Nopajan ta stojolal Dios

«Ta jcʼan chisut tal ta atojol»

¿Mi te toʼox oyot ta steklumal Jeova ta voʼne? Xuʼ van anopoj chasut yan velta, pe mu xanaʼ lek mi chchʼamot li Jeovae. Mi jaʼ jeche, oy ta koʼontonkutik ti xakʼel li mantal liʼe xchiʼuk li yan mantal chtale, ti jaʼ chapanbil sventa voʼote.

X I LAJ yal jun antse: «Solel ta jkʼanilanbe Dios ti akʼo xichaʼsut ta stojolale xchiʼuk ti xakʼun ta perton ta skoj li kʼusitik la jpase». Li ants taje te chʼi talel ta slumal Jeova, pe jun kʼakʼale laj yikta mantal. ¿Mi mu kʼuxuk ta avoʼonton chavaʼi ti ep tajek chil svokole? Xuʼ van xajakʼbe aba kʼuyelan chaʼi sba Dios ta stojolal li krixchanoetik taje, mi chvul to van ta sjol o mi oy van ta yoʼonton ti akʼo sutik talel ta stojolale. Pe ta van xamuyubaj-o yuʼun li kʼusi la stsʼiba komel li j-alkʼop Jeremiase (kʼelo Jeremías 31:18-20).

Baʼyel jchanbetik skʼoplal ti bakʼin laj yichʼ alele. Kʼalal skʼan toʼox jaylajunebuk jabil xvokʼ li Jeremiase, li Jeovae laj yakʼ ti akʼo xbat stsalik j-asiriaetik li lajunvokʼ nitilulal ta Israel ta sjabilal 740 kʼalal maʼuk toʼox jkʼakʼaliltike xchiʼuk ti xikʼik batel ta mosoil li jnaklejetik tee. * Li jnaklejetik taje tsots la saʼ smulik, jech xtok muʼyuk la xchʼunik li pʼijubtasel akʼbatik yuʼun li j-alkʼopetike, jaʼ yuʼun li Diose oy kʼusi laj yakʼbe xchanik (2 Reyes 17:5-18). ¿Kʼusi van kʼot ta pasel kʼalal ikʼbilik batel ta mosoil, ti nom xaʼox oyik ta stojolal Dios xchiʼuk li ta slumalike? ¿Mi laj xaʼox sjel stalelalik? ¿Mi xchʼayoj xaʼox ta sjol steklumal li Jeovae? ¿Mi oy to van ta yoʼonton chchʼam yan velta?

«La jsutes xa coʼnton»

Li j-israeletike oy kʼusi la xchanik: kʼalal jaʼo teik ta mosoile, te lik snopik lek, jaʼ yuʼun la sutes yoʼontonik. Li Jeovae laj yakʼ venta ti ta melel la sutes yoʼontonike. Sventa xkakʼtik ventae, xuʼ jkʼeltik kʼuyelan chkʼopoj Jeova ta sventa stalelal xchiʼuk ti kʼuyelan chaʼi sba Efraín, ti jaʼ kʼopoj ta stojolal li yan nitilulaletik ta Israele.

«Laj caʼay ti batsʼi xʼocʼ xʼavan noʼox li Efraine.» Versikulo 18.) Ta melel, li Diose laj yaʼi kʼuyelan x-okʼoletik li j-israeletik ta skoj li kʼusitik chopol la spasike. Jech kʼuchaʼal chal jun diksionario ta hebreo kʼope, li jpʼel kʼop jelubtasbil «xʼocʼ xʼavan» xie, xuʼ skʼan xal xtok «sjimolan sjol», jech kʼuchaʼal tspas jun jtoyba nichʼonil ti laj yakʼ venta ti chopol li kʼusi la spase xchiʼuk ti la sutes yoʼontone, vaʼun tskʼan tsut ta sna (Lucas 15:11-17). Jaʼ yuʼun chaʼa, ¿kʼuxi laj yakʼik ta ilel j-israeletik ti la sutes yoʼontonike?

«Laj abijubtasun ta nucul jech chac cʼu chaʼal unin tot vacax ti mu stacʼ pasel ta mansoe.» (Versikulo 18.) Li j-israeletike laj yakʼik venta ti jech la spas sbaik jech kʼuchaʼal chʼiom tot vakax ti muʼyuk pasbil ta manxoe, jaʼ yuʼun staik-o li kastigo taje. Kʼalal jech laj yalbeik skʼoplal tot vakaxe, xuʼ van jech la spas sbaik jech kʼuchaʼal tspas jkot jtoyba vakax ti tskʼan «tsitsel ta vachʼe», jech kʼuchaʼal chal jlik vun ti chchanbe skʼoplal taje.

«Jelbun li coʼntone, ta jcʼan chisut tal ta atojol, yuʼun voʼot noʼox Diosot cuʼun.» (Versikulo 18.) Ta  skoj ti sutesoj xaʼox yoʼontonike, x-okʼ x-avanik ta stojolal Dios. Melel onoʼox ti jaʼik li buchʼutik la xchʼak sbaik ta stojolale xchiʼuk ti ep la saʼ smulike. Pe tskʼanik ti akʼo x-akʼatik ta pertone, jaʼ yuʼun la skʼanbeik koltael li Jeovae.

«Ta orae la jsutes xa coʼnton [...], toj qʼuexlal sba chcaʼay; toj biqʼuitun yuʼun chcaʼay.» (Versikulo 19.) Li j-israeletike kʼexavik ta skoj li smulike xchiʼuk laj yakʼik venta ti oy smulike. Solel laj yat-yoʼontonik xchiʼuk ipajik-o ta at-oʼonton (Lucas 15:18, 19, 21).

