Jelbat-o xkuxlejalik yuʼun li Vivliae

¿KʼUSI tijbat-o yoʼonton jun vinik sventa sut li ta relijion bu chʼi tale? ¿Kʼusi la spas jun kerem sventa jaʼuk jun lekil totil xil li Jeovae, akʼo mi muʼyuk toʼox kʼanbil yuʼun li stote? Jkʼeltik batel li kʼusi chalike.

«Skʼan xisut ta stojolal Jeova» (ELIE KHALIL)

KʼUSI ORA VOKʼ: 1976

SLUMAL: CHIPRE

KʼU TOʼOX YELAN XKUXLEJAL: CHʼAYEMAL KEREM

LI JKUXLEJAL TOʼOXE: Ta Chipre livokʼ, pe lichʼi ta Australia. Li jtot jmeʼe jaʼik toʼox yajrextiko Jeova xchiʼuk laj yakʼik persa xchanubtasikun li ta Skʼop Dios ti jaʼ li Vivliae xchiʼuk ti chkʼanvan tajek li Diose. Akʼo mi jech, kʼalal chex keremun xaʼoxe lik jtoy jba. Chijatav lokʼel ta akʼobaltik ta jna sventa chbat jta jba xchiʼuk jlom kamigotak ti jmoj jabilalkutik sventa xkelkʼankutik karoetik xchiʼuk nopajtik noʼox ta jtikʼ jba ta kʼop.

Ta slikebale ta nakʼal toʼox ta jpas, yuʼun mu jkʼan ti chopol xaʼi sbaik li jtot jmeʼe, pe kʼunkʼun chʼay batel li xiʼel taje. Li kamigotake mas xa mukʼtik xchiʼuk muʼyuk skʼanojik li Jeovae. Taje jaʼ li sok-o. Maʼuk noʼox taje, yuʼun ta tsʼakale laj kalbe jtot jmeʼ ti mu xa jkʼan xibat li ta srelijionike. Manchuk mi ta slekil yoʼontonik la skoltaikun, laj yayijesbe yoʼontonik yuʼun muʼyuk la jchʼam li koltaele.

Laj kikta li jnae, lik kabtelan li drogae, la jtsʼun xchiʼuk la jchon epal marivana. Puro mulivajel ta jpas xchiʼuk chibatilan tajek ta diskotekaetik. Jech noxtok lipas tajek ta simaron. Mi oy kʼusi chalbeikun ti muʼyuk lek chkaʼie chikap ta jyalel, chi-avan o chimajvan. Jaʼ xkaltik, ta jpas skotol li kʼusi mu stakʼ spas jun yajtsʼaklom Cristoe.

TI KʼUYELAN LA SJEL JKUXLEJAL LI VIVLIAE: Laj kamigoin tajek jun jtunesej droga ti ta sbikʼtal toʼox cham stote. Toj lek xiloʼilajkutik akʼo mi nax xa tajek akʼobal. Ep ta velta laj yalbun ti tsnaʼ tajek li stote. Ta skoj ti ta jbikʼtal jchanoj xa onoʼox ta sventa li chaʼkuxesele, laj kalbe ti la xchaʼkuxes animaetik ta voʼne li Jesuse xchiʼuk ti yaloj tspas yan velta ta mas jelavele (Juan 5:28, 29). Xi laj kalbee: «Nopo xa noʼox avaʼi, chavil yan velta li atote xchiʼuk jkotoltik xuʼ xijkuxiutik ta jun paraiso liʼ ta Balumile». Taje kʼot tajek ta yoʼonton.

Junantik velta li kamigoe tsjakʼbun ta sventa li slajebal kʼakʼale o li chanubtasel ta sventa  Trinidade. Sventa chkakʼbe yil li kʼusi melel ta sventa Jeova, Jesús xchiʼuk ta sventa li slajebal kʼakʼale, jaʼ ta jtunesbe li Svivliae (Juan 14:28; 2 Timoteo 3:1-5). Kʼalal chkalilanbe skʼoplal Jeova li kamigoe, mas ta jnopbe skʼoplal li Jeova eke.

Ta kʼunkʼun lik chʼiuk ta koʼonton li melel chanubtaseletik ta Vivlia ti jtenoj toʼox batele, xchiʼuk ti laj yakʼik persa la stsʼunbikun ta koʼonton li jtot jmeʼe. Kʼalal yakal ta jtunes droga xchiʼuk kamigotak bakʼintike jaʼ to chkaʼie chlik jnopbe skʼoplal li Jeovae. Manchuk mi ep kamigotak chalik ti skʼanojik li Diose, pe mu jechuk xvinaj li ta stalelalike. Ta skoj ti mu jkʼan ti jaʼ noʼox ta jmak satile, laj kakʼ venta ti skʼan xisut ta stojolal Jeovae.

