¿Kʼusi jaʼ ta melel li Armagedone?

«Li pucujeti[ke] [...] chbat stsobic tal scotol ajvaliletic ta sbejel banamil [...] ta jun banamil ti Armagedón sbi ta hebreo cʼope.» (Voʼon la jpaskutik ta kursiva; APOCALIPSIS 16:14, 16)

LI Armagedone jaʼ sbi jun osil, bakʼintike chichʼ tsʼibael Har–Magedón. Pe ta melel, muʼyuk onoʼox bu jech ta Balumil ti jech sbi junuk lume.

Vaʼun chaʼa, ¿kʼusi smelolal ta melel li jpʼel kʼop taje? Xchiʼuk, ¿kʼu yuʼun chichʼ tunesel kʼalal oy kʼusi chkʼot ta pasel jech kʼuchaʼal jun paskʼope?

Te tstsob sbaik ta jun lum ti jaʼ sbi Armagedone

Li ta hebreo kʼop Har–Magedón xie, jaʼ skʼan xal «Vits ta Meguido». Akʼo mi muʼyuk junuk vits ti jech sbi taje, oy jun osil ti jaʼ sbi Meguidoe. Li osil taje te oy ta snoroesteal voʼneal slumal Israel, ti bu tsnup sba beetike. Li ta stsʼel osil taje ep te la spasik kʼopetik ti toj tsotsik skʼoplale, vaʼun kʼalal Meguido xiike, jaʼ chtal ta sjolik li paskʼope. *

Ta melel, ti yoʼ tsots skʼoplal li Meguidoe jaʼ ti kʼu yuʼun laj yichʼ pasel kʼop tee, maʼuk ti kʼusitik kʼopal laj yichʼ pasele. Li lum taje jaʼ te  oy ek li ta yosilal Albil Balumil ti akʼbatik yuʼun Jeova li j-israeletike (Éxodo 33:1; Josué 12:7, 21). Li Jeovae laj yalbe ta melel ti tspoj ta stojolal yajkontratake, vaʼun jech onoʼox kʼot ta pasel (Deuteronomio 6:18, 19). Yuʼun li ta Meguidoe, li Jeova la skolta j-israeletik ta skʼelobil juʼelal ta stojolal Jabín ti jaʼ jcanaán ajvalile xchiʼuk ta stojolal Sísara ti jaʼ li bankilal soltaro yuʼune (Jueces 4:14-16).

Ta melel, li jpʼel kʼop Har–Magedón, o Armagedón xie, jaʼ skʼelobil ti oy kʼusi tsots skʼoplal chkʼot ta pasele. Li jpʼel kʼop taje te smakojbe skʼoplal chaʼtos juʼelal ti tspasik kʼope.

Li albilkʼop ta Vivliae chalbe skʼoplal ti poʼot xa tstijbe sjol yoʼonton ajvaliletik li Satanás xchiʼuk spukujtake. Taje jaʼ sventa tstsob sbaik yoʼ stsakik ta kʼop li steklumal Diose. Li ta paskʼop taje epal miyon krixchanoetik chlajik kʼalal mi la stsal yajkontratak li Diose (Apocalipsis 19:11-18).

Ta skoj ti chal Vivlia «ti vocol chlic scʼacʼal [yoʼonton], ti jaʼ toj ep li cʼuxubinel» yuʼun Diose, ¿kʼuxi xa noʼox ti chakʼ chamuk epal krixchanoetike? (Nehemías 9:17.) Sventa chkaʼibetik smelolal li kʼusi tspas Diose, tsots skʼoplal jtakʼtik oxib sjakʼobiltak: 1) ¿Buchʼu tslikes li paskʼope? 2) ¿Kʼu yuʼun te tikʼil skʼoplal li Jeovae? 3) ¿Kʼusi sbalil tstabeik-o li Balumil xchiʼuk krixchanoetik li paskʼop taje?

1. ¿BUCHʼU TSLIKES LI PASKʼOPE?

Mu jecheʼuk noʼox tstsakvan ta kʼop Dios li ta paskʼop ta Armagedone. Moʼoj, yuʼun jaʼ sventa tspoj li buchʼutik lekik ti ch-ilbajinatike. Li buchʼutik tslikesik li kʼop taje jaʼik «scotol [li] ajvaliletic ta sbejel banamil[e]». ¿Kʼu yuʼun tslikesik li kʼope? Yuʼun li Satanase tsloʼlabe sjol yoʼonton s-organisasiontak ajvalil xchiʼuk soltaroetik sventa muʼyuk xkʼuxul yoʼonton tstsakik ta kʼop li buchʼutik chichʼik ta mukʼ li Jeova Diose (Apocalipsis 16:13, 14; 19:17, 18).