Jamal xvinaj ti sutesoj xaʼox yoʼontonike. Solel kʼexavik, jaʼ yuʼun laj yalbeik ta jamal smulik li Diose xchiʼuk laj yiktaik spasel li kʼusi tspasik toʼoxe. Jaʼ yuʼun, ¿mi ch-akʼatik van ta perton xchiʼuk mi tsutik van ta slumalik ta skoj li kʼusi laj yakʼik ta ilele?

«Ep cʼux o ta coʼnton»

Li Jeovae skʼanoj tajek li j-israeletike. «Vuʼun stotun li Israele, jaʼ sba jnichʼon li Efraine», jech chal li ta Jeremías 31:9. Jaʼ yuʼun chaʼa, ¿mi muʼyuk van chchʼam xnichʼon jun totil ti skʼanoj tajek kʼalal mi chaʼsutal xchiʼuk mi sutesoj xaʼox yoʼonton ta melele? Li kʼusi chal Jeova liʼe, jaʼ chakʼ ta ilel ti jaʼ jun totil ti skʼanoj ta jyalel li steklumale.

«Li Efraine jaʼ jnichʼon ti lec cʼupil chquile, ti lec jcʼanoje. Tsots laj cacʼbe taqʼuiel, pero te ta jnaʼilan o.» (Versikulo 20.) ¡Toj kʼupil xa noʼox sba li kʼusi chale! Ta melel, li Diose jaʼ jun totil ti lek xkʼanvane. Akʼo mi jech, tukʼ yoʼonton laj yakʼ sba xchiʼuk la spʼijubtas xnichʼnabtak ti chil svokolik ta skoj li kʼusitik la spasike. Kʼalal muʼyuk la xchikintaik li pʼijubtasel akʼbatik li j-israeletike, li Diose laj yakʼ ti akʼo xichʼik ikʼel batel ta mosoile. Akʼo mi jech, muʼyuk la xchʼay ta sjol, jech kʼuchaʼal mu xchʼay ta sjol xnichʼon jun jkʼanvanej totile. Vaʼun chaʼa, ¿kʼu yelan laj yaʼi sba kʼalal laj yakʼ venta ti la sutes yoʼontonik ta melel li slumale?

«Solel toj yan sba coʼnton yuʼun; ep cʼux o ta coʼnton.» (Versikulo 20.) Li Jeovae oy ta yoʼonton ti xchaʼsut talel li xnichʼnabtake. Ta skoj ti la sutes yoʼontonik ta melele solel tijbat yoʼonton xchiʼuk la skʼan ti akʼo sutik talel ta stojolale. Jech kʼuchaʼal laj yal Jesús li ta lokʼolkʼop sventa jtoyba nichʼonile, li Jeova eke «icʼuxubaj ta yoʼnton» li slumale (Lucas 15:20). Oy tajek ta yoʼonton xchʼamel yan velta li xnichʼnabtake.

«Laj yakʼ sutkun talel ta stojolal li Jeovae»

Li kʼusi tsʼibabil komel ta Jeremías 31:18-20 jaʼ chakʼ kiltik ti toj lek yoʼonton xchiʼuk ti oyutik ta yoʼonton li Diose. Li stuke muʼyuk chchʼay ta yoʼonton li buchʼutik tunik ta stojolal ta voʼnee. Mi oy ta yoʼontonik tsutik talel ta stojolal li Diose, li stuke «ta [xchʼay] ti mulil coloʼile» (Salmo 86:5, Ch). Yuʼun muʼyuk tspalopatin li buchʼutik tstsutes yoʼontonik ta melele (Salmo 51:17). Moʼoj, yuʼun solel xmuyubaj ta xchʼamel yan velta (Lucas 15:22-24).

¿Mi xvul to ta ajol li ants laj kalbetik skʼoplal ta slikebal li mantal liʼe? Li ants taje, ta sjunul yoʼonton sut talel ta stojolal li Diose, jaʼ yuʼun la saʼ koltael ta jun tsobobbail yuʼun yajrextikotak Jeova ti bu nakale. Ta slikebale toj tsots laj yaʼi stsalel komel li kʼusitik chopol chtal ta sjole. Yuʼun xi chale: «Ta jnop ti mu jta-o ti xakʼun ta perton li Diose». Pe, li moletik ta tsobobbaile la spatbeik yoʼonton xchiʼuk la skoltaik sventa stsatsub ta mantal. ¿Kʼusi kʼot ta pasel un? Xi chale: «Laj yakʼ sutkun talel ta stojolal li Jeovae xchiʼuk ta jtojbe ta vokol taje».

Mi achʼakoj aba ta stojolal Jeova eke, pe chakʼan chasut yan velta ta stojolale, chkalbotkutik ti akʼo xasaʼ koltael ta junuk tsobobbail yuʼun yajrextikotak Jeova ti bu mas nopol xavile. Vuleso me ta ajol ti Diose chakʼ ta ilel xkʼuxul yoʼonton xchiʼuk slekil yoʼonton ta stojolal li buchʼu tsutes yoʼonton ta melel xchiʼuk ti xi chalbee: «Ta jcʼan chisut tal ta atojol».

Ti bu kʼalal xuʼ jkʼeltik Vivlia li u liʼe:

◼ Jeremías 17 kʼalal ta 31

[Tsʼib ta yok vun]