Melel onoʼox ti mas kʼun ti jnaʼtik li kʼusi leke, pe li kʼusi mas tsotse jaʼ li spasele. Junantik li kʼusi skʼan xkiktae muʼyuk bu toj tsots laj kaʼi yiktael. Jech kʼuchaʼal li stunesel drogae. Jech xtok, muʼyuk xa bu jchiʼin li buchʼutik chopolike, vaʼun lik jchan Vivlia xchiʼuk jun mol ta tsobobbail.

Pe oy onoʼox kʼusitik ti toj tsots laj kaʼi yiktaele. Li june jaʼ ti toj tsots chi-iline. Ta pajtsan jba kʼuk sjalil, pe ta tsʼakale chitsʼuj yan velta xtok, jaʼ yuʼun chopol chkaʼi jba xchiʼuk mu xa xitun chkaʼi. Ta skoj ti jech chkaʼi jbae la jkʼopon li yajrextiko Jeova ti chchanubtasun toʼox ta Vivliae. Jaʼ la skoltaun ti oy smalael yuʼun xchiʼuk ti toj lek stalelale. Jun veltae laj yalbun ti akʼo jkʼel jun mantal ti chalbe skʼoplal ti skʼan mu xichibaje, taje jaʼ li ta revista Li Jkʼel osil ta toyole. * La jchankutik xtok ti kʼusi skʼan jpas mi chikap xa chkaʼie. La jtsak lek ta mukʼ li kʼusi chal li mantale xchiʼuk laj kalbe ta orasion li Jeovae, vaʼun ta kʼunkʼun lik jel li jtalelale. Jaʼ to laj kichʼ voʼ kʼuchaʼal jun yajrextiko Jeova ta avril ta sjabilal 2000. Li jtot jmeʼe xmuyubajik tajek.

KʼUSITIK SBALIL JTAOJAN: Li avie jun noʼox koʼonton xchiʼuk sak li jol koʼontone, yuʼun muʼyuk xa chkikʼubtas ta droga xchiʼuk ta mulivajel li jbekʼtale. Kʼusiuk ti yakalun spasele, mi chi-abtej, mi oyun ta tsobajel o ti ta jkʼupin jtosuk chʼayob oʼontonale, mas xa ximuyubaj xchiʼuk mu xa chopoluk chkaʼi jba.

Ta jtojbe ta vokol tajek Jeova ta sventa ti jechik li jtot jmeʼe, yuʼun muʼyuk la xchʼayikun ta yoʼontonik. Jech xtok, ta jnop ta sventa li kʼusi laj yal Jesús ta Juan 6:44 ti xi chale: «Muʼyuc bochʼo xuʼ yuʼun ta xtal ta jtojol me muc icʼbiluc tal yuʼun li Jtot ti la stacun tale». Ximuyubaj ta jnop ti jaʼ la skoltaun Jeova sventa xisut tal yan velta ta stojolale.

 «Ta jkʼan yaʼel ti oyuk jtote» (MARCO ANTONIO ALVAREZ SOTO)

KʼUSI ORA VOKʼ: 1977

SLUMAL: CHILE

KʼU TOʼOX YELAN XKUXLEJAL: JTIJ SON TA JUN BANDA DEATH-METAL

LI JKUXLEJAL TOʼOXE: Te lichʼi ta Punta Arenas, jun lum ti oy ta sural Sudamericae xchiʼuk ti lek noʼox li kuxlejal tee. Li jtot jmeʼe la xchʼak sbaik kʼalal voʼob toʼox jabilale, jaʼ yuʼun jtuk laj kaʼi jba xchiʼuk ta jkʼan yaʼel ti oyuk jtote.

Li jmeʼe chchan Vivlia xchiʼuk li yajrextikotak Jeovae xchiʼuk chikʼun batel li ta tsobajeletik ti ch-echʼ ta Salon sventa Tsobobbaile. Pe li voʼone mu jkʼan tajek xibat, jaʼ yuʼun nopolik noʼox ta jtoy jba ta be. Kʼalal la jta oxlajuneb jabilale, muʼyuk xa xibat.

