Xchiʼinel ta loʼil jun yajrextiko Jeova ¿Mi jaʼ van Dios li Jesuse?

LI YAJREXTIKOTAK JEOVAE lek chaʼi chloʼilajik ta sventa Vivlia xchiʼuk slakʼnaik. ¿Mi oy van kʼusi chakʼan chanaʼ ti te stakʼobil ta Vivliae? ¿Mi chakʼan chanaʼ kʼusi xchʼunojik xchiʼuk kʼusi tspasik li yajrextikotak Jeovae? Mi jeche, ta yan velta mi la chiʼin ta loʼil junuk yajrextiko Jeovae xuʼ xajakʼbe yuʼun ta sjunul yoʼontonik xuʼ tstakʼboxuk.

Jkʼelbetik jun skʼelobil ti kʼuyelan chchiʼin sbaik ta loʼil jun yajrextiko Jeova xchiʼuk slakʼnae. Jnoptik noʼox ti Carmen sbi li yajrextiko Jeova ti tsvulaʼan jun ants ti Susana sbie.

¿Mi melel ti mu xchʼunik ta sventa Jesús li yajrextikotak Jeovae?

Susana: Li jpastore chal ti mu xchʼunik ta sventa Jesús li yajrextikotak Jeovae. ¿Mi melel taje?

Carmen: Ta melel jchʼunojkutik ta sventa li Jesuse. Yuʼun jchʼunojkutik ti sventa jta jkolebaltike, skʼan xkakʼ xchʼunel koʼontontik ta stojolal li Jesuse.

Susana: Jech jchʼunoj ek.

Carmen: Vaʼun chaʼa, oy kʼusi jmoj jchʼunojtik. Aa, li jbie jaʼ Carmen, li voʼote ¿kʼusi abi?

Susana: Li jbie jaʼ Susana.

Carmen: Toj lek ti chkojtikin jbatike. Yikʼaluk van chajakʼbe aba mi jchʼunojkutik ta melel Jesús li yajrextikotak Jeovae, ¿kʼu yuʼun mu jechuk chalik li krixchanoetike?

Susana: Jech, ta jkʼan ta jnaʼ taje.

Carmen: Xanaʼe oy xchʼunel koʼontonkutik ta sventa li Jesuse. Jaʼ noʼoxe mu jchʼunkutik skotol li kʼusi chalik ta sventa Jesuse.

Susana: ¿Mi xuʼ xavalbun jtosuk kʼusi ti mu xachʼunike?

Carmen: Veno, oy buchʼutik chalik ti jaʼ noʼox la jun lekil vinik echʼ ta balumil li Jesuse, pe li voʼonkutike mu jchʼunkutik taje.

Susana: Jech chkaʼi maʼ taj eke.

Carmen: Taje koʼol jchʼunojtik xtok. Yan skʼelobil taje jaʼ ti yajrextikotak Jeovae mu jchʼunkutik li kʼusitik chalik mi tsvalopatin sba xchiʼuk li kʼusi laj yakʼ ta chanel stuk ta sventa ti kʼuyelan xil sba xchiʼuk Stot li Jesuse.

Susana: ¿Kʼusi chakʼan chaval taje?

Carmen: Epal relijionetike chalik ti jaʼ Dios li Jesuse. Yikʼaluk van jaʼ jech chanubtasbilot ek.

Susana: Jech, yuʼun li jpastore chal ti koʼolik la li Dios xchiʼuk Jesuse.

Carmen: ¿Mi mu jechuk xanaʼ ti te chkojtikintik ta Vivlia li melel ta sventa Jesuse? Yuʼun te chkiltik li kʼusi laj yal stuke.

Susana: Jech maʼ chkal eke.

¿Kʼusi laj yal li Jesuse?

Carmen: Jkʼeltik junuk teksto ti tsjambe smelolal taje. Kʼelavil kʼusi chal ta Juan 6:38. Li Jesuse xi laj yale: «Liyal tal liʼ ta banamile, mu jaʼuc tal jpas li cʼusi tscʼan coʼnton jtuque. Jaʼ tal jpasbe cʼusi tscʼan li Bochʼo la stacun  tale». Ti jaʼuk Dios li Jesuse, mu sta-o ti jech chale.

