Armagedón​—¿Kʼusi tsnopik ti jaʼ taje?

«La stsobic tal ta jun banamil ti Armagedón sbi ta hebreo cʼope.» (APOCALIPSIS 16:16)

¿KʼUSI chanop kʼalal chavaʼi li jpʼel Armagedón, xie? Xuʼ van chtal ta ajol ti oy ep buchʼutik chil svokolik ta skoj ti oy kʼusi tsots chkʼot ta pasele. Manchuk mi jun noʼox velta oy ta Vivlia li jpʼel kʼop taje, ep ta velta chalilanik ta television, ta radio xchiʼuk jech chalilanik li jeltos jnitvanejetik ta relijion eke.

Pe, ¿mi koʼol li kʼusi xchʼunojik jutuk mu skotoluk krixchanoetik xchiʼuk li kʼusi chal Vivlia ta sventa li Armagedone? Ta melel, skʼan me jnabetik li stakʼobile. ¿Kʼu yuʼun? Yuʼun mi la achan li kʼusi melele xuʼ van mas jun avoʼonton chamala li kʼusi chtale xchiʼuk chjel ti kʼuyelan chanop toʼox ta sventa li Diose.

Chano batel oxtos li kʼusi mas chichʼ jakʼel ta sventa li Armagedone xchiʼuk koʼoltaso xchiʼuk li kʼusi chchanubtasvan Vivliae.

  1. LI VOKOLIL TA ARMAGEDONE, ¿MI JAʼ TA SKOJ KRIXCHANOETIK?

Jlom jtsʼibajometik sventa periodiko xchiʼuk li buchʼutik chchanbeik skʼoplal taje, kʼalal chalik li jpʼel kʼop Armagedone jaʼ chalbeik skʼoplal jun vokolil ti chkʼot ta pasel ta skoj krixchanoetike. Jech kʼuchaʼal liʼe, la stunesik kʼalal laj yalbeik skʼoplal li chib mukʼta paskʼop echʼem ta spʼejel Balumile. Kʼalal ta ox stsak sbaik ta kʼop li Estados Unidos xchiʼuk li Unión Sovieticae, li krixchanoetike xiʼik ta skoj ti xuʼ slajes sbaik ta vomba atomikaetike, jech oxal li paskʼop ti chkʼot ox ta pasel taje «armagedón ta vomba atomika» la sbiiltasik li television, radio o yan kʼusitike. Li avie, ep li buchʼutik chchanbeik skʼoplale tsvul-o yoʼontonik ti chjel ta jyalel li sikil xkʼixnal Balumil ta skoj li yikʼubtasel osilbalumile, xchiʼuk chalik ti xuʼ la chlik «armagedón ta skoj ti chjel sikil xkʼixnal Balumile».

¿Kʼusi chakʼik ta aʼyel kʼalal jech chalike? Yalojike oy ta skʼob krixchanoetik li kʼusi chkʼot ta pasel ta mas tsʼakal liʼ ta Balumile xchiʼuk ta skotol li kʼusitik kuxajtike. Jech xtok mi mu la sabeik smelolal kʼusitik lek xuʼ spasik li ajvaliletike, xuʼ xlaj-o li Balumile.

¿Kʼusi chchanubtasvan li Vivliae? Li ta Vivliae chal ti Diose muʼyuk chakʼbe slajes Balumil li krixchanoetike. Yuʼun xi chal ta melele: «Maʼuc sventa ti jecheʼ xocol ti laj smeltsan» Balumil li Jeovae, * jaʼ sventa «ayanuc ti jnaclejetique» (Isaías 45:18, Ch). Li Diose muʼyuk chakʼ ta lajesel li Balumile, moʼoj, yuʼun li stuke tslajesbe «scʼoplal [li buchʼutik] jsoquesej-banomile» (Apocalipsis 11:18, Ch).

2. ¿MI JAʼ VAN ARMAGEDÓN LI NIKEL, NOJELAL TA VOʼ O YAN KʼUSITIKE?

Ta jlom lumetike kʼalal chalik Armagedón li jtsʼibajometik sventa periodikoe tstunesik sventa chalbeik skʼoplal mukʼta vokoliletik, jech kʼuchaʼal li nikel o yan kʼusitike. Jech kʼuchaʼal liʼe, jun aʼyej ta 2010 la sbiiltas ta «“Armagedón” ta Haití» li nikel echʼ tee. Te laj yalbe skʼoplal ti laj yil svokolike, ti chamike xchiʼuk ti ep kʼusi sok ta skoj li nikel echʼ tee. Kʼalal tstunesik li jpʼel kʼop Armagedón li yan jtsʼibajometik sventa periodiko xchiʼuk li jlom buchʼutik tspasik sinee, maʼuk noʼox chalbeik skʼoplal li kʼusitike echʼem xae, yuʼun jaʼ chalbeik skʼoplal xtok li kʼusi xibal sba xuʼ xkʼot ta pasel ta jelavele. Jech kʼuchaʼal liʼe, ti spasuk la choke jun asteroide xchiʼuk li Balumile chalik ti jaʼ la Armagedone.

¿Kʼusi chakʼik ta aʼyel kʼalal jech chalike? Ti jaʼ la jun vokolil ti solel parejo tsmil ta anil skotol krixchanoetik manchuk mi muʼyuk kʼusi chopol spasojik li Armagedone xchiʼuk ti mi jsetʼuk la kʼusi stakʼ jpastik sventa jchabi jbatike.

¿Kʼusi chchanubtasvan li Vivliae? Jaʼ ti maʼuk jun vokolil ti parejo tsmil skotol krixchanoetik li Armagedone. Jaʼ noʼox tslajes li buchʼutik chopolike. Li Vivliae chal ta melel ti mu xa jaluk «liʼ oyic li bochʼotic chopolique» (Salmo 37:10).

3. ¿MI TSLAJES TA ARMAGEDÓN BALUMIL LI DIOSE?

Li buchʼutik oy srelijione xchʼunojik ti tspas la kʼop li kʼusi lek xchiʼuk li kʼusi chopole,  vaʼun jech la chlaj-o li Balumile. Li organisasion Princeton Survey Research Associates sbie, la sjakʼbe yijil krixchanoetik ta Estados Unidos ta sventa taje, ta skotolike oy 40% laj yalik ti chlaj la ta alel ta «Armagedón» li Balumile.

¿Kʼusi chakʼik ta aʼyel kʼalal jech chalike? Ti maʼuk la sventa chijkuxi ta sbatel osil ta Balumil ti kʼuyelan laj kichʼtik pasele xchiʼuk ti maʼuk la sventa sbatel osil laj yichʼ meltsanel li Balumile. Ti kʼuyelan la spasutik li Diose jaʼ ti ta onoʼox la xijchame.

¿Kʼusi chchanubtasvan li Vivliae? Jamal chal ti Diose «laj [snakan] lec ta snacleb li banamile yuʼun jech mu me xbacʼ» (Salmo 104:5). Li Vivliae xi chal ta sventa li buchʼutik liʼ nakalik ta Balumile: «Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o» (Salmo 37:29).

Jech kʼuchaʼal chkiltike, li Vivliae jamal chal ti mu jechuk li kʼusitik yichʼoj chʼunel ta sventa li Armagedone. Vaʼun chaʼa, ¿kʼusi jaʼ ta melel?

[Tsʼib ta yok vun]