Li krixchanoetik ta jlom lumetik avie toj ep sbalil chilik ti xuʼ chkaltik li kʼusi ta jnoptike xchiʼuk ti ta jujuntal ta jtʼuj jrelijiontike, jaʼ yuʼun tsnopik ti xuʼ mu xkʼot ta pasel ti tspas kʼop xchiʼuk relijionetik li ajvaliletike o ti oy ta yoʼonton tskʼan tslajesike. Pe ta melel, oy xa onoʼox jech kʼotem ta pasel li ta siglo 20, li avi xtoke jech chkʼot ta pasel. * Akʼo mi jech, li  kʼusi chkʼot ta pasel yuʼun li Armagedone oy chaʼtos kʼusi jelel xchiʼuk li paskʼopetik taje. Li baʼyele, jaʼ ti ta spʼejel Balumil tstsakvanik ta kʼop li yajkontratak Diose. Li xchibale, jaʼ ti muʼyuk bu jech ilbil-o kʼuyelan tspak sutel li Jeovae (Jeremías 25:32, 33). Taje xi tsbiiltas li Vivliae: «Mucʼta pleito ta scʼacʼalil yuʼun li Dios ti echʼem svuʼele».

2. ¿KʼU YUʼUN TE TIKʼIL SKʼOPLAL LI JEOVAE?

Li Jeovae tskʼan ti mu saʼik kʼop xchiʼuk ti akʼo skʼan yajkontraik li yajtuneltake (Miqueas 4:1-3; Mateo 5:43, 44; 26:52). Jaʼ yuʼun muʼyuk tstunesik abtejebaletik sventa tspoj-o sbaik kʼalal mi lik li tsatsal paskʼope. Yan ti mi muʼyuk xpojatik yuʼun li Diose, xkoʼolaj kʼuchaʼal muʼyuk chkʼanvan, muʼyuk stukʼil o chʼabal sjuʼel yaʼeluk. Ta skoj taje, li sbi Jeova Diose, jaʼ xkaltik, ti kʼuyelan chichʼ ojtikinele te tsakal skʼoplal ek. Jaʼ yuʼun muʼyuk chikta-o li steklumale (Salmo 37:28, 29).

Li Diose mu skʼan ti oy buchʼu xlaje, jaʼ yuʼun kak chal li kʼusi tspase (2 Pedro 3:9). Li ta loʼiletik ta Vivliae, li Jeovae tsvules ta joltik ti la spakbe skʼoplal steklumal kʼalal saʼatik ta kʼope, muʼyuk bu smeyoj skʼob kom (2 Reyes 19:35). Li ta Vivliae chalbutik ti ta jelavele, kʼalal mi la saʼik ta kʼop steklumal Dios li Satanase, li ajvaliletik xchiʼuk li soltarotak ti tspas ta mantale, li Jeovae tskolta yan velta li steklumale xchiʼuk tstunes sjuʼel sventa tslajes li yajkontratake. Voʼne xa onoʼox yaloj tal Vivlia ti tslajes buchʼutik chopol li Diose (Proverbios 2:21, 22; 2 Tesalonicenses 1:6-9). Kʼalal mi kʼot yoraile, li buchʼutik tsaʼvanik ta kʼope chakʼik venta ti jaʼ tspasik kʼop xchiʼuk li buchʼu Skotol xuʼ yuʼune (Ezequiel 38:21-23).

3. ¿KʼUSI SBALIL CHICHʼ TABEL-O LI PASKʼOP TAJE?

Li paskʼop ta Armagedone jaʼ sventa chichʼ pojel ta smiyonal noʼox krixchanoetik xchiʼuk jaʼ senyail ti poʼot xa xlik jun oʼontonal li ta Balumile (Apocalipsis 21:3, 4).

Li slivroal Apocalipsise chal ti mu stakʼ chapel li «epal cristianoetic» ti kuxul chkomik li ta paskʼop taje (Apocalipsis 7:9, 14). Li buchʼutik kuxul chkomike chbeiltasatik yuʼun Dios sventa tspasik ta jun paraiso li Balumile, jech kʼuchaʼal tskʼan onoʼox Dios ta slikebale.

Pe, ¿bakʼin chlik tsakatuk ta kʼop li steklumal Diose?

[Tsʼibetik ta yok vun]

[Lokʼol ta pajina 6]

La spakbe onoʼox skʼoplal steklumal ta voʼne Dios kʼalal la slajes li yajkontratake

[Lokʼol ta pajina 7]

Li ta paskʼop ta Armagedón xtoke tspakbe skʼoplal steklumal li Jeovae