Susana: ¿Kʼusi ti chakʼan chavale?

Carmen: Veno, kʼelavil ti muʼyuk laj yal ti yal talel ta Balumil sventa tspas kʼusi tskʼan yoʼonton stuk li Jesuse.

Susana: Jech avaʼuk, laj yal ti jaʼ tal spas li kʼusi tskʼan yoʼonton li buchʼu takvan tale.

Carmen: Pe ti jaʼuk Dios li Jesuse, ¿buchʼu ti takvan tale? Xchiʼuk, ¿kʼu yuʼun tspasbe kʼusi tskʼan yoʼonton xchiʼuk ti xchʼunbe smantale?

Susana: Xkaʼi xa li kʼusi chakʼan chavale. Pe li teksto taje mu xakʼ lek jchʼun ti maʼuk Dios li Jesuse.

Carmen: Jkʼeltik avil kʼusi laj yal Jesús ta yan velta xtoke. Te ta jtatik jpʼelantik kʼopetik ti jutuk mu jmojuk li ta Juan 7:16, ¿mi xuʼ xakʼel?

Susana: Lek. «Li Jesuse jech laj yalbe: “Muc vuʼcun jcʼop ti liʼ ta xcacʼ ta chanele. Jaʼ scʼop li Bochʼo la stacun tale[”].»

Carmen: Kolaval. Jech kʼuchaʼal chal li tekstoe, ¿mi jaʼ van laj yakʼ ta chanel Jesús li skʼop stuke?

Susana: Moʼoj, yuʼun laj yal ti jaʼ yuʼun li buchʼu takvan tale.

Carmen: Jech. Vaʼun chaʼa, ¿buchʼu la stak talel li Jesuse? Xchiʼuk ¿bu la xchan li kʼusitik melel laj yakʼ ta chanele? ¿Mi mu van jaʼuk yan ti buchʼu mas mukʼ skʼoplale? ¿Mi mu jechuk ti jaʼ mas tsots skʼoplal li buchʼu chtakvan tale, ti jaʼ mu sta li buchʼu chtakat tale?

Susana: ¡Toj labal xa noʼox sba chkaʼi! Muʼyuk toʼox bu jkʼeloj li teksto taje.

Carmen: Nopo xtok ta sventa li kʼusi laj yal Jesús liʼ ta Juan 14:28: «Laj xa avaʼyic ti jech laj calboxuque: “Ta xibat, pero ta to xtal jchiʼinoxuc. Me acʼanojicune, xcuxet noʼox avoʼntonic ti chibate. Yuʼun jaʼ te chisut batel ta stojol li Jtote. Yuʼun jaʼ echʼem smucʼul jech chac cʼu chaʼal li vuʼune”». Jech kʼuchaʼal chal li versikulo liʼe, ¿mi koʼol van skʼoplal laj yaʼi sba xchiʼuk Stot li Jesuse?

Susana: Veno, laj yal ta jamal ti jaʼ mas mukʼ skʼoplal li Stote, ti jaʼ xkom li stuke. Ta jnop noʼoxe, mas mukʼ skʼoplal laj yil li Diose.

Carmen: Jech ta melel. Jkʼeltik xtok kʼusi chal Mateo 28:18. Li ta versikulo taje xi laj yalbe yajtsʼaklomtak li Jesuse: «Liʼacʼbat xa scotol jvuʼel ta sventainel li vinajel xchiʼuc banamile». ¿Mi laj yal Jesús ti yichʼoj xa onoʼox li yabtele?

Susana: Moʼoj, laj yal ti jaʼ to akʼbate.

Carmen: Pe ti jaʼuk Dios li Jesuse, ¿kʼuxi xa onoʼox ti yichʼ to akʼbel sjuʼele? ¿Buchʼu xa noʼox laj yakʼ ti jechuke?

Susana: Skʼan ta jnop maʼ taje.

