Chanubtaseletik ta Skʼop Dios

¿Kʼu yuʼun chichʼik voʼ li yajtsʼaklom Cristoe?

Li mantal liʼe tskoltaot sventa xasabe stakʼobil ta Avivlia atuk jlom sjakʼobiltak ti xuʼ van oy jech ajakʼojbe abae. Li sjakʼobiltak liʼe xuʼ xachan xchiʼuk junuk yajrextiko Jeova mi jech chakʼane.

1. ¿Kʼusi skʼan xal ti chichʼik voʼ li yajtsʼaklom Cristoe?

Li ichʼvoʼe jaʼ li kʼusi skʼan jpastik yoʼ lek chkil-o jbatik xchiʼuk li Diose. Ta skoj taje, li yajtsʼaklomtak Cristoe skʼan mu toj bikʼituk xichʼik voʼ, jaʼ to mi oy xaʼox sjabilalik sventa xojtikinik li Diose, vaʼun xuʼ xkʼotik ta yajtsʼaklom Cristo (Hechos 8:12; 1 Pedro 3:21). Pe sventa xkʼotik ta yajtsʼaklom Cristoe skʼan xchanik xchiʼuk ti spasik li kʼusitik laj yale. (Kʼelo Mateo 28:19, 20.)

Li ta skʼakʼalil jtakboletike, ep krixchanoetik lik xchanik ta sventa Dios xchiʼuk Jesús kʼalal laj yaʼibeik smelolal ti jech skʼan pasele. Taje jaʼ jech la spas jun vinik kʼalal laj yaʼibe smelolal ti xuʼ xkol ta skoj ti cham li Jesuse, vaʼun la spas ta ora li kʼusi skʼan spase, jaʼ yuʼun kʼot ta yajtsʼaklom Cristo. Li avi eke, ep krixchanoetik oy ta yoʼontonik jech tspasik. (Kʼelo Hechos 8:26-31, 35-38.)

2. ¿Kʼu yuʼun laj yichʼ voʼ li Jesuse?

Li Jesuse yichʼoj van 30 sjabilal kʼalal akʼbat yichʼ voʼ yuʼun li Juan J-akʼvanej ta voʼ li ta ukʼum Jordane. Laj yichʼ voʼ sventa chakʼ ta ilel ti oy ta yoʼonton tspas li kʼusi tskʼan Diose (Hebreos 10:7). Ti jech laj yichʼ voʼe laj yakʼ ta ilel ti oy ta yoʼonton chakʼ ta matanal xkuxlejal sventa chchʼaybe smul li krixchanoetike. Kʼalal skʼan toʼox xtal ta Balumile, yakʼoj xa onoʼox ta ilel ta vinajel ti skʼanoj li Stote xchiʼuk ti chchʼunbe smantale. (Kʼelo Marcos 1:9-11 xchiʼuk Juan 8:29; 17:5.)

  3. ¿Kʼu yuʼun chichʼik voʼ li yajtsʼaklom Cristoe?

Li voʼotike jelelutik kʼuchaʼal li Jesuse, yuʼun oy xa onoʼox jmultik chij-ayanutik. Pe koliyal li matanal laj yakʼ Jesuse, xuʼ lek xkil jbatik xchiʼuk li Diose (Romanos 5:10, 12; 12:1, 2). Maʼuk noʼox taje, yuʼun xuʼ xijkʼot xtok ta yutsʼ yalal (2 Corintios 6:18). Pe, ¿kʼusi skʼan jpastik yoʼ jech xkʼot ta pasele? Skʼan jpastik junuk orasion sventa chkakʼ jbatik ta stojolal Jeova xchiʼuk chkalbetik ti ta jpastik ta sjunlej jkuxlejaltik li kʼusi tskʼan yoʼontone. Kʼalal mi jpasojtik xaʼox li orasione, chkichʼtik voʼ sventa xkakʼtik ta ilel ti kakʼoj xa jbatik ta stojolal Diose. (Kʼelo Mateo 16:24, Ch, xchiʼuk 1 Pedro 4:2.)

4. ¿Kʼuxi xuʼ xachapan aba sventa li ichʼvoʼe?

Li yajrextikotak Jeovae chakʼbeik chanubtasel ta Vivlia li buchʼu tskʼan chnopaj ta stojolal Diose. Li xchanel Vivlia xchiʼuk kʼalal chabat ta tsobajeletike mas tstsatsub-o li kʼanelal avuʼun ta stojolal Diose xchiʼuk li xchʼunel avoʼontone. Jech xtok, tskoltaot sventa xlekub atalelaltak xchiʼuk li kʼusitik chapase. Kʼalal chichʼ chʼiesel talelaletik jech kʼuchaʼal kʼanelal xchiʼuk li xchʼunel oʼontonale, mas me kʼun spas-o avuʼun sbatel osil li kʼusi avalojbe Jeova chapase. (Kʼelo Juan 17:3 xchiʼuk Hebreos 10:24, 25.)

Mi chakʼanbe to mas yaʼyejale, kʼelo li kapitulo 18 ta livro liʼe, ¿Kʼusi chchanubtasvan ta melel li Vivliae?, ti jaʼ pasbil yuʼun yajrextikotak Jeovae.