Kʼalal jech taje lek xa onoʼox jkʼupin li sone xchiʼuk laj kakʼ venta ti lek xitojob stijele. Lik jtij heavy-metal xchiʼuk death-metal ta kʼinetik, ta kantinaetik xchiʼuk ta yan butikuk ti oy jkʼejimoletike, taje kichʼoj xaʼox voʼlajuneb jabil. Jaʼ ta jchiʼinan li buchʼu xtojobik lek ta tij sone, vaʼun jaʼ te ayan-o ta koʼonton li jtos música clásica sbie. Lik jchan stijel son ta jun chanobvun ti te noʼoxe. Kʼalal kichʼoj xaʼox jtob jabile libat ta kapital, jaʼ xkaltik ta Santiago, te libat sventa mas xichanunaj. Jech xtok, la jtij son xchiʼuk li buchʼutik tstijik heavy-metal xchiʼuk death-metal.

Manchuk mi jech, muʼyuk sbalil chkaʼi li jkuxlejale. Sventa mu jechuk xkaʼi jbae chiyakub xchiʼuk ta jtunes droga xchiʼuk li jchiʼiltak ta tij son ti jaʼ kutsʼ kalal kaloje. Toj toybaun, taje xvinaj li ta j-ikʼal kʼuʼ ta jlape, ti kʼuyelan kisime xchiʼuk ti chkʼot kʼalal ta jchukbenal li snatil jole.

Ta skoj li jtalelale, persa onoʼox ta jtikʼ jba ta majbail xchiʼuk ta jtikʼ jba ta kʼop xchiʼuk li polisiae. Jun veltae lik yilbajinunkutik xchiʼuk kamigotak li jchon drogaetike. Ta skoj ti chiyakube bat jtsakik ta kʼop, pe toj tsots la smajikun li stukike, yuʼun kʼas li sbakil kee.

Akʼo mi jech, li kʼusi mas toj kʼux kaʼie jaʼ ti kʼusi la spasbeikun li buchʼutik jkʼanoje. Jun kʼakʼale laj kakʼ venta ti oy xa jayibuk jabil ti tsmukul satiun li jnovia xchiʼuk li buchʼu kamigo ta alele xchiʼuk ti muʼyuk bu laj yalbeikun li yan kamigotake. Toj kʼux laj kaʼi taje.

Lisut ta Punta Arenas xchiʼuk lik chanubtasvankun ta sventa son xchiʼuk ta jtij violonchelo. La jpasilan-o gravar li jtos son ti heavy-metal xchiʼuk death-metal sbie. Jaʼo laj kojtikin jun kʼupil sba tseb ti Sussan sbie. Lik jchiʼin ta naklej. Ta jelavele, li Sussane laj yaʼi ti chchʼun ta sventa Trinidad li smeʼe ti mu jechuk li voʼone, jaʼ yuʼun xi la sjakʼbune: «¿Bu junukal ti melele?». Laj kalbe ti manchuk mi mu xtakʼ kuʼun ta Vivlia ti jaʼ jun jecheʼ chanubtasel taje, laj kalbe ti jaʼ xtakʼ yuʼunik ta Vivlia li yajrextikotak Jeovae. Vaʼun lik jkʼanbe koltael Dios ta orasion akʼo mi ep xaʼox jabiletik ti mu jechuk ta jpase.

Kʼalal echʼ xaʼox jayibuk kʼakʼale, laj kil jun vinik ti oy xa onoʼox kiloj yileluke, vaʼun la jakʼbe mi jaʼ yajrextiko Jeova. Manchuk mi xiʼ kuʼun ti kʼuyelan xvinaj li jpat jxokone, ta slekil yoʼonton la stakʼ li kʼusitik la jakʼbe ta sventa li tsobajeletik ch-echʼ ta Salone. Jchʼunoj ta melel ti jaʼ la stakʼbun j-orasion li Diose. Libat li ta salone, te lichoti ta yochebal noʼox sventa mu epuk  buchʼu xiyilun. Pe bu chata, laj yojtikinun ta anil li buchʼutik laj yojtikinikun ti chikʼot toʼox ta tsobajel ta jbikʼtale. Toj lek la xchʼamikun xchiʼuk la smeyikun ta slekil yoʼontonik, jaʼ yuʼun toj jun koʼonton laj kaʼi jba. Koʼol xchiʼuk jaʼ to lisut ta jna laj kaʼi. Kʼalal laj kil li yajrextiko Jeova ti la xchanubtasun toʼox ta Vivlia ta jbikʼtale, la jkʼanbe ti xchanubtasun yan veltae.

