Chanubtaseletik ta Skʼop Dios

¿Kʼu yuʼun skʼan jtunestik li sbi Diose?

Li mantal liʼe tskoltaot sventa xasabe stakʼobil ta Avivlia atuk jlom sjakʼobiltak ti xuʼ van oy jech ajakʼojbe abae. Li sjakʼobiltak liʼe xuʼ xachan xchiʼuk junuk yajrextiko Jeova mi jech chakʼane.

1. ¿Kʼu yuʼun la stʼuj sbi li Diose?

Jkotoltik ta jkʼantik ti ta jbitik xkichʼtik kʼoponele. ¿Kʼu yuʼun? Yuʼun ta skoj li jbitike mu xijkapij ta yan, mu xkoʼolaj kʼalal «vinik» o «ants» xi chkichʼtik albele. Li Dios eke oy ep kʼuyelan chichʼ albel, jlome jaʼ: Kajvaltik Mukʼul Dios, Dios ti skotol xuʼ yuʼune xchiʼuk Mukʼta Jpasvanej (Génesis 15:2; 17:1; Eclesiastés 12:1). Pe la snop la stʼuj sbi ta skoj ti tskʼan xkojtikintik leke xchiʼuk ti xkamigointike. Li ta tsotsile li biil taje jaʼ Jeova o Yahweh. (Kʼelo Éxodo 3:14 xchiʼuk li tsʼib ta yok vune.)

Li buchʼutik la sjelubtasik ta yan kʼop li Vivliae sjelojik ta «Dios» o «Kajvaltik» li sbi Diose, pe li sbie jutuk mu vukmil ta velta xvinaj li ta tsʼibetik yuʼun Vivlia ta hebreo kʼop ta voʼnee. Jamal xvinaj ti tskʼan Dios ti chkojtikinbetik li sbie. (Kʼelo Salmo 148:13.)

2. ¿Kʼu yuʼun skʼan xkojtikinbetik li sbi Diose?

Maʼuk noʼox bal ti chkojtikinbetik li sbi Diose, moʼoj, yuʼun skʼan xijnopaj ta stojolal jech kʼuchaʼal tspasik li buchʼu yamigo sbaik ta melele. Li biil Jeovae jaʼ smelolal «Jaʼ Tspas akʼo Kʼotuk ta Pasel». Taje chakʼ ta aʼiel ti xuʼ tspas yuʼun skotol li kʼusitik yaloje xchiʼuk ti chkʼot ta pasel yuʼun skotol li kʼusi tskʼane. Jech oxal, kʼalal chkojtikintik li sbi Diose ta jchʼuntik ta melel ti tspas skotol li kʼusitik chal tspase (Salmo 9:10). Li buchʼutik xojtikinik xchiʼuk tstunesik li sbi Diose oy xchʼunel yoʼontonik ta stojolal xchiʼuk jaʼ mas tsots skʼoplal chaʼi ta xkuxlejalik. Li buchʼutik jech tspasik taje ch-albatik yuʼun Jeova ti chichʼik chabiele. (Kʼelo Salmo 91:14.)

  3. ¿Kʼu yuʼun tskʼan Dios ti xichʼ ojtikinbel li sbie?

Li Diose tskʼan ti xkojtikinbetik li sbie, yuʼun snaʼoj ti ta jtabetik sbalile. ¿Kʼuxi? Yuʼun xuʼ xijkʼot ta yamigo xchiʼuk jta spatobil koʼontontik ti xuʼ chijkuxi sbatel osile. Jaʼ yuʼun, mu labaluk sba chkaʼitik ti tskʼan Dios ti xichʼ akʼel ta ojtikinel li sbie. (Kʼelo Juan 17:3; Romanos 10:13, NM; 10:14.)

Li Jesuse laj yakʼ ta ojtikinel li sbi Diose, taje jaʼo la spas kʼalal laj yalbe krixchanoetik li kʼusitik yaloj tspas Diose, laj yalbe li smantaltake xchiʼuk li kʼusi tsnope. Li yajtsʼaklom Cristo avie, jaʼ jech tspasik ta skotol mukʼta lumetik ek. Ta skotolalike xkoʼolajik kʼuchaʼal jun jteklum ti yichʼojbe sbi Diose. (Kʼelo Hechos 15:14, NM; Juan 17:26, NM.)

4. ¿Kʼuxi tsakubtas stuk sbi li Diose?

Ta skoj ti ikʼubtasbil sbi li Jeovae tskʼan tsakubtas. Ep buchʼutik xchʼunojik ti maʼuk la spas Balumil li Diose, jaʼ yuʼun tsnopik ti mu sta-o xichʼ chʼunbel smantale. Oy jlom xtoke, chalik ti muʼyuk oyutik ta yoʼontone xchiʼuk ti jaʼ la ta smul ti oy jvokoltike. Pe li buchʼutik chchopol kʼoptaik Diose mu xa jaluk jech tspasik, yuʼun li Jeovae chakʼbe kastigo li buchʼutik taje. (Kʼelo Salmo 83:17, 18.)

Kʼalal mi la slajes li ajvalil krixchanoetik xchiʼuk mi laj yichʼ tal lekilal xchiʼuk jun oʼontonal ta Balumil li Ajvalilal yuʼun Diose, jaʼo me tsakubtas o chchʼultajes sbi li Diose (Daniel 2:44). Poʼot xa me snaʼik ti jaʼ noʼox stuk melel Dios li Jeovae. (Kʼelo Ezequiel 36:23; Mateo 6:9.)

¿Kʼusi skʼan xapas li voʼote? Jaʼ ti xanopaj ta stojolal Diose. Sventa taje skʼan xachan li Vivliae xchiʼuk ti xachiʼinan li buchʼutik skʼanojik Diose. Xuʼ jchʼuntik ta melel ti kʼalal chchʼultajes sbi li Jeovae tsvules ta sjol li tukʼil yajtuneltake (Malaquías 3:16).

Mi chakʼanbe to mas yaʼyejale, kʼelo li kapitulo 1 ta livro liʼe, ¿Kʼusi chchanubtasvan ta melel li Vivliae?, ti pasbil yuʼun yajrextikotak Jeovae.

[Lokʼol ta pajina 18]

Sbi Dios ta jun voʼneal tsʼib ta hebreo