¿Mi tsots van skʼoplal ti jnaʼtik buchʼu li Jesuse?

«Chavotquinic o li cʼusi melele. Ta sventa li cʼusi melele chaloqʼuic o ta mozoil.» (JUAN 8:32)

LI TA Vivliae xuʼ jchantik li kʼusi melel ta sventa Jesuse, taje jaʼ tskoltautik loʼkel li ta kʼusitik chʼunbil ti mu jamaluk ta aʼibel smelolale o li ta loʼlaeletike. Pe ¿mi tsots skʼoplal li kʼusi jchʼunojtike? Tsots, yuʼun jech chil li Jeovae xchiʼuk li Jesús eke. Jech li voʼotik eke skʼan tsots skʼoplal xkiltik ti jechuke.

● ¿Kʼu yuʼun tsots skʼoplal chil li Jeovae? Yuʼun jaʼ «stalel ta xcʼanvan o» (1 Juan 4:8). Li Diose tskʼan ti jun koʼontontik xijkuxi sbatel osile. Jech kʼuchaʼal chal ta Juan 3:16, «toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun [...] li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil». Li Diose la stak talel ta Balumil li Xnichʼon sventa tspojutike. Jech chakʼ kuxikutik ta Balumil kʼalal kʼatajem xaʼox ta jun paraisoe, jech kʼuchaʼal tskʼan onoʼox ta slikebe (Génesis 1:28). Li Diose tskʼan chakʼbe xkuxlejal sbatel osil skotol li buchʼutik chchanik li kʼusi melel ta sventa Xnichʼone xchiʼuk ti jech tspas stalelalik kʼuchaʼal chal ta Vivliae (Romanos 6:23).

● ¿Kʼu yuʼun tsots skʼoplal chil li Jesuse? Yuʼun skʼanoj li krixchanoetik eke. Jech laj yakʼ ta ilel kʼalal laj yakʼ xkuxlejal ta matanal sventa tspojutike (Juan 15:13). Yuʼun snaʼoj ti jaʼ noʼox jech xuʼ jta jkolebaltike (Juan 14:6). Li Jesuse tskʼan ti ep tajek buchʼutik tstabeik sbalil li pojelal laj yakʼe. Jaʼ yuʼun, laj yalbe mantal yajtsʼaklomtak sventa xalik batel ta spʼejel Balumil li kʼusi tskʼan yoʼonton Diose xchiʼuk li kʼusi tskʼan tspas ta jelavele (Mateo 24:14; 28:19, 20).

● ¿Kʼu yuʼun tsots skʼoplal skʼan xkiltik li voʼotik eke? Nopo ta sventa li kʼusi mas tsots skʼoplale, jaʼ xkaltik, ti lekuk noʼox oyote xchiʼuk ti lekuk noʼox oy ek li avutsʼ avalale. ¿Mi mu jechuk ti chakʼan ti lekuk noʼox oyot xchiʼuk ti xamuyubaj chakʼupin akuxlejal xchiʼuk li avutsʼ alal ti akʼanoje? Li Jeovae ta stunes Xnichʼon sventa lekuk noʼox oyutik jkotoltik xchiʼuk chakʼbutik kuxlejal ta sbatel osil ta jun achʼ Balumil ti bu muʼyuk xa kʼusi kʼux xchiʼuk muʼyuk xa vokolile (Salmo 37:11, 29; Apocalipsis 21:3, 4). ¿Mi mu jechuk ti chakʼan chakuxi jech kʼuchaʼal taje? Mi jeche, oy kʼusi skʼan xapas.

¿Mi xvul to ta ajol li teksto ta slikeb li mantal liʼe? «Jech chavotquinic o li cʼusi melele. Ta sventa li cʼusi melele chaloqʼuic o ta mozoil.» Taje jaʼ skʼoplal li melel ta sventa Jesuse xchiʼuk ti kʼuxi chkoltavan sventa tspas li kʼusi tskʼan yoʼonton Diose, ti jaʼ tskoltautik li ta mosoil ta sventa mulil xchiʼuk lajele. Sventa xijkole skʼan xkojtikintik li kʼusi melele. Ti jchantik li kʼusi melel ta sventa Jesuse xuʼ jtabetik sbalil xchiʼuk li kutsʼ kalaltike. ¿Mi chakʼan chanaʼ kuxi? Li yajrextikotak Jeovae ta sjunul yoʼonton xuʼ xaskoltaik.