TI KʼUYELAN LA SJEL JKUXLEJAL LI VIVLIAE: Jun veltae la jkʼel Proverbios 27:11 ti xi chale: «Jnichʼon, bijan me, jech xcuxet noʼox coʼnton avuʼun». Toj labal sba laj kil ti xuʼ xmuyubaj yoʼonton kuʼuntik li Jpasvanej yuʼun vinajelbalumil ti jaʼ noʼox jpasmulilutike. Te laj kakʼ venta ti jaʼ xuʼ xkʼot ta jtot li Jeovae, ti jaʼ onoʼox ta jsaʼ tajeke.

Ta jkʼan onoʼox ta jmuyubta li Jtotik ta vinajele xchiʼuk ti ta jpas li kʼusi tskʼan yoʼontone, pe epal jabil jaʼ toʼox la smosoinun li droga xchiʼuk poxe. Laj kaʼibe smelolal li kʼusi laj yal Jesús ta Mateo 6:24 ti xi chale: «Muʼyuc bochʼo xuʼ yuʼun me tsaʼ chib yajval[e]». Kʼalal chkakʼ persa yiktael li kʼusitik chopole, li kʼusi chal 1 Corintios 15:33 jaʼ la skoltaun tajek, yuʼun xi chale: «Me ta jchiʼintic li bochʼotic chopolique, chisoquesbutic li jlequil taleltique». Laj kakʼ venta ti mu stsal kuʼun li kʼusitik chopol mi chikʼotilan-o li bu onoʼox chikʼote xchiʼuk mi ta jchiʼinan li buchʼutik ta jchiʼinan toʼoxe. Li tojobtasel chakʼ Vivliae jamal ta aʼyel: skʼan xkikta ta jyalel li kʼusitik tsmakun sventa mu xichʼi ta mantale (Mateo 5:30).

Ta skoj ti lek tajek chkaʼi li kʼusitik sventa son ti heavy-metal sbie toj tsots tajek ta iktael laj kaʼi. Pe jaʼ li skoltaikun li kamigotak ta tsobobbail sventa xkom kuʼune. Laj kikta li yakubele xchiʼuk li stunesel drogae, la jset jol, la jux li kisime xchiʼuk maʼuk xa noʼox ikʼ li jkʼuʼ ta jlape. Kʼalal laj kalbe li Sussan ti ta jset li jole, muʼyuk tsʼik yuʼun ta snaʼel ti kʼuyuʼun yantik xjel jkuxlejale, vaʼun xi laj yalbune: «Chbat jchiʼinot li ta Salone yuʼun ta jkʼan ta jkʼel kʼusitik chapasik te». Lek laj yil li kʼusi chichʼ pasel ta Salone, jaʼ yuʼun ta anil noʼox lik xchan li Vivlia eke. Ta tsʼakale linupunkutik, vaʼun koʼol la jkichʼkutik voʼ kʼuchaʼal yajrextiko Jeova ta 2008. Li avie jun koʼonton chitunkutik ta stojolal Jeova xchiʼuk li jmeʼe.

KʼUSITIK SBALIL JTAOJAN: Laj xa kakʼ venta ti mu meleluk li muyubajel jtaoj kaloje xchiʼuk li kamigotak ta alele. Lek-o tajek chkaʼi li sone, jaʼ noʼoxe ta xa jtʼuj. Ta jloʼiltabe jkuxlejal li kutsʼ kalale xchiʼuk yan buchʼutik sventa ta jkoltaik, mas to li kerem tsebetike. Ta jkʼan ti xakʼik venta ti naka «jech chac cʼu chaʼal cʼaʼep» li kʼusi chakʼ li balumile, manchuk mi lek yileluk ta kʼelel (Filipenses 3:8).

Ta skoj ti linopaj ta stojolal Diose jtaoj jlekil amigotak ta tsobobbail yuʼun yajtsʼaklom Cristo ti bu oy kʼanelal xchiʼuk jun oʼontonale. Li kʼusi mas tsots skʼoplal ta skotole, jaʼ ti la jta li Jeovae, ti kʼot ta jtote, ti jaʼ onoʼox li kʼusi oy ta koʼontone.

[Tsʼib ta yok vun]

[Tsʼib ti mukʼtik sletraile ta pajina 13]

«Jaʼ la skoltaun Jeova sventa xisut tal yan velta ta stojolal»