¿Buchʼu van li chchiʼin ta loʼile?

Carmen: Oy to kʼusi yan labal sba ti jaʼuk Dios li Jesuse.

Susana: ¿Kʼusi taje?

Carmen: Jaʼ li kʼusi kʼot ta pasel kʼalal laj yichʼ voʼ li Jesuse. Kʼelavil kʼusi chal ta Lucas 3:21, 22. ¿Mi chakʼan chakʼel talel?

Susana: «Cʼalal jaʼo te chichʼic voʼ ta stojol Juan li epal cristianoetique, te cʼot scʼan ichʼvoʼ ec li Jesuse. Cʼalal la scʼopan Dios li Jesuse, ijam li vinajele. Iyal tal ta sba yacʼol li Chʼul Espiritue. Oy sbecʼtal xcoʼlaj xchiʼuc stsumut yilel. Laj yaʼay oy bochʼo icʼopoj tal ta vinajel, jech laj yal: “Voʼot jnichʼonot, lec jcʼanojot, lec jpatoj coʼnton avuʼun”.»

Carmen: ¿Mi la avakʼ venta kʼusi yakal spasel Jesús kʼalal laj yichʼ voʼe?

Susana: Yakal tspas orasion.

Carmen: Jaʼ jech. Ti yuʼun jaʼuk Dios li Jesuse, ¿buchʼu van ti yakal tskʼopon ta orasione?

Susana: Kʼuxi kaʼuktik taje. Ta jakʼbe jpastor maʼ taje.

Carmen: Yan ti kʼusi xuʼ xkakʼtik venta noxtoke, jaʼ ti kʼalal laj xaʼox yichʼ voʼ li Jesuse, oy buchʼu kʼopoj talel ta vinajel. ¿Mi la avakʼ venta kʼusi laj yal li buchʼu kʼopoj talele?

Susana: Laj yal ti jaʼ Xnichʼon li Jesuse, ti skʼanoje xchiʼuk ti lek spatoj yoʼonton ta stojolale.

Carmen: Jech ta melel. Jaʼ yuʼun, ti jaʼuk Dios li Jesuse, ¿buchʼu ti kʼopoj talel ta vinajele?

Susana: Mi jutebuk toʼox jech jnopoj ta sventa taje.

 ¿Kʼu yuʼun jaʼik «Totil» xchiʼuk «Nichʼonil»?

Carmen: Oy to kʼusi yan. Laj xa jkʼeltik ti jamal laj yal Jesús ti buchʼu te oy ta vinajele jaʼ li Stote, taje jaʼ li Diose. Xchiʼuk kʼalal laj yichʼ voʼ li Jesuse, oy buchʼu kʼopoj talel ta vinajel xchiʼuk laj yal ti jaʼ Xnichʼone. Jamal laj yal Jesús ti jaʼ Xnichʼon Dios li stuke. Ti tauk xajambe smelolal ti koʼolik chaʼvoʼ krixchanoetik ti yutsʼ yalal noʼox sbaike, ¿buchʼu skʼoplal chaval ti jechuke?

Susana: Xuʼ van jaʼ li buchʼu xchiʼil noʼox sbaik ta vokʼele.

Carmen: Jech ta melel, xuʼ van chaʼvoʼ bachetik ti jmojik tajeke. Pe li Jesuse laj yal ti jaʼ Stot li Diose xchiʼuk ti jaʼ Nichʼonil li stuke. Vaʼun chaʼa, ¿kʼusi tskʼan Jesús ti xkaʼibetik smelolale?

Susana: Aa, kaʼibe xa smelol. Li Jesuse jaʼ chalbe skʼoplal jun krixchano ti jaʼ mas tsots yabtele xchiʼuk ti mas ep sjabilale.

