʼox, maʼuk jun neneʼ. Jech xtok, maʼuk ta sveʼeb vakax la xchʼamik jvulaʼaletik li José xchiʼuk Mariae, jaʼ ta jpʼej na.

Yoxibal, ¿buchʼu la stak batel li kʼanal ti la stsʼakliik echʼel li jkʼelkʼanaletike? Li jchanubtasvanejetik ta relijion avie chalik ti jaʼ la li Diose. Pe, ¿mi jech ta melel? Muʼyuk bu tukʼ ikʼatik batel ta Belén yuʼun li kʼanale. Baʼyel beiltasatik batel ta Jerusalén ta stojolal li tsatsal ajvalil Herodese, laj yalbeik ti ayan xa li Jesuse xchiʼuk ti chkʼot ta «ajvalil yuʼun ti [judioetike]». Ti jech laj yalike, mas ilin-o ta stojolal olol li jmilvanej ajvalile (Mateo 2:2). Li manya ajvalile laj yalbe li viniketik ti akʼo albatuk bu oy ta melel li Jesús kʼalal mi laj xaʼox svulaʼanike, yuʼun ta alele tskʼan la tsmuyubta ek. Ta tsʼakale, li kʼanale la sbeiltas batel li jkʼelkʼanaletik ti bu oy José xchiʼuk Mariae. Ta melel, li kʼusi la spasike xuʼ ox oy kʼusi chopol kʼot ta pasel: jaʼ ti chichʼ milel li olole. ¡Pe li Diose la skolta! Kʼalal laj yaʼi Herodes ti batik xae xchiʼuk ti muʼyuk albat li kʼusi tskʼan tsnaʼe, solel ilin. Jaʼ yuʼun laj yal mantal ti akʼo smilik skotol li ololetik ti chib sjabilalik o mu sta li ta lum Belene xchiʼuk li ta spat xokone (Mateo 2:16).

Ta jayib jabil mas tsʼakale, xi laj yal Jeova ta stojolal li Jesuse: «Liʼi jaʼ Jnichʼon; lec jcʼanoj, lec jpatoj coʼnton yuʼun» (Mateo 3:17). Ta melel, li Stot Jesuse jaʼ jkʼanvanej xchiʼuk lek tukʼ. Li voʼote kʼusi chanop, ¿mi tstʼuj van li buchʼutik maʼuk jchʼunolajeletik ti chanemik ta spasel li kʼusi chal ta Skʼop ti chopole? (Deuteronomio 18:10.) Li Herodese jaʼ jun tsatsal jmilvanej xchiʼuk xibal sba li ta jteklume, ta skoj taje li Jeovae, ¿mi tstunes van li jpʼej kʼanal sventa tsbeiltas li magoetik yoʼ akʼo xbat yalbeik jun aʼyej ti chlik-o mas skʼakʼal xchiʼuk yitʼixal yoʼontone? ¿Mi ta van sbeiltasan batel ti bu oy li yuni nichʼon ti mu snaʼ spoj sbae?

Nopo avaʼi liʼe: jun pʼijil bankilal soldadoe tstak batel yajsoldado ti mas lek xtojob ta jun tsatsal abtel ti bu oy yajkontratake. ¿Mi chalbe van yajkontratak bu oy li yajsoldadoe? ¡Ta melel moʼoj! Li Jeovae la stak tal Xnichʼon ek sventa tal spas jun abtelal liʼ ta xibal sba balumile. ¿Mi mu jechuk ti chʼabal sbalil ti lajuk yalbe Herodes bu oy Jesús kʼalal bikʼit xchiʼuk ti mu toʼox snaʼ spoj sbae?

Vaʼun chaʼa, ¿buchʼu la stak tal li kʼanal ta alele? Jaʼ yuʼun, ¿buchʼu onoʼox oy ta yoʼonton tskʼan tsmil Jesús yoʼ mu xkʼot ta pasel li yabtel liʼ ta Balumile? ¿Buchʼu oy ta yoʼonton chilbajin krixchanoetik xchiʼuk tspuk jutbilkʼop, majbail xchiʼuk milbaile? Li Jesuse laj yakʼ ta ojtikinel buchʼu jaʼ li jmilvanej xchiʼuk li jutkʼop taje, li «mero smeʼ jʼepalcʼop[e]»: li Diablo Satanase (Juan 8:44).