Carmen: Jaʼ jech ta melel. Labal sba ti jaʼ chtal ta ajol vachetik o li buchʼu xchiʼil sbaik ta vokʼel ti xkoʼolajik tajek kʼalal chavalbe skʼoplal li buchʼu koʼolik tajeke. Ti tauk skʼan xal li Mukʼta Jchanubtasvanej Jesús ti koʼolik xchiʼuk li Diose, ¿mi mu van jechuk la stunes xanaʼ li skʼelobil taj eke o ti laj yal yan ti mas jamal ta aʼibel smelolale?

Susana: Jech van avaʼuk.

Carmen: Yuʼun jech kʼuchaʼal chkiltike jaʼ la stunes li jpʼel kʼop Totil xchiʼuk Nichʼonil xie, sventa xal ti kʼuyelan xil sbaik xchiʼuk li Diose.

Susana: Li kʼusi chaval taje toj labal sba chkaʼi.

¿Kʼusi laj yalik li baʼyel yajtsʼaklomtak Jesuse?

Carmen: Pe yoʼ to mu xibate, mi xokolot to jlikeluke ta jkʼan chkakʼ avil yan kʼusi ti smakojbe skʼoplal taje.

Susana: Lek, xokolun to jlikeluk.

Carmen: Ti jaʼuk Dios li Jesuse, ¿mi mu jamaluk van laj yal yajtsʼaklomtak ti jechuke?

Susana: Jech onoʼox maʼ ti jechuke.

Carmen: Pe akʼo mi jech, muʼyuk bu chal Vivlia mi jech chanubtasvanik. Moʼoj. Jkʼeltik avil kʼusi la stsʼiba li jtakbol Pablo ti jaʼ jun ta skotol li buchʼutik kʼotik ta baʼyel yajtsʼaklom Jesuse. Li ta Filipenses 2:9, te chalbe smelolal kʼusi la spas Dios kʼalal cham xchiʼuk chaʼkuxiem xaʼox li Jesuse: «Li Diose la stoy muyel cʼalal to ta toyol. Laj yacʼbe jun sbi ti echʼem smucʼul ta scotol yan biiletique». Jech kʼuchaʼal chal li versikulo liʼe, ¿kʼusi la spasbe Jesús li Diose?

Susana: Liʼe chal ti la stoy muyel kʼalal to ta toyole.

Carmen: Jech. Pe ti koʼolikuk li Dios xchiʼuk Jesús kʼalal skʼan toʼox xchame xchiʼuk ti la stoy muyel kʼalal to ta toyol ta mas tsʼakale, ¿mi mu jaʼuk van mas xa tsots skʼoplal kom li Jesús ti jechuk la spase? ¿Mi oy van buchʼu mas tsots skʼoplal kʼuchaʼal li Diose?

Susana: Muʼyuk buchʼu xuʼ yuʼun maʼ taje.

Carmen: Tana un, ti jtsaktik ta mukʼ skotol li sprevailtake, ¿mi chchanubtasvan Vivlia xanaʼ ti jaʼ Dios li Jesuse?

Susana: Moʼoj maʼ chkile. Yuʼun chal ti jaʼ Xnichʼon li Diose.

Carmen: Jaʼ jech. Pe taje maʼuk skʼan xal ti mu xkichʼkutik ta mukʼ Jesús li yajrextikounkutik Jeovae. Jchʼunojkutik ti cham kʼuchaʼal Mesías ti albil onoʼox skʼoplale xchiʼuk ti jaʼ la sjambe sbelel sventa chkol li krixchanoetik ti tukʼ chakʼ sbaik ta stojolal li Diose.

Susana: Jech jchʼunoj ek.

Carmen: Vaʼun chaʼa, yikʼaluk van lek ti jakʼbe jbatik kʼuxi xuʼ jtojbetik ta vokol Jesús ti laj yakʼ xkuxlejal ta jtojolaltike. *

Susana: Oy jech jakʼbe jba maʼ taje.

Carmen: Mi chakʼane chital yan velta sventa chkakʼ avil ta Vivlia li stakʼobile. ¿Mi liʼ van oyot ta yan xemana jech ora kʼuchaʼal liʼe?

Susana: Liʼ oyune.

Carmen: Lek chaʼa, te xkil jbatik.

[Tsʼib ta yok vun]